Prezidente Komisaun B PN, José Agostinho Sequeira ‘Somoxo’. Imajen dok. Tatoli

DILI, 16 novembru 2020 (TATOLI)—Konsellu ba Delimitasaun Definitiva Fronteira Marítima (CDDFM-sigla portugeza) lideradu Kay Rala Xanana Gusmão, kontinua fó prioridade ba fronteira terrestre no marítima ho Repúblika Indonézia.

Konsellu ba Delimitasaun Definitiva Fronteira Marítima ne’e iha Gabinete Primeiru-Ministru nia okos, hodi halo negosiasaun ba tratadu kona-ba delimitasaun definitiva fronteira marítima ho Commonwealth Austrália. Konsellu ne’e harii bazeia ba Dekretu-Lei n.º 2/2015, 14 janeiru.

“Konsellu propoin orsamentu millaun $1-resin no mantein programa ne’ebé antes ne’e iha ona no sira kontinua halo negosiasaun ho estadu Indonézia kona-ba fronteira marítima no terrestre,” Prezidente Komisaun B (Negósiu Estranjeiru, Defeza no Seguransa), Deputadu Agustinho Sequeira ‘Somotxo’, informa ba Agência TATOLI, iha Parlamentu Nasionál, segunda ne’e.

Notísia relevante: KM Nomea Xanana Hanesan Reprezenta Estadu Ba Negosiasaun Fronteira Terestre

Purtantu, iha audiénsia públika ne’e lidera hosi Asistente Prinsipál Gabinete Fronteira Marítima, Roberto Soares.

Bazeia ba livru 2 (planu asaun anuál) previstu medida prinsipál setoriál hosi CDDFM tinan fiskál 2021 mak kontinua negosiasaun hodi asegura fronteira terrestre no marítima  ho Indonézia, reforsa pozisaun Gabinete Fronteira Marítima nu’udar sentru eselente kona-ba kestaun fronteira marítima.

Nune’e mós implementa  tratadu fronteira marítima entre Timor-Leste no Austrália no promove boa governasaun, jestaun institusionál no fortalese kapasidade rekursu umanu iha CDDFM.

CDDFM propoin montante orsamentu $1,043,686 ba tinan fiskál 2021, ne’ebé koloka bens servisu $1,043,686, laiha montante ruma prevee ba kategoria orsamentál sira seluk.

Hosi montante orsamentu ne’e koloka ba programa ho kódigu 030 (asegura fronteira terrestre no marítima permanente ho Indonézia sei gasta  $545,113, programa ho kódigu 152 (estabelese Gabinete Fronteira Marítima nu’udar sentru eselente kona-ba fronteira marítima no  jurizdisaun marítima Timor-Leste – Ekonomia Azúl, ne’e sei gasta $137,211.

Aleinde ne’e, programa ho kódigu 510 kona-ba boa governasaun no jestaun institusionál, ne’ebé sei gasta $361,362.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here