Komandante Jerál PNTL, Komisáriu Polisía Faustino da Costa. Imajen Tatoli/António Gonçalves

DILI, 16 novembru 2020 (TATOLI)—Komandu Polisía Nasionál Timor-Leste (PNTL), liuhosi Komandante Jerál PNTL, Komisáriu Polisía Faustino da Costa no Segundu Komandante, Komisáriu Mateus Fernandes, relata progresu ezekusaun Orsamentu Jéral Estadu (OJE) 2020 instituisaun ne’e ba Primeiru-Ministru (PM) no Ministru Interiór, Taur Matan Ruak.

“Ami mai hasoru Primeiru-Ministru hanesan mós Ministru Interiór hodi relata progresu ezekusaun orsamentu 2020 PNTL nian,” Komandante Jerál PNTL, informa hafoin ramata enkontru, iha Palásiu Governu, segunda ne’e.

Maski nune’e, Komisáriu Polisía ne’e la ko’alia kona-ba progresu no persentajen ezekusaun OJE ba instituisaun ne’e.

Komandante Jerál informa mós kona-ba dívida PNTL ne’ebé mak sei selu ho orsamentu tinan ne’e.

“Ami aprezenta mós kona-ba dívida, balun hahú selu ona, balun iha prosesu no ninia montante loloos atu selu ne’e ha’u la lembra. Dívida ne’e mak hanesan kombustível no manutensaun ba viatura ne’e,” nia subliña.

Aleinde ne’e, informa mós situasaun jerál iha territóriu inklui atividade polísia ninia, ne’ebé kada semana sempre hato’o ba Xefe Governu.

Hafoin rona informasaun, Xefe ezekutivu motiva nafatin membru Polísia sira atu kontinua halo serbisu ho di’ak.

“Primeiru-Ministru enkoraja nafatin ami atu presta serbisu di’ak liután ba povu no nasaun, serbisu balun di’ak ona maibé balun seida’uk di’ak tanba ne’e presiza hadi’a liután,” nia tenik.

Iha OJE 2020, Ministériu Interiór  (MI) prevee $13,759,432  no ba PNTL  $32,230,387, nune’e montante totál besik besik millaun $50.

MI nian $13,759,432 koloka ba iha saláriu vensimentu $5,980,755, bens servisu $5,878,678, transferénsia públika $1,900,000  no ba kapitál menór no kapitál dezenvolvimentu laiha.

Husi orsamentu ne’e  ba fahe ba  diresaun Seguransa Patrimóniu  Estadu  $2,597,710, Servisu Migrasaun $808,016, Programa Prevensaun  Konflitu Komunitáriu  $120,097, Protesaun Sivíl no Servisu Bombeiru $7,150, Boa Governasaun Jestaun Institusionál  $845,682,  Jestaun Risku Dezastre $3,708,919, saláriu vensimentu $5,671,858.

Proposta OJE 2020 ba PNTL nian hamutuk $32,230,387  koloka ba saláriu vensimentu $16,640,508, bens servisu $15,349,879, kapitál menór $240,000, kapitál dezenvolvimentu no transferénsia publika laiha (0).

Dívida hahú kedas governasaun sira antes, haree maka’as liu maka dívida telekomunikasaun Telemor selu CCTV ne’ebé mota iha estrada sira, selu telefone, manutensaun ba karreta milaun $2.

To’o setembru 2020, ezekusaun PNTL iha rejime duodesimál atinje 64% no orsamentu normál foin ezekuta efetivu iha novembru.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here