Ministru Joaquim Amaral ho nia kometiva foto ho traballadór no na'in ba kompañia VECOM iha Fuiloro, Titilari, Lautem, domingu (15/11/2020). Imajen/Mídia MCAE

LAUTEM, 15 novembru 2020 (TATOLI) – Kompañia lokál VECOM  baze iha Suku Fuiloro, Postu Administrativu Lospalos, Munisípiu Lautem, hakiak manu lokál   ho kuantidade rihun 100-resin hodi fornese mai supermerkadu haat iha Dili laran, hanesan Lita Store, Leader ho W-Four (W-4).

VECOM hakiak manu lokál dezde tinan 2018 ho alvu fa’an ba komunidade sira iha area jurizdisaun Munisípiu Lautem. Maibé Brígida Correia, nu’udár   na’in ba kompañia haree katak merkadu iha Dili mós bele sai alvu distribuisaun manu-sira ne’ebé hakiak.

“Durante ne’e ami fornese manu ba Supermerkadu  Lita Store, Leader W-Four, inklui kompañia balun ne’ebé fornese hahán ba Parlamentu Nasionál, Ministériu Finansas, Komponente Naval FALINTIL-Forsa Defeza Timor-Leste iha Hera no Metinaro,” Brígida Correia hateten ba jornalista bainhira simu vizita  Ministru Koordenadór Asuntu Ekonomia (MCAE), Joaquim Amaral  ho nia komitiva iha nia fatin hakiak manu, domingu ne’e.

Nia dehan produtu ne’ebé sira prodús sufisiente ona. Tanba ne’e nia husu ba Governu atu bele ajuda nia haluan tan merkadu atu nia bele distribui manu hirak nia hakuak ba merkadu.

VECOM  mós hetan ona kontaktu hosi kompañia internasionál balun iha Hongkong atu bele halo esportasaun ba merkadu Hongkong nian.

“Ami hetan ona kontaktu ho kompañia balun iha Hongkong atu esporta na’an manu ba, mas ami sei haree no tetu didi’ak molok halo esportasaun. Manu ne’ebé ami hakiak bele sufisiente ona hodi halo esportasaun mas ami sei ko’alia didi’ak lai ho nia presu,” Brígida hateten.

Kompañia VECOM mezmu sei ki’ik, maibé absorve ona traballadór lokál na’in-11 ho sira-nia saláriu mensal purvolta $150,00 to’o $250,00.  Iha mós traballadór kazuál ne’ebé selu sentavu 25  bainhira  hamoos hotu manu-ida nia fulun.

Ministru Joaquim Amaral  haree diretamente atividade investimentu ne’ebé hala’o husi kompañia VECOM no enkoraja ba VECOM atu kontinua hala’o servisu ho di’ak maske enfrenta  dezafiu sira relasiona ho ameasa peste letál  COVID-19.

Jornalista: Hortencio Sanchez

Editór: Francisco Simões

HAKEREK NO HATÁN

Please enter your comment!
Please enter your name here