Sobrevivente 12 novembru no atuál Xefe Suku Uabubo, Ossú, Viqueque, Joanico Maria Alves. Imajen/Espesiál,

OSSÚ, 15 novembru 2020 (TATOLI)—Horisehik luta ba hadau ukun rasik-aan liuhosi halo manifestasaun 12 novembru 1991 ne’ebé halo nia sai hanesan sobrevivente ida, ohin loron nia prontu nafatin kontribui ba dezenvolvimentu nasionál liuhosi kaer kargu nu’udar xefe suku iha Suku Uabubo, Postu Administrativu Ossú, Munisípiu Viqueque.

“Ba ha’u-nia aan rasik, ha’u iha konsiénsia no responsabilidade atu kontribui nafatin ba rai ida-ne’e. Tanba ida-ne’e duni mak uluk ita luta hasoru invazór sira. Kuandu invazór sira hateten ba ita katak ita la hatene buat ida, halo de’it daun suku roupa mós lahatene maibé hakarak ukun aan, ita barani atu luta hasoru sira. Tanba ne’e, ita tenke kaer nafatin prinsipiu ida-ne’e, ita presiza duni kontribui buat di’ak ruma ba rai ida-ne’e tuir ita-nia forsa. Nu’udar sidadaun ida no nu’udar sobrevivente ida, ha’u iha duni dever hodi nafatin fó ha’u nia kontribuisaun ba rai ida-ne’e,” dehan sobrevivente 12 novembru, Joanico Maria Alves, ba Agência TATOLI iha ninia rezidénsia Ossú, domingu ne’e.

Atu kontribui ba prosesu dezenvolvimentu rai ida-ne’e nian, Joanico Maria Alves hatutan, konforme ba konsiénsia ema ida-idak nian atu bele kontribui buat ruma ba nia rain. Nu’udar sidadaun ida di’ak, nia husu, liuliu ba timoroan sira-ne’ebé sei iha banku estudu nian atu aproveita tempu ho di’ak atu estuda, atu bele kapasita sira-nia aan ho siénsia no teknolojia oioin.

Nia dehan, ba ba timoroan sira-ne’ebé servisu ona buka atu dezenvolve aan iha área ida-idak nian, uza sira-nia kreatividade nu’udar ema nasionalizmu ida hodi labele hanoin atu iha ema balu gava ona mak foin halo di’ak.

“Kuandu ita-nia servisu di’ak, ita iha responsabilidade ba ita-nia serbisu, mai ita bele dezenvolve ita-nia rain ho di’ak. Ne’ebé, kabe ba ema ida-idak nia konsiénsia atu bele kontribui ba ira ida-ne’e nia dezenvolvimentu ho di’ak. Se la iha konsiénsia no responsabilidade mak ita lahatene ita nia rai-ne’e atu sai halo nusá no ita-nia povu ne’e atu ba iha ne’ebé,” sobrevivente Masakre Santa cruz ne’e fó hanoin.

Nia haktuir, konsekuénsia hosi ninia involvimentu iha manifestasaun 12 novembru 1991 mak to’o oras ne’e iha ninia ain no knotak ne’e kilat-musan sei haknuuk iha laran. Maibé, nia informa, liuhosi médiku sira-nia esfosru lori nia konsege opera no to’o ohin loron nia sei bele kontribui buat ruma ba rai-lulik Timor-Leste liuhosi kaer kargu nu’udar xefe suku no hanesan sobrevivente ida.

Sobrevivente 12 novembru no atuál Xefe Suku Uabubo, Joanico Maria Alves. Imajen/Espesiál,

“Ha’u konsege opera duni tempu hirak kotuk ba. Grasa de Deus, médiku sira kala hasai tiha balu. Iha tinan 2012, ha’u ba konsulta iha Ospitál Nasional, hasai X-Ray, iha ha’u-nia isin parte kabun ne’e, bala musan nakfera tiha ona hanesan rai-henek no ha’u nia isin sira kaer metin tiha ona. Nune’e, iha tinan ne’e duni, ha’u ba konsulta iha Surabaya. Momentu ne’e, médiku sira sujere atu labele opera tanba se opera karik, ha’u tenke tuur ona iha kadeira roda. Maibé, grasa de Deus, agora ha’u sei bele la’o no sei bele kontribui buat ruma ba rai ida-ne’e, iha ha’u-nia moris hanesan sobrevivente ida,” nia dehan ho esperansa nakonu.

Entretantu, nia hatutan, komparasaun entre joven sira agora ho joven sira uluk, joven sira agora hanesan kria tiha fila-fali divizaun entre sira no sira fahe malu iha grupu sosiál, grupu polítika, haketak malu iha organizasaun arte marsiál oioin ne’ebé mak sai hanesan fatór ka impaktu ida hodi impede atu hala’o prosesu dezenvolvimentu iha Timor-Leste.

“Joven sira agora hanesan kria tiha fila-fali divizaun entre sira no sira fahe malu iha grupu sosiál, grupu polítika, haketak malu iha organizasaun arte marsiál oioin. Situasaun sira hanesan ne’e hatudu hanesan fali ita la’ós ona hanesan timoroan iha ita-nia rain rasik. Situasaun ida-ne’e duni mak sai tiha hanesan fatór ka impaktu ida hodi impede atu hala’o prosesu dezenvolvimentu iha ita-nia rain. Tanba ho divizaun sira-ne’e bele hamosu instabilidade iha ita-nia rain,” nia hateten.

Iha parte seluk, tuir niaa, joven sira seluk hakarak dezenvolve sira-nia kreatividade ka talentu ne’ebé sira iha maibé tanba joven sira seluk gosta hamosu situasaun barullu iha fatin-fatin entaun impede mós atividade di’ak sira ne’ebé joven seluk hakarak hatudu. Nia fó hanoin, joven sira uluk ne’e sempre unidu iha kualkér asaun kontra inimigu, enkuantu joven sira agora gosta fahe malu iha grupu oioin.

Istória involve iha manifestasaun 12 novembru

Sobrevivente 12 novembru no atuál Xefe Suku Uabubo, Joanico Maria Alves, hamutuk ho ativista Australiano sira antes Konsulta populár 1999. Imajen/Espesiál,

Sobrevivente 12 novembru 1991, Joanico Maria Alves, hanesan sobrevivente ida-ne’ebé durante tinan barak nia laran eskollidu nu’udar líder lokál ba Suku Uabubo, involve mós iha manifestasaun ne’ebé hamosu masakre ida ne’ebé koñesidu ho naran Masakre Santa Cruz. Joven ne’ebé moris iha Ossú, iha loron 17 fulan janeiru tinan 1971 ne’e, uluk tuir manifestasaun Santa Cruz ho idade tinan 20 bainhira nia sei tuur hela iha kelas III SLTA nian iha SMAK Hati Kudus Yesus Becora, Dili.

Iha komemorasaun Masakre Santa Crúz ba dala-XXIX no loron Nasionál Juventude ba dala-15 ne’e, sobrevivente Masakre Santa Cruz ne’e haktuir ninia istória memória pasada sai hanesan reflesaun ida ba juventude sira ohin loron atu atu refleta;

Ha’u-nia involvimentu ba prosesu libertasaun ne’e la apenas iha loron 12 fulan novembru tinan 1991 de’it. Maibé antes ne’e, ha’u involve aan ona iha atividade klandestina hamutuk ho família no kolega sira hodi kontribui daudaun ona ba prosesu luta ida-ne’e. Hahú kedas hosi tinan 1990, ha’u involve ona iha atividade oioin no halo enkontru sekreta sira iha Pantai Kelapa (Praia dos Coqueros Dili). Tanba iha Pantai Kelapa ema deskobre ami-nia atividade entaun ami tenke halai sa’e fali ba iha Lahane (iha fatuk ku’ak ida iha Ospitál Lahane nia okos) hodi prepara espanduk no sasán sira ba demonstrasaun nian.

Iha 12 novembru nian, ami iha bairru Akadiru-Hun nian serbisu hamutuk ho maluk sira hosi Kulu-Hun nian hanesan José Mina, Chiquito Panglima, Pedro Ikan Fafuluk no selseluk tan. Ho sira mak ami prepara espanduk no vanderola sira iha uma Akadiru-Hun hamutuk ho ha’u-nia maun alin uma laran rasik hanesan Acay, Rolando, Nino ho primu Natalino, irmaun Elvino (adjuntu PNTL Ossú), irmaun Sergio da Silva (Diretór Taliti) no primu Merício (agora iha Irlanda), kolega Afonso (adjuntu Polísia Tranzitu iha Dili), matebian Bernardino, kolega Jeca Uaguia, ami hamutuk prepara materiál sira.

Loron ida antes Masakre Santa Cruz, komu ha’u tama mós iha estrutura OSIS iha SMAK Hati Kudus Becora, entaun ami komesa fó informasaun hosi ibun ba ibun atu tuir misa iha dia 12 novembru nian. Ami la brani halo anunsiu abertu tanba ta’uk inimigu sira deteta planu no bele kansela fali asaun ida-ne’e. Hamutuk ho irmaun Lino Saldanha (eiz komandante UPM ne’ebé mate foin daudaun ne’e), ami halo finje husu kontribuisaun osan ba kolega sira atu hola Aqua ruma ba ekipa futeboll Hati Kudus nian, maibé hodi duni osan sira-ne’e mak ami hola hena no tinta atu halo espanduk sira. 

Iha 12 novembru dadeersan de’it, ami (maun alin, primu no feton sira inklui ha’u nia tiun Ricardo) ami sai hamutuk ba Motael atu tuir misa. Sai hosi Motael, ami kuandu la’o ona to’o Acait nian (eiz Kodim Dili), iha momentu ne’ebá, komu bapa sira mai atu hadau bandeira hosi ita-nia maluk buibere ida no baku tan ita-nia feton, entaun situasaun komesa rungu-ranga ona. Balu sona bapa ne’e maibé kolega balu mós buka atu salva nia. Kuandu ami la’o to’o iha CCD nian oin (eiz merkadu lama), ami haree polísia sira iha Polres nian ne’e kaer kilat ho pozisaun atu tiru. Maibé ami kontinua la’o ba hodi to’o iha simitériu Santa Cruz. Kuandu to’o iha rate, ami haruka maluk feto sira, labarik ki’ik balu no sira ne’ebé ladún forsa ne’e, tama hotu ba rate laran. Enkuantu ami mane sira forte ne’e hotu hamriik iha li’ur hodi halo seguransa no maluk balu sa’e ba simitériu nia portaun leten hodi loke espanduk no bandeira sira.

 Foufoun, bapa sira ho karreta Hino isin ida tuun hosi dirasaun Taibesi nian tuun mai rate nian, ami hamnasa no haklalak ba malu maibé bapa sira mós liu tiha de’it. La kle’ur iha tan pelotaun ida-ne’ebé ho kilat kompletu, sira halai dadeersan nian no halai tuun duni iha rate nia oin. Kuandu sira to’o iha rate oin, sira la halai ona maibé sira mai loos de’it ona ami. Nune’e, ami koko satan netik atu sira labele tama. Maibé ami komu dudu-malu maka’as ona ho bapa sira, entaun kolega Justianu (eis seminarista ida hosi Likisá), nia ba dada malu ho bapa ne’e nia kilat. Komu hanesan ne’e, entaun bapa ne’e konsege dada nia kilat no tiru tuun ba kraik no kona duni kolega ne’e nia-ain. Entaun kuandu ami fila kotuk, bapa sira tiru tuir kedas ona ami. La kle’ur de’it, ha’u-nia kidan ho ain hetan tiru no ha’u monu kedas iha portaun ki’ik ne’e nia oin. Kuandu ha’u hateke ba portaun boot, ha’u haree ema monu namtate de’it ona.

Ha’u sei hetan mós Simplicio, bapa sira kaer nia dada ba mai no ko’a nia tilun sorin ho sira-nia baioneta. Ha’u mós sei haree Porfírio monu iha moru hun nian, maibé nia konsege halai ho ain kudík hodi tama ba rate laran. Enkuantu ha’u monu besik loos ho kolega Aní Bidau. Ami na’in rua monu besik malu loos no hateke malu hodi dehan ba malu atu reza de’it ona. La kleur, bapa sira seluk komesa mai ho kareta atu tula ami. Ha’u halo finje mate tiha, maibé komu mai xuta tan ha’u-nia kabun entaun ha’u hakilar tanba moras. Hotu ida-ne’e, sira kaer ha’u soe tama ba karreta laran no karreta tula ami ba liu ospitál Lahane. Foufoun to’o Lahane, bapa sira atu fakar hotu de’it ba rai naruk boot ne’e (iha kamar mayat nian). Sira haruka ami sira ne’ebé sei moris ne’e atu tuun maibé ami la tuun. Entaun, tanba iha ha’u-nia leten ne’e iha maluk na’in hira (mate ona tanba nia isin malirin hotu ona), ha’u halo sira monu uluk ona, nune’e ha’u mós monu no dolar tama tiha kedas ba kareta Hino ne’e nia okos.

 Iha momentu ne’e, maluk sira balu ne’ebé sei moris maibé komu sira sikat tudik iha kanotak entaun bapa kaer duni sira-nia tudik ne’e hodi sona mate sira, balu bapa riba ho fatuk boboot hodi halo sira mate kedas iha fatin ne’e. La kle’ur, komandante ida mai no haruka sira para tiha ho asaun baku hirak ne’e no aviza fali atu sé mak sei moris karik sa’e fali kareta. Nune’e ha’u halo brani aan dolar sai fali mai atu sa’e fali karreta maibé komu ha’u-nia knotak ne’e moras demais ona entaun ha’u dezenaraska de’it mak konsege sa’e ba karreta laran. Karreta refere lori ami (maizoumenus ami na’in 6, ha’u sei lembra de’it mak kolega Carlos, mestre Xina oan agora iha Australia. Kolega ne’e mós sofre kanek iha kabun) sa’e ba ospitál leten no haruka ami tuun. Kuandu kolega Carlos ne’e haksoit tuun, bapa sira simu hasoru baku tan no halo ha’u hanoin atu la tuun hosi karreta laran.

 Komu bapa ida seluk mai ko’alia netik atu labele baku tan, entaun mak ha’u tuun no tama kedas ba uma laran hodi monu iha sala laran. Iha sala laran ne’e, ha’u hatene de’it mak kolega Eugenio Santa Cruz no sobriñu Anó Matadouru maibé seluk ha’u ladún hatene. Ha’u mós sei konsege hameno hela ba parteira timoroan ida, señora Aurora, hodi dehan ba nia ha’u-nia identidade kompleitu, ha’u-nia hela fatin no ha’u-nia orijinalidade, atu ha’u mate karik nia bele konta hela ba ha’u-nia família sira. Karik ami barak mak tama iha ospitál Wira Husada laran, maibé komu ha’u grave entaun ha’u labele hatene ami hamutuk ema na’in hira. Maibé, tanba sala boot ida be ami toba ba ne’e bele kalkuladu ema na’in 100 resin. Hosi ne’ebá mós bapa sira sei tula sai tan balu, lahatene mate mak tula sai ka moris mak tula sai mós ami lahatene. Komu ha’u-nia kondisaun ne’e grave entaun grasa de Deus, ha’u hetan atendimentu hodi opera tanba kala tia Aurora ne’e ninia esforsu.

 Aleinde mana Aurora, iha mós javanes ida no Ujung Pandang nian ida mak haree ami di’ak hodi dehan ba ami “Se presiza buat ruma karik atu hateten de’it ba nia”. Ami sira ne’ebé kanek todan, inklui Alex Samurai, kolega Marcos (agora iha sekretariadu Parlamentu Nasionál) ho mana Josefina, mana Isabel (Pe. Domingos nia subriña) hetan opera iha ospitál Lahane duni to’o ami nia kondisaun di’ak. Ha’u iha ospitál laran to’o fulan janeiru tinan 1992 mak tula fali ami ba KORAMIL Becora no liu loron rua (2) mak ami nia Babinsa Akadiru-Hun mai hasai fali ha’u ba uma. 

 Lia-tatoli

Tanba ne’e, iha komemorasaun Masakre Santa Cruz ba dala-XXIX no loron Nasionál Juventude ba dala-15 ne’e, sobrevivente Jaonico Maria Alves ne’ebé uluk konsege halo hotu nia estudu lisensiatura nian iha Fakuldade Agrikultura UNTL ne’e, fó nia lia-tatoli ba ukun-nain sira no ba timoroan sira hotu;

  1. Ba maluk sira ne’ebé mate iha tempu masakre nian, se sira-nia simitériu ladi’ak karik Estadu presiza tulun família sira atu hadi’a sira-nia simitériu. No, ba hirak ne’ebé mak seidauk hetan nia mate-isin karik, Estadu Timor-Leste bele koopera ho Estadu Indonézia atu bele buka tuir sira-nia retu mortál, nune’e bele hakoi fali iha fatin ne’ebé dignu tuir kultura ita-nian rasik.
  2. Ba sira ne’ebé sei moris no seidauk hetan karik sira-nia pensaun, Estadu bele haree no aselera lalais sira-nia pensaun tanba mairoa hosi sira uluk abandona hela sira-nia estudu tanba Masakre Santa Cruz, entaun Governu presiza fó apoiu ruma ba sira atu sira bele goza netik uitoan molok sira mate. Estadu presiza mós kria kondisaun ruma, liuliu ba sira ne’ebé laiha karik uma ka asesu ba saúde atu sira bele hetan atendimentu ida dignu.
  3. Ba maluk sobrevivente sira, komapañeiru 12 novembriu nian tomak atu organiza malu to’o iha baze, pelu menus to’o nível suku atu maluk sira ne’ebé labele la’o to’o Dili karik bele selebra loron ida-ne’e iha sira-nia fatin atu kontinua valoriza loron ida-ne’e. Tanba sobrevivente sira la hela de’it iha Dili maibé sira hela iha ida-idak nia fatin. Husu ba maluk sobrevivente sira hamutuk atu tau matan mós ba maun Max Sthall tanba ho nia mak mundu bele hatene ita-nia luta ida-ne’e. Nia fraku tebes ona, se bele sobrevivente sira bele tau hamutuk osan uituan atu bele tau matan ba nia.
  4. Ba ha’u-nia oan sira ne’ebé sei iha banku estudu nian atu aproveita tempu ho didi’ak. Imi-nia kontribuisaun mak fó aan didi’ak no utiliza didi’ak tempu atu estuda no kontinua estuda. La’ós ba mete fali mak arte marsiál hodi hatudu fali iha eskola hodi estraga imi-nia futuru rasik. Husu atu imi respeitu mós imi-nia mestre/a sira tanba ida-ne’e duni mak étika nu’udar estudante ida. Uluk, ami halo ida-ne’e tanba situasaun oin seluk. Aproveita talentu ne’ebe imi iha atu halo di’ak ba imi-nia aan rasik.
  5. Ba joven em jerál, atu labele fahe malu maibé tenke sai joventude ida de’it mak joventude Timór. Futuru rai ida-ne’e nian iha imi joven sira-nia liman. Jerasaun tuan sira kuandu bá la fila ona, joven sira mak sei hela atu kontinua jerasaun tuan sira-nia obra. Tanba ne’e, husu atu joven sira tenke kontinua unidu atu lori Timór ida-ne’e ba oin.

Kontribuidór: Memensio Sequiera Freitas

Editór: Cancio Ximenes  

HAKEREK NO HATÁN

Please enter your comment!
Please enter your name here