Casa Branca EUA. Imajen/Wikipedia

DILI, 17 novembru 2020 (TATOLI)–VIII Governu Konstitusionál kontinua hametin kooperasaun bilaterál ho Estadu Unidu Amérika (EUA) liuhosi Prezidente eleitu, Joe Biden ho ninia Vise-Prezidente, Kamala Harris.

“Ita parabeniza Prezidente eleitu, agora naturalmente país hotu inklui Timor-Leste buka atu hametin liután kooperasaun ho Estadu Unidu Amérika (EUA) iha área sira ne’ebé daudaun ita iha la’ós oituan no mós buka nakloke tan ba área seluk, ba interese mútua país no povu rua nian,” Xefe Governu hateten iha Pálasiu Prezidensiál, tersa ne’e, iha Bairro Pité.

PM Taur dehan, Governu no Estadu Timor-Leste nia foku atu kria relasaun di’ak entre nasaun no povu.

“Ita haree realidade, ita Timór mak benefisia liu ba apoiu Estadu Unidu Amérika nian, própriamente ita ba sira, tanba ne’e iha interese país atu kontinua hametin ita-nia relasaun independentemente ba sé de’it mak atu ukun,” nia akresenta.

Joe Biden no Kamala Harris, simu mandatu hosi povu amerikanu atu sai Prezidente no Vise-Prezidente 46, ba tinan haat.

Iha loron 7 novembru 2020, EUA realiza eleisaun demokrátiku no hetan rezultadu Joe Biden (Partidu Demokrátiku) no Kamala Harris hetan votu maioria ho totál 290 (50,7%), enkuantu Donald Trump hetan votu 214, (47,7%).

Prezidente no Vise eleitu ne’e sei hetan pose iha janeiru 2021 nia laran hodi asume knaar.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here