Agrikultór ida tau-matan hela ba to’os iha Atabae. Imajen Tatoli/António Gonçalves

DILI, 17 novembru 2020 (TATOLI)–Ministériu Agrikultura no Peska (MAP) halo avaliasaun ba programa ministériu hanaran Hasa’e Produtividade Agrikultura Sustentável (HAPAS).

Sekretariu Jerál MAP, Çezar José da Cruz, hateten aktividade ne’e hodi halo evaluasaun ba progresu serbisu projetu HAPAS, ne’ebé konvida Administradór munisípiu neen hahú hosi Lospalos, Ainaro, Suai, Liquiçá, Ermera, no Oé-cusse.

“Programa ne’e, ninia progresu la’o kapas maibé maluk sira presiza kapasitasaun. Liuhosi HAPAS komunidade ne’ebé hala’o moris hanesan agrikultór bele hadi’a moris liuhosi apoiu fundu kiik,” Sekretáriu Jerál MAP hateten hafoin ramata reuniaun avaliasaun datoluk HAPAS, ne’ebé hala’o iha Timor Plaza, tersa ne’e.

Tanba ne’e mak Governu liuhosi MAP hetan apoiu hosi Banku Mundiál hala’o programa ne’e rasik, nune’e benefiáriu sira hetan rendimentu ba sira-nia uma kain.

“Ita hala’o ona iha tinan-rua, maski iha  difikuldade tanba situasaun COVID-19 inklui orsamentu ne’ebé mak la’o kleur oituan, maibé ita iha progresu no komunidade sente daudaun katak serbisu ne’ebé mak hala’o konsege hetan duni ninia benefísiu,” nia akresenta.

Governante ne’e espera grupu sira ne’ebé maka hetan formasaun ona bele iha rezultadu di’ak.

“Ninia vantajen ba komunidade maka Governu fó fundus kiik, ita fó dahuluk 30%, depende ba proposta hakarak hakiak manu, ikan, Bibi, Floresta no aktividade seluk ne’ebé mak sira halo, hafoin ekipa tékniku sira haree no halo verifikasaun hafoin mak bele hetan fundu hosi $2.000 no $3.000,” nia esplika.

Ministru Agrikultura no Peskas, Pedro Reis, husu ba ekipa MAP atu kontinua programa ne’e ba oin atubele kapasita no apoia agrikultór sira prodús no iha kreatividade haforsa ekonomia liuhosi agrikutura.

“Ha’u husu ekipa tékniku program HAPAS, presiza insentiva apoia ba povu agrikultór hodi prodús no kria kreatidade no bele benefisia sira-nia an, tanba programa ne’e bazeia ba relatóriu katak benefisia ona agrikutór balun, tanba ne’e tékniku presiza kontinua,” nia akresenta.

Iha fatin hanesan, Administradór postu administivu Zumalai, Caitano dos Santos Ribeiro, konsidera programa HAPAS   bele fó benefísiu ba komunidade sira, maibé  iha munisípiu Covalima rasik foin mak suku Rai-mean de’it mak asesu.

Iha kada grupu iha ema 15 to’o 30, konforme ba ema ninia kapasidade no koñesimentu

“HAPAS ho objetivu atu aprende hamutuk, ita grupu ida-ne’e reprezenta ema ida nune’e ba futuru ema bele hamrik mesak,” nia tenik.

Atividade ne’e fó koñesimentu kona-ba kria modo fatin, hakiak karau, halo manu luan, no seluk tan.

Nia rekoñese, serbisu hotu tenki iha dezafíu maibé la’ós atu halo hakiduk filafali, maibé rezolve no kontinua ba oin.

“Serbisu ho korajen, tanba iha ekipa ne’ebé mak sei tun ba terrenu, serbisu kuaze atu finaliza ona maibé hein filafali orsamentu ba faze daruak. Tuir loloos ha’u atu sai hotu ona no relatóriu orsamentu faze dahuluk ne’e tama tarde, maibé serbisu barak mak atu finaliza ona,” nia hatutan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here