Sekretáriu Estadu Ambiente (SEA), Demétrio de Amaral de Carvalho. Imajen/Tatoli Tatoli Egas Cristovão.

DILI, 17 novembru 2020 (TATOLI)Hafoin Prezidente Repúblika promulga dekretu lei númeru 37/2020 23 setembru kona-ba uzu saku plástiku, faze tuir mai Sekretaria Estadu Ambiente (SEA) hahú halo sensibilizasaun ba loja no kompañia ne’ebé uza no prodús plástiku, molok implementasaun lei.

Sekretáriu Estadu Ambiente, Demétrio do Amaral  de Carvalho, hateten SEI sei fó prazu ba loja sira atu uza plástiku to’o inísiu tinan oin, maibé kuandu la kumpre prazu ne’e sei hetan penalidade.

“Ohin ha’u kontente hamutuk ho loja, empreza importadór balun, fabrika bee, atu hateten katak ita atu halakon plástiku, hafoin Prezidente Repúblika promulga lei numeru 37/2020 23 setembru, loron 23 outobru hanesan tempu finál uza sigleplastic, maibé ita fó prazu ba sira to’o 23 fevereiru 2021 ne’e tempu finál,” Sekretáriu Estadu Demétrio informa ba Agência TATOLI, hafoin halo  sensibilizasaun kona-ba polítika zero plástika ba loja na’in sira iha Timor Plaza, tersa ne’e.

Nia apresia tanba seremónia ne’e hetan partisipasaun másimu hosi empreza sira.

“Ha’u kontente empreza sira partisipa di’ak, espera entidade hotu hakarak kolabora, ha’u hateten ba sira loron 23 fevereiru 2021 bainhira ha’u mai fali balun kontra, ita sei kriminaliza sira,” nia akresenta.

Tuir governante ne’e, implementasaun polítika zero plástiku daudaun iha faze sensibilizasaun kontiúdu lejizlasaun ne’e ba entidade sira hotu, maski implementasaun loloos iha tinan ne’e.

SEA foin lalais ne’e konsege taka kompañia fábrika plástiku ida iha Dili.

”Ha’u taka tiha empreza ida semana kotuk no ha’u simu ona karta hosi ninia advogadu,” nia hatutan.

Notísia Relevante: SEA-ANLA halo inspensaun ba kompañia Handy Plastic

Sekretáriu Estadu informa, kompañia ne’ebé maka prodús plástiku, SEA sei taka iha tempu entre 2020 to’o 2021.

“Prazu ne’ebé fó maka kompañia la kumpre, ha’u hetan ohin, ba ho kódigu penál atu taka,” nia fó hanoin.

Daudaun parte SEA serbisu hamutuk ona ho parte intelejénsia atu haree kestaun ne’e.

“Ami sei taka tan kompañia rua hanesan fábrika plástiku no ami sei serbisu ho intelijénsia atu identifika sira-nia fatin iha ne’ebé, ita bolu Polísia la’o hamutuk ho ita, halo buska ba nia evidénsia hodi halo apreensaun ba sasán sira ne’ebé bandu ona,” nia dehan.

Iha fatin hanesan, Diretora Operasionál iha kompañia Timor Holding SA, Zonia dos Reis, konsidera desizaun Governu liuhosi SEA kona-ba polítika zero plástiku ne’e di’ak.

“Ha’u hanoin Governu nia planu fevereiru tinan oin hanesan idea di’ak atubele redús plástiku ne’ebé maka iha ita-nia rai laran, tanba ita haree ema uza plástiku barak no soe arbiru, entaun espera Governu bele aplika lalais planu ne’e,” nia akresenta.

Nia konsidera, inisiativa ne’e parte ida atubele redús uzu plástiku iha kapitál Dili.

“Apresia tebes ba programa Governu tanba di’ak,” nia hatutan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here