Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen Tatoli /Egas Cristovão

DILI, 16 novembru 2020 (TATOLI)-Ministra Negósiu Estranjeiru no Kooperasaun (MNEC), Adaljiza  Albertina Xavier Reis Magno, akompaña hosi Diretora Jerál MNEC ne’ebé trata asuntu ASEAN, Milena Rangel ho ekipa, ohin, hala’o enkontru ho Prezidente Repúblika (PR), Francisco Guterres ‘Lú-Olo’, hodi informa ka relata  kona-ba prosesu adezaun Timor-Leste nian  ba   ASEAN (Association of Southeast Asian Nations ).

Notísia Relevante : ASEAN Apresia ba TL Ninia Adezaun

“Enkontru ne’e  atu  relata ba  Prezidente Repúblika kona-ba TL nia prosesu adezaun ba ASEAN  ne’ebé daudaun lao di’ak loos,” Ministra Adaljiza  Albertina Xavier Reis Magno, informa ba jornalista sira hafoin audiénsia ho PR Lú-Olo iha Palásiu Prezidensiál, Dili.

Nia hatutan, hafoin iha simeira   iha loron hirak liubá hosi mudansa lideransa Vietnam ba Brunei  no iha okaziaun parte sira fó deklarasaun mak favorese loos ba Timor-Leste ninia prosesu ba adezaun.

“Portantu parte sira fó atensaun loos ba Timor-Leste nia preparasaun tékniku sira ne’ebé iha ona,” Adaljiza Magno hateten.

Iha loron 7 no loron 8 dezembru, tinan ne’e, haktuir Adaljiza Magno, sei  iha ultima reuniaun virtual kona-ba pilár ekonomia nian, portantu ida ne’e hotu esforsu tékniku nian hotu ona.

“Agora presiza maka oinsá halo esforsu polítika, ne’e duni ami mai tenta ko’alia ho Prezidente Repúblika no sei ko’alia mós  ho Primeiru-Ministru, Prezidente Parlamentu Nasionál,  nune’e bele iha asaun ida de’it, oinsá halo esforsu hamutuk iha area polítiku nian hodi aselera adezaun ita nian ba ASEAN,” Adaljiza Magno tenik.

Prezidente Repúblika suporta loos no kontente tebes ho progresu ne’ebé iha  no apoiu esforsu ne’ebé MNEC no liña ministerial halo. Nune’e, PR Lú-Olo prontu apoiu intermus polítiku hodi bele aselera prosesu ne’e.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here