Primeiru-Ministru, Taur Matan Ruak. Imajen Tatoli/Egas Cristovão

DILI, 17 novembru 2020 (TATOLI)—Primeiru-Ministru (PM), Taur Matan Ruak, halo enkontru semanál ho Prezidente Repúblika (PR), Francisco Guterres ‘Lú Olo’ kona-ba preparasaun Governu, atu halo debate proposta Orsamentu Jerál Estadu 2021 iha Parlamentu Nasionál (PN).

“Ha’u husu hasoru Prezidente Repúblika, atu informa atividade Governu nian, liuliu preparasaun diskusaun orsamentu 2021 ne’ebé daudaun  Parlamentu Nasionál halo hela audiénsia públika ho kalendáriu ba diskusaun hahú loron 01 to’o 21 dezembru 2020,” Xefe Governu hateten hafoin sorumutuk ho Xefe Estadu iha Palásiu Prezidensiál, Bairro Pité, tersa ne’e.

Notísia Relevante: Reuniaun KM: fixa tetu finál proposta OJE 2021 biliaun $1,895

Proposta OJE 2021 hamutuk biliaun $1,895 komposta hosi saláriu no vensimentu millaun $239,26, bens no servisu millaun $421,49, transferénsia públika millaun $669,91, kapitál menór millaun $61,14 no kapitál dezenvolvimentu millaun $503,20.

Iha tinan oin, VIII Governu Konstitusionál fó perioridade nasionál  lima hanesan setór kapitál sosiál, dezenvolvimentu ekonómiku ne’ebé aliña mós atividade rekuperasaun ekonómiku, infraestutura bázika no konetividade sira, dezenvolvimentu ambientál no reforma instutusionál.

Aleinde ne’e, PM Taur mós informa situasaun jerál seguransa territóriu nasionál ba Prezidente Repúblika.

“Seguransa forma jerál di’ak, maski iha problema kiik-oan, maibé ita kontinua fó orientasaun no institusaun ba ita-nia Polísia Nasionál Timor-Leste atu kontinua fó kontrolu di’ak ba ita-nia rai-laran iha área seguransa nian,” atuál Ministru Interiór ne’e informa.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here