Komandante Jerál PNTL, Komísariu Faustino da Costa. Imajen Tatoli/Egas Cristovao

DILI, 16 novembru 2020 (TATOLI)- Komandu Jerál Polísia Nasionál Timor-Leste (PNTL), ohin, iha Sentru Formasaun Polísia (CFP), Comoro, Dili, hala’o enkontru jerál ho komandante polísia munisípiu 12, inklui Rejiaun Administrativu Espesiál Oe-Cusse Ambenu (RAEOA) hodi halo avaliasaun ba servisu seguransa  nian durante tinan 2020 no avaliasaun mós ba servisu Polísia nian iha ámbitu implementasaun Estadu Emerjénsia (EE) da-hituk.

Iha enkontru ne’e, Komandante Jerál PNTL, Komisáriu Faustino da Costa, fó orientasaun no rona mós relatóriu hosi komandante munisípiu no komandante unidade-sira hodi haree kestaun seguransa nasionál no vizibilidade seguransa iha ámbitu implementasaun EE.

“Ita bolu komandante unidade no munisípiu-sira hotu mai iha ne’e para ita halo avaliasaun ba situasaun seguransa 2020 nian hanesan mós avaliasaun ida ba implementasaun Estadu Emerjénsia (EE),” Komisáriu  Faustino da Costa, informa ba jornalista.

Komandante Jerál PNTL  husu ba komandante unidade no munisípiu-sira atu halo kontrolu maka’as ba situasaun seguransa hodi minimiza problema ka kazu krime sira, inklui minimiza kazu asidente tráfegu no problema seluk tan.

Hafoin rona tiha relatóriu hosi komandante munisípiu sira, Komandu Jerál sei halibur fila fali relatóriu ne’e hodi halo konkluzaun para aprezenta ba Prezidente Repúblika no Primeiru-Ministru iha enkontru semanál nian.

Antes ne’e, Komisáriu Fuastino da Costa, hala’o vizita ba Bobonaro, Suai no Oe-Cusse, hodi haree diretamente servisu polísia nian ne’ebé halo kontrola iha liña fronteira sira no observa direita kondisaun Postu UPF, PNTL munisípiu no Unidade Polísia Marítima nian.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here