Prokuradór Jerál Repúblika, José da Costa Ximenes. Imajen Tatoli/Dok

DILI, 16 novembru 2020 (TATOLI)-Prokuradoria Jerál Repúblika (PGR), ezekuta ona Orsamentu Jerál Estadu (OJE) 2020 to’o porsentu 60 (%).

Notísia Relevante : PN aprova iha espesialidade orsamentu ba PGR $4,084,493

Proposta orsamentu  PGR  nian iha tinan fiskál 2020 ne’ebé hetan aprovasaun iha Parlamentu Nasionál  (PN) ho montante $4,084,493 hodi koloka ba saláriu vensimentu $1,903,635, bens servisu $1,609,242, kapitál dezenvolvimentu $571,616, kapitál menór ho  transferénsia públika laiha (-).

Orsamentu ne’e halo ajustamentu de’it ne’ebé hahú hosi janeiru to’o outubru aplika dotasaun orsamentu temporáriu, tanba ne’e, ho aprovasaun OJE 2020 hakotu ona aplikasaun duodesimu.

“Pelumenus  PGR nia ezekusaun orsamentu jerál to’o ona porsentu 60-ital. Maoria ezekuta ba saláriu vensimentu no servisu operasionál sira seluk,” Prokuradór Jerál Repúblika (PGR), José Ximenes, hateten hodi responde Agência Tatoli, ohin, iha Palásiu Prezidensiál, Dili.

José Ximenes dehan, ezekusaun orsamentu ba iha setembru to’o novembru PGR seidauk bele la’o tanba  iha dezafiu sistema lala’o.

“Durante hela fulan hirak ne’e orsamentu PGR  sei foku ba verba bens operasionál, ba atividade ne’ebé halo ona seidauk rezolve hanesan sosializasaun, notifikasaun kazu pendente, hamutuk ho PNTL fó formasaun iha area ne’ebé identifika,” José Ximenes informa.

PGR José Ximenes, garante orsamentu sei ezekuta ho di’ak  tuir alvu kompromisu ba atividade sira iha tempu badak. 

Jornalista   : Nelson de Sousa  

Editór        : Francisco Simões

HAKEREK NO HATÁN

Please enter your comment!
Please enter your name here