Portavós Komandu Jerál PNTL, Superintendente Xefe, Arnaldo de Araújo. Imajen Tatoli/Eugénio Pereira

DILI, 17 novembru 2020 (TATOLI)- Durante loron 01 to’o 17 novembru 2020, Polísia Nasionál Timor-Leste (PNTL) rejista kazu krime hamutuk 43 no kazu asidente tráfegu hamutuk 12.

Dadus estatístika hosi Komandu Jerál PNTL relata katak, hosi kazu 43 ne’ebé akontese kompostu hosi valénsia doméstika 10, kazu asaltu malu ualu (8), kazu taa malu entre grupu no juventude sira hitu (7) no kazu krime simples seluk tan.

PNTL rejista mós dadus asidente tráfegu ne’ebé rezulta vítima na’in 12 sofre kanek todan no kaman ne’ebé kauza hosi motór monu lima (5) no karreta soke malu haat (4).

Portavós Komandu Jerál PNTL, Superintendente Xefe, Arnaldo de Araújo ba jornalista, ohin, iha Komandu Jerál PNTL, Caicoli, Dili, informa iha loron 16 novembru, tuku 09:51 dadeer, Komunidade iha área Luhu-Heni, Suku Bucoli, Munisípiu Baucau, hetan matéria explozivu hanesan granda modelu Hand Frag.K.413 ho kór metan ne’ebé sei ativu.

PNTL Munisípiu Baucau kontaktu kedas Seksaun Explosive Ordinance Disposal, Unidade Espesiál Polísia (EOD-UEP) hodi halo destruisaun.

Iha parte seluk, Komandu Jerál PNTL hasai alerta ida hodi bandu komunidade atu labele sunu no fa’an fogete, tanba parte PNTL sei halo operasaun iha fulan novembru to’o dezembru, hodi fó seguransa ba loron boot Natál no Tinan foun 2021.

Komandu PNTL mós halo ona preparasaun másimu hodi garante seguransa ba selebrasaun Festa Proklamasaun Independénsia, 28 novembru 2020, ne’ebé sei hala’o Munisípiu Liquiça.

Jornalista   : Eugénio Pereira  

Editór        : Francisco Simões

HAKEREK NO HATÁN

Please enter your comment!
Please enter your name here