Prezidente Repúblika (PR), Francisco Guterres "Lú-Olo", simu audiénsia Embaixadór Brunei Darusallam iha Timor-Leste, Adnan Bin Haji M. Jaafar, iha Palásiu Prezidensiál, Dili. Imajen/Mídia PR

DILI, 17 novembru 2020 (TATOLI) – Estadu no povu Brunei Darusallam hatudu nia kompromisu no prontidaun hodi apoia Timor-Leste nia adezaun ba ASEAN (Association of Southeast Asian Nations).

Kompromisu Brunei Darusallam nian ne’e afirma tan dala ida hosi Embaixadór Brunei Darusallam mai Timor-Leste, Adnan Bin Haji M. Jaafar, bainhira hasoru malu ho Prezidente Repúblika (PR), Francisco Guterres “Lú-Olo”, ohin, iha Palásiu Prezidensiál, Dili.

Hasoru malu ho PR Lú-Olo ne’e hanesan mós sorumutuk despedida nian tanba Embaixadór Adnan Bin Haji M. Jaafar, remata ona nia misaun diplomasia iha Timor-Leste durante tinan-rua nia laran ona.

Embaixadór Adnan Bin Haji M. Jaafar, hateten kooperasaun importante ne’ebé durante Brunei halo ho Timor – Leste mak apoiu Timor–Leste nia adezaun ba ASEAN, edukasaun, hasae koñesimentu iha area rekursu umanu no seluk tan hodi ajuda dudu Timor – Leste nia dezenvolvimentu.

“Ohin ha’u mai hasoru malu ho Prezidente Repúblika hodi hato’o despedida tanba ha’u nia misaun remata ona. Ha’u nia misaun durante tinan-rua iha ne’e, ha’u husu obrigadu tanba durante ne’e servisu iha Timor–Leste hodi hametin ita nia kooperasaun,” Adnan Bin Haji M. Jaafar hateten ba jornalista sira.

Nia dehan, Prezidente Repúblika apresia ho servisu embaixada Brunei iha Timor – Leste ne’ebé di’ak no relasaun entre rai rua metin liu-tan. Tanba ne’e, Embaixadór Adnan Bin Haji M. Jaafar, fiar bainhira embaixadór foun ne’ebé substitui nia nafatin hala’o servisu hodi hametin kooperasaun entre nasaun rua di’ak liután.

Jornalista   : Hortencio Sanchez

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here