Komandante Jerál PNTL, Komisáriu Faustino da Costa. Imajen Tatoli/Egas Cristovão

DILI, 16 novembru 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, deklara dala-da tan  la tolera kualkér ajente polísia halai subar hosi Timor-Leste ba partisipa serimónia sa’e juramentu ba arte marsiál iha Atambua-Indonézia.

Notísia Relevante : Komandu PNTL Deklara Zero Toleránsia Ba Komandante Ne’ebé Jura Ba GAM

Komisáriu Faustino lamenta, ajente polísia balun  hakerek karta husu lisensa ba ninia komandante hodi ba partisipa fali serimónia sa’e sabuk ne’ebé konsidera violasaun ida ba regra dixiplina PNTL nian no la kumpre regra Estadu Emerjénsia (EE) da-hituk.

Ajente polísia ne’e rasik, hafoin fila hosi Atambua-Indonézia, Departamentu Justisa PNTL halo kedas investigasaun hodi hein reuniaun Konsellu Superiór Estraordináriu hodi foti desizaun.

“Klaru, ida-ne’e la’ós krime de’it, maibé ne’e violasaun ida ne’ebé labele tolera, tanba ita sei halo avaliasaun ba situasaun sira-ne’e hotu, tanba ita PNTL halo tolera dezde tinan kotuk hodi evita buat ne’ebé la nesesita kuandu sira hamosu fali buat ne’ebé kontra regra PNTL nian,” Komisáriu Faustino da Costa, hateten ba jornalista, ohin,  iha Sentru Formasaun Polísia (CFP), Comoro, Dili.

Maski la públika ka la temi sai oknum polísia ne’e nia naran, maibé Komisáriu Faustino dehan, onkum polísia ne’e sei kontinua hala’o hela ninia servisu normál to’o Konsellu Superiór PNTL foti desizaun.

Jornalista   : Eugénio Pereira

Editór        : Francisco Simões

1 KOMENTÁRIU

  1. Konkorda ho Komisariu nia hanoin. Maibe sujestaun ida mos maka atu iha kedas inisiu prosesu rekrutamentu, di’ak liu maka rekruta de’it maka ema ne’ebe seidauk tama ba grupu arte marsial, tanba dala barak ita haree, membru polisia ne’ebe envolve iha grupo arte marsial sempre iha tendensia parsial (defende ninia maluk) iha sira-nia atuasaun.

HAKEREK NO HATÁN

Please enter your comment!
Please enter your name here