Fatuk Sinai ne’ebé lokaliza iha Suku Bene-Ufe, Sub-Distritu Nítibe, Rejiaun Administrativa Espesiál Oé-Cusse Ambeno (RAEOA). Imajen Tolas

DILI, 16 novembru 2020 (TATOLI)–Estadu Timor-Leste liuhosi Konsellu ba Delimitasaun Definitiva Fronteira Marítima (CDDFM-sigla Portugeza) sei halo negosiasaun ho Indonézia kona-ba Fatuk Sinai ne’ebé lokaliza iha Suku Bene-Ufe, Sub-rejiaun Nítibe, Rejiaun Administrativa Espesiál Oé-Cusse Ambeno (RAEOA).

“Ohin, sira (CDDFM) dehan ida-ne’e sei tama iha prosesu negosiasaun. Ne’e signifika iha Oé-Cusse fronteira rai ninian, ne’ebé Fatuk Sinai ne’e hanesan halo-parte iha prosesu negosiasaun fronteira marítima ninian maibé depende ba prosesu negosiasaun fronteira marítima entre Timor-Leste ho Indonézia iha aban bainrua,” Prezidente Komisaun B (Negósiu Estranjeiru, Defeza no Seguransa), Deputadu Agustinho Sequeira ‘Somotxo’, informa ba Agência TATOLI, iha Parlamentu Nasionál, segunda ne’e.

CCFDM mós informa ba Komisaun B kona-ba segimentu haat ne’ebé sei prosesu hela mak hanesan Naktuka no Fatuk Sinai.

Notísia relevante: Fatuk Sinai La Inklui Territóriu Timor-Leste

Somotxo hatutan, segimentu daruak mak hosi Batugade to’o Ataúro no illa sira ne’ebé to’o ba parte Lautém. Segimentu datoluk mak kosta-súl mak oeste-leste, ne’ebé leste ne’e liga Wetar to’o Papua.

Segimentu dahaat mak hosi Suai ba fali fronteira sira entre Timor-Leste, Indonézia no Austrália ne’ebé hetan akordu kle’ur ona seidauk ratifika maibé ne’e depende ba Austrália ho Indonézia.

“Ne’ebé, Fatuk Sinai ne’e tanba ligadu ba fronteira marítima, se fronteira marítima ne’e liña ida-ne’ebé mak sira estabelese hetan akordu, kuandu halo ratifikasaun konsterteza sei iha Indonézia nia laran, maibé iha prosesu negosiasaun mak sei deside,” nia katak.

Entretantu, Asistente Prinsipál Gabinete Fronteira Marítima, Roberto Soares lakohi komenta maibé fó de’it ba Prezidente Komisaun B, Deputadu Agustinho Sequeira ‘Somoxo’ mak ko’alia.

Jornalista: Evaristo Soares Martins  

Editór: Xisto Freitas

PUBLISIDADEiklan

2 KOMENTÁRIU

HAKEREK NO HATÁN

Please enter your comment!
Please enter your name here