Prezidente ANPM, Florentino Mateus Soares Ferreira. Imajen TATOLI/Egas Cristóvão

DILI, 18 novembru 2020 (TATOLI)—Prezidente ANPM, Florentino Mateus Soares Ferreira, hateten Autoridade Nasionál Petróleu no Minerál (ANPM) sei reprezenta Timor-Leste nu’udar Autoridade Dezignada bainhira nasaun rua (Timor-Leste no Austrália) hahú dezenvolve kadoras Greater Sunrise.

“ANPM nia pozisaun klaru dada kadoras mai Timor-Leste no buat ne’ebé hatuur ona dezde uluk, agora ita kontinua bá-oin entaun ANM sei sai autoridade dezignada hodi haree ba área rejime espesiál kadoras Greater Sunrise ne’e,” Prezidente ANPM, Florentino Mateus Soares Ferreira, esplika liuhosi audiénsia públika ho Komisaun C (Finansa Públika) no Komisaun D (Ekonomia no Dezenvolvimentu), iha plenária Parlamentu Nasionál, tersa ne’e.

Maibé, nia dehan, Rejime Espesiál Greater Sunrise ne’e bazea ba tratadu delimitasaun fronteira marítima Anexu B previstu rekerimentu balu atu iha enkuadramentu legál no mós fiskál nune’e operasionaliza kampu refere iha futuru.

Nia hatutan, bainhira kampu ida-ne’e preparadu entaun diskusaun ba enkuadramentu legál finaliza ona  hodi bele fó kaben sistema legál hosi nasaun rua tanba sistema legál iha Austrália adota sistema legál common low nian, iha Timor-Leste ita adota sistema sivíl.

“Entaun ita presiza hamosu sistema legál hibrida ida, nune’e to’o ikus ita bele implementa iha rejime espesiál Greater Sunrise nian,” nia dehan.

Nune’e mós rejime fiskál mós Timor-Leste sei halo sistema hanesan tanba impostu no tributária nasaun rua nian la hanesan, sei haree tán diploma komplementár sira-ne’ebé atu-bele operasionaliza kampu Greater Sunrise ne’e iha futuru.

“Bainhira ne’e hotu tiha ita foin asina kontratu hodi partilla produsaun ne’ebé to’o ikus sei selebra hamutuk reprezenta ANPM sei asina ho Woodside, Timor Gap hanesan mós parseiru ida iha laran ho mós Osaka Gas. Atu asina kontratu partilla produsaun ida-ne’e, depois ida-ne’e mak Timor Gap ho ninia parseiru sira sei lori sira-nia planu dezenvolvimentu mai aprezenta ba iha Governu rua tuir akordu ne’ebé Governu Timor-Leste no Austrália asina delimitasaun fronteira marítima iha anexu B  ne’e,” nia realsa.

Ba ida-ne’e, nia dehan, ema na’in-rua sei reprezenta hosi Timor-Leste no ida reprezenta hosi Austrália atu-bele foti desizaun kona-ba planu dezenvolvimentu. 

Bazea ba akordu tratatadu ne’ebé asina iha ONU previstu artigu 4 (kontratu partilla nian hosi produsaun Grater Sunrise nian). Hosi artigu ne’e dehan Autoridade Dezignada sei selebra kontratu partilla nian hosi produsaun Grater Sunrise nian iha kondisaun ekivalente sira ba kontratu sira hosi partilla produsaun nian JPDA 03-19 no JPDA 03-20.

Nune’e mós artigu 5 (Entidade Regulatória sira), parte hirak estabelese liuhosi prezente tratadu  estrutura regulatória hosi nível rua atu regulamentasaun no administrasaun hosi Rejime Espesiál Greater Sunrise nian, kompostu hosi Autoridade Dezignada ida no Konsellu Supervisaun ida.

Artigu 6 (Autoridade Dezignada)

  1. Autoridade Dezignada sei responsável ba regulasaun no jestaun diária sira iha atividade petrolífera sira-nian iha área Rejime Espesiál nian, hafoun lori naran Timor-Leste nian no Austrália nian, no lori fali ba Konsellu Supervisaun nian.
  2. Autoridade Dezignada tenke:

a) Sai autoridade públika responsável atu hafoun nu’udar Autoridade Dezignada tuir buat ne’ebe deside hosi membru Governu Timor-Leste nian responsável ba setór petróleu nian;

b) Halo regulamentu ba área Rejime Espesiál nian tuir akordu ho Prátika Di’ak sira hosi indústria petrolífera nian;

c) Sai finansiada hahú hosi kobra taxa sira tuir akordu ho Kódigu Minerasaun Petrolífera nian aplikável no kontratu partilla nian hosi produsaun Greater Sunrise nian; no

d) Laiha prejuizu hosi dispostu iha artigu 7 no 8 prezente aneksu nian, ezerse sira-nia podér no funsaun sira iha termu ne’ebé estabelese ona iha prezente artigu, laiha interferénsia hosi kualkér entidade seluk no tuir akordu ho prezente tratadu.

3. Autoridade Dezignada sei iha duni podér no funsaun sira hanesan tuir mai:

a) Regulasaun no jestaun diária hosi atividade petrolífera sira iha área Rejime Espesiál nian, tuir akordu prezente tratadu no nia funsaun sira, tuir buat ne’ebé hakerek iha iha Kódigu Minerasaun Petrolífera nian aplikável iha kualkér regulamentu emitidu sira ba abrigu hanesan, ho esesaun materiál sira-nian relasionada ho kestaun estratéjika sira.

b) Halibur ho Konsellu Supervisaun nian no lori ne’e, ho periosidade ida ba dala-tolu iha tinan ida.

Termina tiha prosesu ida-ne’e foin tama ba konsellu supervizaun, komité rezolusaun litíjiu sira, planu dezenvolvimentu greater sunrise, gazodotu ka óleodutu no prosesu barak tán.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here