Prezidente Repúblika, Francisco Guterres "Lú-Olo". Imajen Tatoli/ Egas Cristovao

Dili, 17 novembru 2020 (TATOLI)—Prezidente Repúblika, Francisco Guterres Lú Olo, iha loron 18 to’o 19 novembru, sei halo vizita traballu iha munisípiu Ermera.

Tuir nota ne’ebé Agência TATOLI asesu, durante loron-rua iha Gleno, Xefe Estadu sei haree kondisaun eskola públika, sentru saúde, atividade produtiva no halo diálogu hodi rona no hatan preokupasaun autoridade lokál no komunidade kona-ba dezenvolvimentu nasionál.

Prezidente Repúblika sei halo mós vizita ba grupu produtivu kulat, prosesamentu no distributór fini ikan, Eskola Bázika Sentrál 10 abríl, Eskola Nino Konis Santana no kuda-ai simbolikamente, Sentru Maternidade, Eskola Sekundária Jerál Hélio Pina ‘Maukruma’ no diálogu ho autoridade lokál no komunidade.

Membru Governu ne’ebé sei akompaña vizita ne’e mak Vise Primeiru-Ministru no Ministru Planu no Ordenamentu, Ministru Koordenadór Asuntu Ekonómiku, Ministru Asuntu Parlamentár no Komunikasaun Sosiál, Ministru Administrasaun Estatál, Ministra Saúde, Ministru Edukasaun, Juventude no Desportu, Ministru Obras Públika.

Nune’e mós, Ministru Turizmu, Komérsiu no indústria, Ministru Agrikultura no Peska, Ministru Petróleu no Minerál, Sekretáriu Estadu Formasaun Profisionál no Empregu, Sekretáriu Estadu Terra no Propriedade, Sekretáriu Estadu Kooperativa, Sekretáriu Estadu Juventude no Desportu no Sekretáriu Estadu Arte no Kultura.

Antes ne’e, Prezidente Repúblika halo ona vizita traballu iha munisípiu Viqueque, Covalima no Lautém.

Iha dezembru 2020, Xefe Estadu sei hala’o vizita traballu iha munisípiu Baucau.

Jornalista:Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here