Diretór Jerál Ministériu Administrasaun Estatál (MAE), Belarmino Filomeno Neves. Imajen Tatoli/Osória Marques

DILI, 16 novembru 2020 (TATOLI)– Ministériu Administrasaun Estatál (MAE) submete ona lista liña frente pesoál saneamentu, jestaun merkadoria inklui ho pesoál limpeza ezgotu (PLE) Munisípiu Dili nian ba Sekretariadu Tékniku COVID-19 nian iha Ministériu Finansa hodi prosesa.

“Semana kotuk ita submete ona lista liña frente ba Sekretariadu Tékniku COVID-19 nian iha Ministériu Finansa hodi prosesa nune’e ita-nia pesoál sira-ne’e bele simu ona sira-nia direitu,” Diretór Jerál MAE, Belarmino Filomeno Neves ba jornalista Agência TATOLI via telefónika, segunda ne’e.

Nia dehan, tuir loloos ne’e, MAE submete ona maibé fallansu bainhira halo verifikasaun ba sira-nia númeru IBAN konta bankária nian entaun sistema labele simu nune’e demora uitoan maibé MAE konsege ona  submete iha semana kotuk.

“Ita-nia ministru verifika (cek) ona. Bainhira sira haruka sira-nia IBAN konta bankária mak iha failansu uitoan iha dijit tanba IBAN ne’e iha dijit 23 de’it maibé sira tau fali pontu (.), entaun mosu fali dijit 24 nune’e sistema la simu,” Diretór Jerál haktuir.

Nia garante katak dezembru nia rohan osan ne’e bele sai ona tanba osan COVID-19 termina de’it iha 31 dezembru tinan ne’e.

“Hein katak fulan ne’e ho dezembru osan sai ona nune’e sira bele simu ona tanba osan COVID-19 funsiona to’o de’it 31 dezembru 2020. Maibé, se prosesu tarde mak osan laiha ona. Tanba ne’e, ita esforsu nafatin hamutuk ho Sekretariadu Tékniku COVID-19 nian hodi prosesu lalais asuntu ne’e,” Belarmino tenik.

Totál benefisiáriu ba liña frente hamutuk 600-resin kompostu hosi PLE, jestaun merkadoria, pesoál saneamentu inklui ho apoiu munisípiu hanesan xefe suku ho nia ekipa sira ne’ebé momentu kontrollu ba pasiente afetadu COVID-19 hosi nasaun viziñu ne’ebé mak hela kuarentena iha sira-nia suku laran.

Jornalista: Osória Marques

Editór: Xisto Freitas

HAKEREK NO HATÁN

Please enter your comment!
Please enter your name here