FOTO HAMUTUK-AKSJ-USTL no GDF, foto hamutuk ho estudante EBF Ualaque hafoin halo asaun karidade. Imajen espesiál

DILI, 16 novembru 2020 (TATOLI)—Alumni Koléjiu São José 2010 (AKSJ) 2010 hamutuk ho alumni United States Timor-Leste (USTL) no Graduate Degree Fellowship (GDF) halo servisu komunidade iha Eskola Bázika Filiál (EBF) Ualaque, aldeia Sana, suku Uaitame, postu administrativu Uato-Lari, munisípiu Vikeke, hodi komemora loron nasionál ba joven sira.

Tuir nota imprensa ne’ebé TATOLI simu, ohin, haktuir tulun ne’ebé oferese hanesan moxila, eskova kose nehan, kadernu, lapizeira, meza, no kadeira natoon ba estudante sira no mós roupa uzadu ho kondisaun di’ak.

Programa ne’e hetan suporta husi grupu alumni CSJ, Embaixada Estadus Unidos Amerika (EUA), Banku Nasionál Komérsiu Timor-Leste (BNCTL, sigla portugés), Timor Telecom, Telkomcel, apoiu anónimu, no seluk tan.

“Ami tenta atu realiza servisu karidade tinan ida dala ida tuir ami-nia kbiit no kapasidade finanseira, tinan ne’e espesiál tebes mai ami-nia grupu, tanba marka ona 10 depois ami akaba estudu husi Colegio de São José”, katak koordenadora alumni, Imelda Carlos iha komunikadu ne’e.

EBF Ualaque, harii iha 2002 ho inisiativa komunidade rasik, luan hosi eskola ne’e maizumenus 200 m2, distánsia husi uma komunidade kuaze metru 250.

Tuir informasaun ne’ebé relata husi jerente EBF Ualaque, 2009 eskola refere simu ona pakote emerjénsia husi kompañia Saebeka hodi hadi’a uitoan kondisaun eskola refere maske la melloradu no laiha mudansa signifikativu ba ninia parte estrutura fízika.

Tuir survey pre-limináriu ne’ebé mak hala’o husi ekipa alumni AKSY 2010 iha loron 5, Setembru 2020, identifika kondisaun fíziku eskola refere hahú aat no degrada, nune’e difikulta tebes estudante sira nia prosesu aprendizajen liu-liu iha tempu udan no anin boot.

Ekipa mós observa fasilidade bázika ba estudante no professór sira inklui professor na’in haat de’it, meza no kadeira menus tebes, tanba ne’e husi total estudante 80 resin (maioria tur de’it iha rai), laiha bee no saneamentu hodi fasilita sira nia prosesu aprendizajen.

Koordenadór EBF Ualaque, Venceslau Martins, katak desde tinan 18 eskola ne’e seidauk hetan apoiu ruma husi parte kompetente.

“Eskola ne’e iha de’it sala tolu hodi akomoda estudante hahú husi primeiru anu to’o sestu anu, laiha sala professor, kadeira no meza la to’o ba estudante sira, biblioteka no eletrisidade mós laiha”, haktuir.

Reprezentante estudante EBF, Estevão Vicente (6a turma), hateten ladún kontente ho kondisaun eskola ne’e.

Tuir Xefe aldeia, Raul Freitas, kondisaun eskola ne’e dala barak bele fó ameasa ba labarik sira, liu-liu sira nia seguransa bainhira halo hela prosesu aprendizajen.

Haree ba situasaun ne’e, AKSJ 2010 hola inisiativa hodi kolabora ho alumni USTL no GDF buka fundu no akumula rekursu oin-oin hodi responde ba kondisaun ne’ebé estudante no profesór EBF Ualaque hasoru. (ki)

PUBLISIDADEiklan

HAKEREK NO HATÁN

Please enter your comment!
Please enter your name here