Embaxador Korea do Sul iha Timor Leste, Lee Chin-Bum.Imajen TATOLI/Dok

DILI, 17 novembru 2020 (TATOLI) – Embaixadór Korea Súl mai Timor – Leste, Lee Chin-Bum, ohin, despede ona  Prezidente Repúblika (PR),  Francisco Guterres “Lú-Olo” tanba nia mandatu termina ona iha Timor-Leste.

Notísia Relevante : Governu TL agradese governu Korea Súl ba apoia Programa Saemaul Undong

“Ha’u halo ha’u nia misaun tinan tolu ona iha Timor – Leste. Misaun ida-ne’e remata ona, ohin, ha’u mai atu kumprimenta Prezidente Repúblika tanba aban ha’u fila ona ba Korea Súl,”  Lee Chin-Bum, informa ba jornalista sira hafoin despede ho Prezidente Repúblika iha Palásiu Prezidensiál, Dili.

Nia dehan, durante misaun iha Timor – Leste liuhosi Korea nia ajénsia KOICA halo kooperasaun ho governu Timor – Leste foka ba area oi-oin, maibé espesífiku liu ba area tolu mak hanesan, edukasaun, dezenvolvimentu rural, saúde no destakamentu traballadór timoroan iha Korea.

“Rezultadu ne’ebé durante hatudu iha ha’u nia misaun mak foin lalais iha area dezenvolvimentu rural no governu Timor–Leste komprometidu atu implementa programa hirak ne’e ba Planu Dezenvolvimentu Suku iha tinan oin hodi kontribui ba dezenvolvimentu iha area rural nian,” nia dehan.

Nia haktuir, durante reuniaun Prezidente Repúblika apresia ho kooperasaun ne’ebé durante ne’e nasaun rua halo ho susesu tebes iha area importante sira hanesan dezloka traballadór timoroan ba servisu iha Korea no seluk tan.

“Prezidente Repúblika mós esplika kona-ba kondisaun lei sira ne’ebé mak atu posibilita investor hosi rai-li’ur liu-liu Korea bele mai investe iha Timor – Leste no Prezidente Repúblika apresia ho servisu sira ne’ebé ha’u halo iha nasaun ne’e,” nia tenik.

Embaixadór foun ne’ebé atu substitui  Lee Chin-Bum, aban, to’o ona iha Timor – Leste hodi hametin kooperasaun nasaun rua ne’ebé iha ona.

“Embaixadór foun aban sei to’o ona Timor – Leste. Nia mós ema militár hanesan ha’u, nia sei kontinua kooperasaun ne’ebé agora halo hela no sei hametin no habelar liután relasaun di’ak entre Korea ho Timor – Leste iha futuru,” nia hateten.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here