Embaixadóra Estadu Unidu Amérika (EUA) mai Timor-Leste, Kathleen M. Fitzpatrick. Imajen Tatoli/António Gonçalves

DILI, 16 novembru 2020 (TATOLI)-Estadu Unidu Amérika (EUA) liuhosi nia Ajénsia Internasionál ba Dezenvolvimentu (USAID-sigla inglés), ohin, iha Timor Plaza, Dili, halo lansamentu ofisiál programa advokasia ba Governasaun di’ak durante tinan-lima (2020-2025).

Embaixadóra Estadu Unidu Amérika mai Timor-Leste, Kathleen M. Fitzpatrick hateten, objetivu hosi programa ne’e maka atu ajuda Organizasaun Naun-Governmental (ONG) lokál ki’ik sira atu hadi’a abilidade no ferramenta, fornese servisu advokasia sustentável ne’ebé bazeia ba evidénsia no aspirasaun sidadaun Timor-Leste (TL) nian.

“Ohin loron, onra boot ida mai ha’u, bele partisipa iha lansamentu ofisiál ba programa advokasia ONG ne’e, tanba iha  Estadu Unidu no Timor-Leste, haree ONG sira-nia papél krusiál iha advokasia ba direitu no nesesidade sidadaun hotu-hotu nian,” Kathleen M. Fitzpatrick hateten liuhosi nia diskursu bainhira halo lansamentu ofisiál ba programa advokasia ONG ba Governasaun di’ak.

Iha lansamentu ne’e EUA apoiu sosiedade sivíl liuhosi finansiamentu millaun $9,55 ba  ONG lokál ki’ik ualu ho objetivu atu haforsa sira-nia kapasidade ho organizasaun ba advokasia liuhosi programa asegura ambiente ne’ebé favoravel, haforsa kapasidade organizasionál, no peskiza.

“Atividade foun ba tinan lima ho fundu millaun $9,55 parte ida hosi USAID nia prioridade estratéjiku hodi ajuda Timor-Leste alkansa futuru ida ne’ebé nakonu ho dame no prósperu. Hametin aliserse demokrátiku no hasae partisipasaun síviku ne’e fundamentál hodi alkansa objetivu,” nia esklarese.

Nia subliña, USAID apoiu ONG TL tanba komprende katak sosiedade sivíl ida ne’ebé maduru no ho kapasidade aas nu’udar parseiru ida importante tebes ba lider governu-sira no komponente fundamentál ida ba sistema demokrátika saudavel.

“Atividade ne’e sei ajuda ONG Timoroan sira hetan abilidade no esperiénsia hodi sai defensór efikás ba sira-nia konstituinte-sira no hetan respeitu no sai parseiru di’ak ba governu iha formulasaun polítika no prosesu-sira monitorizasaun ba implementasaun,” nia tenik.

Nia esklarese, atividade espesífiku ne’ebé sei implementa hosi Counterpart International ba NGO lokál sira durante tinan lima maka hanesan;

  1. Dezeña peskiza profisionál, jera dadus ho kualidade no halo análize ho didi’ak.
  2. Dezenvolve rekomendasaun polítika forte-sira bazeia ba evidénsia.
  3. Komunika prioridade polítika sira ho efikás ba iha audiénsia oin-oin.
  4. Harii aliansa intersektorál sira ne’ebé dinámiku.
  5. Mantein relasaun ida ne’ebé metin ho sira-nia konstituinte iha baze.

Embaixadóra EUA iha Timor-Leste  ne’e tenik ho abilidade hirak ne’e, ONG sira bele dezempeña ho di’ak liután nia papél fó apoiu ba inisiativa hirak ne’ebé mai hosi sidadaun-sira, hasae liután sensibilizasaun kona-ba problema importante-sira, hadi’ak liután partisipasaun komunidade nian iha governasaun, no haforsa governu nia efetividade no responsabilidade.

EUA hakarak  apoiu TL tanba iha relasaun bilateral ho Timor-Leste dezde nia independénsia no servisu maka’as hodi lori programa hirak signifikativu no iha impaktu ne’ebé aliña ho Governu TL nia prioridade sira.

Iha fatin hanesan Espesialista Jestaun ba Projetu USAID iha Timor-Leste, Ana Guterres, hateten USAID apoiu ONG lokál sira tanba durante ne’e haree katak ONG sira servisu di’ak ona tanba ne’e USAID mai atu haforsa de’it sira-nia kapasidade.

“Ha’u sente ita-nia organizasaun ONG sira durante servisu di’ak ona, tanba ne’e USAID mai atu haforsa de’it kapasidade ne’ebé sira iha tiha ona, atu liga metin sira liután konstituinte sira iha baze no atu haforsa tan sira-nia kapasidade administrasaun organizasaun no mós tékniku,” Ana Guterres subliña.

Biban ne’e, Diretór Forum Organizasaun Naun-Governamentál Timor-Leste (FONGTIL), Daniel dos Santos hateten, ONG Forum kontente tanba ohin FONGTIL bele partisipa iha lansamentu advokasia ONG nian ne’e hanesan oportunidade boot ida.

“Ami-nia  kontente  labele to’o iha ne’e de’it,  maibé oinsá maka ba oin ita iha koordenasaun ne’ebé di’ak atu hakbiit ba malu iha prosesu implementasaun servisu sira,” nia tenik.

Organizasaun Naun-Governamentál ualu ne’ebé hetan apoiu fundu hosi USAID atu implementa programa advokasia ONG atividade ba Governasaun di’ak maka hanesan, ONG Belun, JSMP (Judicial System Monitoring Program), Fundasaun Mahein, Many Hands One Nation Foundation (MAHON), Programa Espesífiku fó Prioridade ba Ema Ki’ak (PROSPEK), Community Based Rehabilitation Network Timor-Leste (CBRNTL), Funsaun Hafoun Timor Lorosa’e (FHTL) no Mata Dalan Institute.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here