Objetu apreensaun hanesan motorizada hamutuk 31, bisikleta rua rai iha kontentór laran. Imajen Tatoli/Eugénio Pereira

DILI, 16 novembru 2020 (TATOLI)- Prokuradór Jerál (PGR) Distritál Dili no Komandu Polísia Munisípiu Dili, ohin, hala’o termu entrega ba motór apreensaun 31 ba Diresaun Nasionál Patrimóniu Estadu (DNPE) atu hala’o leilaun públiku.

Ai-kabelak nu’udar objetu apreensaun ne’ebé entrega ba DNPE atu halo lelaun ba públiku. Imajen Tatoli/Eugénio Pereira

Motór lubun ne’e, PGR ho PNTL deside halo leilaun tanba durante apreensaun  iha tinan hirak liubá to’o agora na’in la bá halo reklamasaun no la kumpre devér selu multa ba Estadu.

La’ós ne’e de’it, PGR ho PNTL mós entrega objetu  apreensaun seluk ba DNPE, hanesan  bisikleta rua (2), ai-kuadradu ho medida 5/7 hamutuk 107, Ai-kuadradu ho medida 5/10 hamutuk 213 ne’ebé parte PNTL halo apreensaun hosi kompañia nasionál balun ne’ebé hatama ilegál mai Timor-Leste iha tinan hirak liubá.

Objetu  hirak ne’e hetan ona desizaun hosi Tribunál Dili ho Nú. Exp 1243/07/20 katak, objetivu hirak ne’e afavór ba Estadu no entrega ba prokuradór hodi entrega fali ba Diresaun Nasionál  Jerál Patrimóniu Estadu (DNPE).

Adjuntu Prokuradór Jerál Repúblika, Alfonso Lopes,  hato’o agradese ba Komandu PNTL Dili ne’ebé halo identifikasaun ba objetivu prendidu-sira ne’e hodi aprezenta ba PGR hodi hato’o ba Tribunál Dili foti desizaun no fó autorizasaun hodi entrega evidénsia hirak ne’e ba DNPE.

Ai-balok nu’udár objetu apreensaun ne’ebé entrega ba DNPE atu halo lelaun ba públiku. Imajen Tatoli/Eugénio Pereira

“Bens-sira ne’ebé afavór ba Estadu tenke entrega ba DNPE tuir lista ne’ebé iha, tanba hetan desizaun finál hosi Tribunál hodi entrega ba Estadu,” Alfonso Lopes hateten iha Komandu Polísia, Caicoli, Dili.

Tuir nia haree katak, bainhira sasán ka objetu-sira ne’ebé PNTL halo apreensaun ne’ebé tama kategoria ba krime tenke rezolve tuir lei. Tanba ne’e, bainhira sasán-sira ne’e ninia problema rezolve iha tribunál bele sai nain ba Estadu hodi halo fali leilaun para rekupera fila fali prejuízu ba osan Estadu.

Iha fatin hanesan, Komandante PNTL Dili, Superintendente Xefe, Henrique da Costa dehan, sira-nia parte agradese ba servisu konjunta ne’ebé halo hodi entrega objetu apreensaun hirak ne’e ba Estadu.

Motór hirak-ne’e halo lelaun ba públiku. Imajen Tatoli/Eugénio Pereira

“Sasán evidénsia ne’e entrega bele fó espasu ba jardín Komandu PNTL nian bele livre uitoan, tanba fatin ne’e kloot agora komesa luan no livre ba membru sira atu hala’o servisu ho espasu  di’ak, tanba dala ruma motór hirak ne’e rai nakonu fali iha ne’e halo membru sira servisu ladún seguru bele afeta ba sira nia saúde,” nia hateten.

Serimónia entrega  evidénsia apreensaun  hirak ne’e hala’o ba daruak ona, no ba oin PNTL sei halo identifikasaun hodi entrega tan objetu sira seluk.

Superintendente Xefe, Henrique rekoñese objetu hirak ne’e balun rai to’o tinan 10 ba leten, halo motór barak ninia kondisaun fíziku sai fali hanesan besi tua, tanba PNTL Dili seidauk iha fatin ne’ebé seguru.

Evidénsia hirak-ne’e entrega liuhosi termu asina akordu entre parte Prokuradór Jerál Repúblika no Diresaun Nasionál Patrimóniu Estadu, hodi kontinua halo inspesaun direita ba evidénsia hirak ne’ebé asegura durante tinan barak iha kontentór lima ne’ebé rai iha arredores Komandu PNTL Dili.

Jornalista   : Eugénio Pereira

Editór        : Francisco Simões  

PUBLISIDADEiklan

HAKEREK NO HATÁN

Please enter your comment!
Please enter your name here