Prezidente Autoridade RAEOA-ZEESM, TL, Arsénio Paixão Bano, loke formasaun integradu sistema jestaun finanseira, iha salaun Aeroportu Internasionál Oé-cusse, tersa (17/11). Imajen TATOLI/Antónia Gusmão

OÉ-CUSSE, 17 novembru 2020 (TATOLI)–Ministériu Finansa (MF) parseria ho Autoridade Rejiaun Administrativa Espesiál Oé-cusse Ambeno (RAEOA) no Zona Ekonomia Espesiál Sosiál Merkadu Timor-Leste (ZEESM, TL) organiza sesaun formasaun integradu kona-ba sistema jestaun finanseira “Goverment Resource Plan (GRP)”.

Atividade ne’e realiza iha salaun Aeroportu Internasionál Rota do Sâlndalo no formasaun ne’e rasik loke hosi Prezidente RAEOA, Arsénio Paixão Bano, akompaña mós hosi adjunta Prezidente Autoridade, Leonia Monteiro no sekretáriu Rejionál sira, inklui prezensa hosi Diretór Jerál Servisu Korporativu MF, Joanico Pinto.

Diretór Joanico Pinto, hateten objetivu prinsipál hosi atividade ne’e atu fó formasaun ho matéria detallu kona-ba sistema integradu jestaun finansa públika, kompostu hosi finansa, aprovisionamentu, jestaun kontratu, jestaun tezouru (Expenditure & Treasury management, Payroll Management), planu orsamentu, kontabilidade, sistema no prosesu impostu (SIGTAS).

Nune’e mós, hasai kapasidade no koñesementu tékniku funsionáriu sira hodi bele utilza sistema iha tinan 2021.

“Pre-rekizitu uza sistema GRP maka autoridade RAEOA-ZEESM tenke hatuur katak despeza hotu tenke klasifika tuir klasifikasaun orsamentu ne’ebé iha kategoria saláriu vensimentu, bens no servisu, kapitál menór no transferénsia públika,” Diretór ne’e esplika, tersa ne’e.

Tuir nia, formasaun ne’e foin realiza hodi integra iha sistema, tanba tinan hirak liubá kotuk, iha aneksu 2 lei orsamentu, despeza ba autoridade RAEOA-ZEESM tama iha kategoria transfénsia públika no tama iha liña orsamentál dotação do tudo Governo.

“Entaun bainhira orsamentu 2021 define ona ninia estatutu klaru iha tabela V aneksu lei ne’e, ba oin sei utiliza bainhira orsamentu aprova, entaun antes atu utiliza maka pre-0rekezitu ida mak tenke halo formasaun pesoál tékniku profisionál sira iha ne’e,” nia akresenta.

Formandu sei hetan avaliasaun no teste iha finál kursu hodi sukat kbiit no kapasidade absorvesaun ba matária no bainhira ramata maka MF liuhosi Gabinete Reforma Jestaun Finansa Públika no Sentru Kapasitasaun, sei emite sertifikadu ba partisipante sira.

MF kompremetidu atu kontinua kolabora no koopera nafatin ho autoridade, hodi asegura tékniku sira nafatin akompaña durante faze implementasaun sistema.

“Treinamentu ida-ne’e mós hodi responde no kumpre tuir orientasaun polítika Governu no Parlamentu Nasionál, relasiona ho obrigasaun Autoridade RAEOA-ZEESM utiliza sistema finanseira ba preparasaun no ezekusaun OJE 2021 bainhira aprovadu,” nia hatutan.

Iha fatin hanesan, Prezidente Autoridade RAEOA, Arsenio Paixão Bano, konsidera formasaun ne’e importante tebes tanba mosu deklarasaun oinoin katak autoridade ezekuta osan arbiru no laiha transparánsia.

Hosi formasaun ne’e, bele tulun RAEOA tama iha sistema ne’e no iha tinan-lima nia laran autoridade halo esforsu boot atu inklina-an iha sistema.

“Oé-cusse iha oportunidade di’ak tanba hetan formasaun hosi Ministériu Finansa kona-ba sistema free balance, atu tulun ezekusaun orsamentu RAEOA ho di’ak, tanba krítika barak kona-ba ezekusaun durante ne’e,” nia dehan.

Prezidente autoridade ne’e agradese ba Governu sentrál, liuliu MF tanba bele realiza atividade ne’e.

“Formasaun ne’e ba tékniku finansa rejiaun, hodi kapasita di’ak liután nune’e bele uza sistema ho di’ak ba ezekusaun orsamentu,” nia akresenta.

Antes ne’e, Autoridade RAEOA ezekuta  orsamentu uza de’it sistema manuál tanba bazeia ba lei kriasaun RAEOA-ZEESM, katak iha kompeténsia autonomia finanseira, administrativa no patrimoniál.

Rejiaun sei iha sistema finanseira rasik, ne’ebé parte legál sira dezenvolve sistema ne’e no sei hetan asisténsia hosi serbisu sentrál.

“Durante uza sistema manuál ami sempre aprezenta relatóriu ba Parlamentu, Governu, no konta rejiaun ninian kada tinan sempre hetan auditóriu hosi Tribunál Konta,” Arsénio esklarese.

Tuir planu treinamentu ne’e sei hahú hosi 17 to’o 22 dezembru 2020, ne’ebé korresponde ho oras 248.

Formasaun ne’e hanesan pre-rekezitu tékniku ida, nune’e bele garante katak iha tinan fiskál 2021, autoridade bele ona utiliza sistema jestaun finanseira hodi ezekuta orsamentu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here