Responsável kompañia Acelda esplika hela produtu ba Ministru Koordenadór Asuntu Ekonómiku, Joaquim Amaral no ekipa, iha edifísiu Acelda, Baucau vila, sábadu (14/11). Imajen/Mídia MKAE

BAUCAU, 14 novembru 2020 (TATOLI)—Ministru Koordenadór Asuntu Ekonómiku (MKAE), Joaquim Amaral, halo vizita ba kompañia Acelda Unipesoal, Lda, ne’ebé halo investimentu iha setór agrikultura no pekuária, hodi haree kondisaun no produtu hirak ne’ebé kompañia prodús nune’e bele envolve ba programa Cesta Bázika.

“Governu iha ona programa rekuperasaun ekonómika no iha medida haat iha kurtu prazu ne’ebé sei implementa iha tinan ne’e nia laran hanesan apoiu ekoómiku ba kompaña sira, sosa produtu lokál husi komunidade sira liuhosi kompaña sira hodi distribui filafali. Tanba ne’e vizita ne’e oportunidade di’ak atu harea fasilidade Acelda, nune’e bele hola parte iha programa Governu,” Ministru Joaquim informa, sábadu ne’e, iha edifísiu Acelda, iha postu administrativu Vemasse, munisípiu Baucau.

Notísia Relevante: Governu emite deklarasaun benefísiu ba investidór lima

Tuir governante ne’e, kompañia lokál ne’e sei hamutuk ho kompañia balun tan iha Baucau ne’ebé sei hetan oportunidade hodi ajuda Governu prepara produtu.

“Ita haree Acelda hanesan kompaña timor-oan ida, ne’ebé ko’alia uitoan maibé serbisu mak barak tanba ninia rezultadu ita haree duni. Ita apresia tanba iha situasaun ekonomia difísil maibé bele hamrik nafatin. Dezembru nia laran Acelda sei tama tan hamutuk ho kompañia balun iha Baucau ne’ebé Estadu fó sertifikadu investimentu no sira konsege halo re-investimentu atu hetan fasilidade sira, Estadu fó atu tulun setór privadu sira hodi halo investimentu iha nasaun ne’e,” nia akresenta.

Nia dehan, hafoin observa direita kondisaun, kapasidade no fasilidade ne’ebé kompañia iha, Governu laiha dúvida no sei halo kontratu ho Acelda.

“Kompaña hatudu ona sira-nia kapasidade, tanba ne’e Estadu iha obrigasaun atu integra sira iha planu rekuperasaun ekonómika, liuliu Cesta Bazika,” nia hatutan.

Iha fatin hanesan, Diretór kompaña Acelda, Eugênio da Costa Freitas hateten kompañia lokál ne’e prontu kolabora hamutuk ho ministériu implementadór programa Governu.

“Planu ida-ne’e derepente de’it, karik Governu kontrata ami maka sei oferese tuir nesesidade ne’ebé ami iha,” nia dehan.

Materiál ne’ebé daudaun kompañia ne’e prodús maka hanesan halo presamentu hare kulit ba foos, prosesamentu sabaun, no sampo.

“Karik akontese, Governu tau duni interese no bele loke ona ami-nia neon tanba durante ne’e ami-nia produtu sira iha merkadu la la’o, maibé ami fiar Governu sei tau atensaun no fó benefísiu ba povu no kompañia rasik,” nia otimista.

Daudaun ne’e foos Timór hamutuk tonelada 60 mak iha armajen Acelda, Tanba ne’e dirijente ne’e fiar Governu bele sosa no fahe ba ema barak iha Baucau laran.

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina nú, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Vizita ne’e akompaña husi Diretór Ezekutivu Trade Invest Timor-Leste, Arcanjo da Silva no ekipa, ekipa husi Servisu Rejistu no Verifikasaun Emprezariál (SERVE) no Autoridade Tributária.

Antes ne’e, iha loron 17 september 2020, Governu reprezenta husi MKAE no Ministériu Finansa (MF) emite deklarasaun benefísiu ba investidór nasionál no internasionál hamutuk lima, ne’ebé investe iha setór produtivu no kontribui polítika planu rekuperasaun ekonómika Governu.

Acelda mós momentu ne’ebá simu sertifikadu ne’e.

Jornalista: Hortêncio Sanchez

Editora: Julia Chatarina       

HAKEREK NO HATÁN

Please enter your comment!
Please enter your name here