Prezidente KKFP, Juvinal Dias. Imajen/Espesiál

DILI, 16 novembru 2020 (TATOLI)—Konsellu Konsultivu Fundu Petrolíferu (CCFP-sigla portugeza) husu Governu no Parlamentu Nasionál atu halo avaliasaun proposta orsamentu millaun $14 ba Ró Haksolok iha orsamentu 2021.

Prezidente CCFP, Juvinal Diaz hateten alokasaun orsamentu labele liuhosi kategoria orsamentál transferénsia públika.

Nia esplika, proposta orsamentu 2021 iha millaun $60 ne’ebé atu aloka ba RAEOA, millaun $31 ba Fundu Espesiál Dezenvolvimentu, ne’ebé hakerek iha previstu iha livru 3C (RAEOA-ZEESM).

“Hosi millaun $31 ne’e millaun $14 ba sosa (finaliza) Ró Haksolok. Iha ami-nia paresér ohin mensiona momoos katak presiza avalia filafali despeza hirak-ne’e tanba ho razaun katak ita foin gasta millaun $20 ba sosa ró ida-ne’e to’o ohin loron ninia paradeiru la klaru. Tuir ami-nia opiniaun, ita presiza duni ró maibé presiza iha ezersísiu polítiku ida hodi ita bele hatene katak ida uluk millaun $20 ne’e tanbasá la konsege lori fila ró mai Timor,” Juvinal Diaz ko’alia asuntu ne’e bainhira hala’o audiénsia públika ho Komisaun C (Finansa Públika) no Komisaun D (Ekonomia no Dezenvolvimentu) iha plenária, segunda ne’e.

Notísia relevante: RAEOA propoin millaun $127 inklui millaun $14 finaliza Ró Haksolok

Purtantu, iha livru 3C (RAEOA-ZEESM), ne’ebé Prezidente RAEOA, Arsénio Bano aprezenta ba Parlamentu Nasionál prevee mós rúbrika keta ketak ida ho naran Fundu Espesiál Dezenvolvimentu (FED) ho montante $14,000,000.00 ba ezekuta hodi finaliza konstrusaun Ró Haksolok.

Bazeia ba livru 3C (RAEOA-ZEESM) previstu iha $127,000,000 ba 2021 ne’ebé koloka ba  saláriu vensimentu $11.072.049,00, bens servisu $23.775.569,00, kapitál minór $2.360.470,00, kapitál dezenvolvimentu $85.506.102,00 no transferénsia públika $4.285.810,00.

Saláriu vensimentu

Despeza ba kategoria saláriu vensimentu hamutuk $11,072,049 hodi asegura saláriu no oras extraordináriu ba funsionáriu hamutuk ema na’in-2,475 ne’ebé dezagrega iha Gabinete Prezidente Autoridade, Adjunta Prezidente Autoridade hodi reforsa institusionál, Adjuntu Prezidente Autoridade ba asuntu sosiál no sekretária rejionál na’in-7 iha RAEOA no ZEESM.

Bens servisu

Nune’e mós despeza ba kategoria bens servisu $23,775,569.00 hodi asegura kustu operasionál ba Gabinete Prezidente Autoridade, Adjuntu Prezidente Autoridade no Sekretáriu Rejionál sira hodi implementa programa ka atividade iha RAEOA no ZEESM-TL.

Kapitál minór

Entretantu kapitál minór hamutuk $2,360,470.00 ba tinan 2021 atu asegura kondisaun bázika ba Gabinete Prezidente Autoridade no  Gabinete Sekretária Rejionál sira ba sosa karreta ambulánsia, kareta tanki bee-moos, karreta operasionáll, komputador/laptop, printer, mákina fotokopia, mobiliáriu, AC no seluk tan.

Kapitál dezenvolvimentu

Enkuantu, kapitál dezenvolvimentu hamutuk $85,506,102 ba 2021, hosi montante refere, RAEOA no ZEESM-TL prevee orsamentu $56,262,790 hosi likides própriu no Governu Sentrál sei aloka montante $29,243,312 mai hosi Fundu Petrolíferu hodi finánsia no asegura obra sira ne’ebé la’o hela no mós ba obra foun tuir prioridade VIII Governu Konstitusionál nian.

Transferénsia públika

Iha parte transferénsia públika hamutuk $4,285,810.00 hodi asegura kustu ne’ebé ho natureza subvensaun públika. Liña rúbrika ida-ne’e nu’udar responsabilidade tomak ba Prezidente Autoridade hola desizaun ba despeza.

Fundu espesiál dezenvolvimentu

Proposta RAEOA nian ba 2021 previstu tan kategoria ida ho naran Fundu Espesiál Dezenvolvimentu (FED) ho montante $14,000,000.00 ba ezekuta hodi finaliza konstrusaun Ró Haksolok.

“Ho nune’e bele fó retornu finanseiru mai iha RAEOA no ZEESM-TL. Orsamentu ba FED ho valór millaun $14 engloba ona iha kategoria kapitál dezenvolvimentu,” refere livru 3C (RAEOA-ZEESM), ne’ebé hetan asinatura hosi Ministra Finansa Interina atuál Vise-Ministra Finansa, Sara Lobo Brites.

Entretantu, proposta orsamentu $14,000,000 ne’e hosi $85,506,102 ne’ebé previstu iha kategoria orsamentu kapitál dezenvolvimentu RAEOA nian.

Jornalista: Evaristo Soares Martins

Editór: Xisto Freitas

1 KOMENTÁRIU

  1. Husu ba Agencia atu halo verikifasaun ba vacina ne’ebe oras ne’e ita uza halo peskija karik ema ruma ne’ebe vacina ona reaksaun balu ne’ebe la diak ou fo impaktu ruma ba ema nia saude halo favor fo sai tamba iha media Internasional GMN dia 16/14/2021 hatenen mos katak iha America oras ne’e iha plano atu hapara vacina refere tamba nia reasaun ba ema nia saude as tebes. obrigado.

HAKEREK NO HATÁN

Please enter your comment!
Please enter your name here