Prezidente RAEOA-ZEESM,TL, Arsénio Paixão Bano. Imajen/Egas Cristovão

OÉ-CUSSE, 17 novembru 2020 (TATOLI)Prezidente Autoridade Rejiaun Administrativu Espesiál Oé-cusse Ambeno (RAEOA), Arsénio Paixão Bano, klarifika ba públiku katak inisiativa realiza jantar iha Aeroportu internasionál Rota do Sândalo Oé-cusse, hanesan maneira ida hodi promove aeroportu ba ema estranjeiru ne’ebé marka prezensa momentu ne’ebá.

“Prezidente autoridade ho ninia ekipa hakarak halo jantar hodi promove Aeroportu Oé-cusse, ne’e la sala buat ida no la’ós atu halo restaurante. Embaixadór ne’ebé marka prezensa iha jantár ne’e, apresia tanba ita iha aeroportu di’ak,” Prezidente Autoridade RAEOA hateten liuhosi konferénsia imprensa iha ámbitu abertura formasaun integradu sistema jestaun finanseira ba funsionáriu RAEOA, ne’ebé realiza iha salaun Aeroportu Rota do Sândalo, tersa ne’e.

Nia rekoñese, restaurante barak maibé halo han kalan iha aeroportu tanba diplomata sira seidauk hatene.

“Iha fatin-fatin restaurante iha, Dili de’it restaurante barak maibé ha’u no kolega sira deside ona halo jantár ida iha aeroportu tanba embaixadór sira nunka mai aeroportu,” nia akresenta.

Ema hamutuk na’in-30 maka partisipa iha jantar ne’e iha oras ida ho balun de’it.

“Hahú iha tuku 7 resin to’o tuku 9 kalan ramata ona, laiha dansa no laiha buat oinoin,” nia haktuir.

Tanba ne’e, Prezidente Autoridade RAEOA dehan públiku presiza hatene informasaun didi’ak.

Preokupasaun kona-ba autoridade la halo esforsu hodi hetan sertifikadu internasionál, tuir Arsénio, daudaun ekipa serbisu maka’as hela.

Foin lalais Autoridade RAEOA realiza jantar iha fatin check in Aeroportu Oé-cusse hamutuk ho embaixadór Koreia no komitiva.

Hafoin atividade ne’e lansa iha rede sosiál, públiku halo krítika maka’as.

Aeroportu internasionál Rota do Sândalo hahú konstrusaun iha tinan 2018 no inaugura iha loron 18 juñu 2019 hosi Prezidente Repúblika, Francisco Guterres ‘Lú Olo’, iha 18 juñu 2019.

Kustu ba konstrusaun pur volta millaun $120, ne’ebé konstrui hosi empreza Wijaya Karya, Tbk (WIKA) hosi Indonézia, ho ninia naruk pista metru 2.200, inklui ho fasilidade ne’ebé kualidade hanesan aeroportu internasionál.

Jornalista: Antónia Gusmão

Editora: Julia Chatarina

2 KOMENTÁRIU

  1. Justifikasaun ida-ne’e la konvense ema. Tuir ha’u-nia hanoin, sai maka presiza promove ne’e la’os aeroportu maibe fatin turistiku sira iha oekusi ka setor sira seluk hanesan agrikultura. Karik prezidente halo ida-ne’e automatikamente ema sei konese aeroportu tanba aeroportu maka odamatan, ne’ebe hakarak ka lakoi ema tenke liu. Ema sei la mai vizita oekusi tanba de’it ninia aeroportu nia furak, maske aeroportu mos, nu’udar odamatan presiza promosaun, maibe ema sei vizita oekusi tanba iha buat ruma maka dada sira. Obrigadu

HAKEREK NO HATÁN

Please enter your comment!
Please enter your name here