Ministru Petróleu no Minerál, Víctor da Conceição Soares. Imajen TATOLI/Egas Cristovão

DILI, 17 novembru 2020 (TATOLI)—Progresu ezekusaun tinan fiskál 2020 nian hosi Ministériu Petróleu no Rekursu Minerál (MPM) atinje ona 84.2% hosi montante orsamentu $27,651,475.00.

Notísia Relevante: MPM prioritiza rekursu petrolíferu no promove governasaun di’ak

“Ezekusaun orsamentu 2020 liuhosi rejime duodesimál to’o agora atinje 84,2%,” Víctor da Conceição Soares, esplika liuhosi audiénsia públika ho Komisaun C (Finansa Públika) no Komisaun D (Ekonomia no Dezenvolvimentu), iha plenária Parlamentu Nasionál, tersa ne’e.

Iha tinan 2020, Ministériu Petróleu no Minerál (MPM) nia orsamentu ho motante $27,651,475.00 (ezekusaun 84,2%) ne’ebé previstu ba saláriu no vensimentu $341,400 (86,6%) bens no servisu $611,074 (88,7%) no transferénsia públika $26,699,001 (95%).

Tuir portál transparénsia orsamentál katak hosi montante osramentu $27,651,475.00 ne’e hela saldu $1,758,902.91

Medida prinsipál setoriál 2020 ne’ebé ezekuta ona mak hanesan jere rekursu petrolíferu no minerál nomeadamente: implementa projetu Tasi Mane, promove kapasitasaun ba komunidade iha munisípiu ne’ebé impaktu direita iha projetu ne’e, kapasita rekursu umanu iha setór petrolíferu liuhosi atribuisaun bolsa estudu, dezenvolve mekanizmu ba utilizasaun gás naturál iha atividade ekonómika nasaun nian no masimizasaun investimentu iha setór petrolíferu no mineiru liuhosi estudu, peskiza iha nasaun seluk.

Nune’e mós sei Garante Inisiativa Transparénsia Indústria Estrativa sira (ITIE), asegura sinerjia, kooperasaun internasionál, iha ámbitu ba setór rekursu enerjétiku, kontinua peskiza no dezenvolvimentu petróleu, gás, terrestre, marítimu, dezenvolvimentu ba lejizlasaun adisionál, regulamentasaun vokasiona ba jestaun efisiente no transparente atividade sira hotu no esplorasaun rekursu petrolíferu no minerál.

Medida prinsipál daruak hosi MPM sei promove governasaun di’ak no jestaun institusionál iha Ministériu no servisu sira-ne’ebé dependente, fortalese instituisaun no eleva kapasidade rekursu umanu.

Hosi medida prinsipál 2020 nian hosi Ministériu Petroléu no Minerál (MPM) laiha diferénsia ho tinan fiskál 2021 nian.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here