Postu abastesimentu mombustível iha Dili ne’ebé rejistadu ona iha ANPM. Imajen/ANPM

COVALIMA, 14 novembru 2020 (TATOLI)—Autoridade Nasionál Petróleu no Minerál (ANPM) daudaun ne’e rejista ona postu abastesimentu kombustível hamutuk 64 iha munisípiu Dili, Hera no Metinaro inklui balun espalla iha munisípiu.

Prezidente Konsellu Administrasaun ANPM, Florentino Mateus Soares Ferreira, hateten maski postu iha munisípiu sira hahú aumenta, maibé maioria la tuir padraun ne’ebé estabelese ona husi autoridade.

”Postu abastesimentu kombustível iha munisípiu barak mak la tuir padraun, maibé ami-nia ekipa sempre halo inspesaun rutina atu garante katak buat ne’ebé ami hetan la tuir duni prosedimentu no ami ajuda neneik hodi sira bele integra ba padraun no neneik komesa hadi’a. Barak mak kolabora di’ak tebes hodi ikus mai hadi’a fasilidade,” Prezidente ANPM hateten ba Agência TATOLI, foin lalais ne’e, iha munsípiu Covalima.

Kona-ba akontesementu iha munisípiu Lautém ne’ebé rezulta ema na’in-rua mate iha postu abastesimentu kombustível, Florentino klarifika katak postu ne’e la rejistadu iha ANPM, tanba ne’e autoridade labele aplika sansaun ba empreza, maibé prosesu ne’e iha ona Ministériu Públiku.

Notísia Relevante: ANPM suspende provizória atividade postu abastesimentu kombustível ida iha Baucau

Postu balun ne’ebé taka tanba la prienxe rekezitu ne’ebé estabelese, tanba ne’e suspende provizóriu atubele hadi’a no eleva fasilidade tuir padraun.

“Ami hakarak sira la’o tuir lei, regulamentu no prosedimentu ne’ebé ANPM hatuur, entaun dala barak iha risku hanesan iha Lautém no ita-nia alin na’in-rua mate no ANPM laiha koñesementu ba ezisténsia postu abastesimentu, entaun atividade ne’ebé sira halo ami konsidera ilegál,” nia haktuir.

Normalmente ANPM taka sira ne’ebé maka la prienxe rekezitu tanba mina ne’e risku bainhira loke iha komunidade nia le’et no tenke garante seguransa ba atividade, tanba bainhira laiha fasilidade di’ak maka bainhira iha rabenta ruma bele prejudika komunidade besik postu abastesimentu.

“Ami la taka maibé suspende provizóriu de’it no fó tempu kumpre regulamentu tanba ami respeita emprezáriu sira ne’ebé presiza hadi’a  ekonomia no fó oportunidade atubele hadi’a fasilidade tuir padraun hodi labele mosu risku, nia subliña.

Nune’e, Prezidente ANPM husu ba autoridade lokál sira bainhira haree atividade sira ne’ebé mak la’o, tenke iha koñesementu autoridade no kumpre rekezitu husi Diresaun Downstream.

“Bainhira seidauk bele, autoridade lokál bele informa ba ami, la’ós atu ameasa taka, maibé lori sira la’o tuir prosedimentu, nune’e di’ak ba empreza no komunidade,” nia hatutan.

Foin lalais ne’e, ANPM liuhosi Diresaun Downstream taka provizóriu atividade postu abastesimentu kombustível ida iha munisípiu Baucau.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here