DILI, 17 novembru 2020 (TATOLI) – Ekipa Lica-Lica Lemorai FC “liki-sai” AS Marca FC hosi jogu Tasa 12 Novembru, epoka ne’e, liuhosi suta penalidade ho score 5-3.
Iha jogu ne’ebé hala’o iha Estádiu Munisipál Dili, ohin loraik, Lica-Lica Lemorai FC ho AS Marca FC tenke termina sira-nia jogu liuhosi suta penalidade tanba durante minutu 90 parte rua joga empata 0-0.
Hosi suta penalidade ne’e obrigadu ekipa AS Marca tenke foti ain hosik hela jogu Tasa 12 Novembru tanba nia jogadór na’in rua falla atu suta golu. Enkuantu jogadór na’in lima hosi Lica-Lica konsege suta golu hotu.
Golu vitória Lica-Lica nian hirak ne’e marka hosi jogadór Ezaquel Moniz (34), Nilton de Carvalho (15), Nelson da Costa (24), Miguel Bareto (10) no João de Sousa (23). Nune’e, golu tolu Marca nian suta hosi jogadór David Mendonca (12), Olegario Nunes (33) ho Aris Tilman (11).
Hosi rezultadu ne’e, lori Lica-Lica hetan direitu absolutamente hakat ba jogu tuir mai. Enkuantu Marca tenke sai ona hosi Tasa 12 Novembru, epoka ne’e, hodi hein fali kompetisaun iha tinan oin.
Jornalista : Hortencio Sanchez
Editór : Francisco Simões