Serimónia transladasaun restu mortál saudozu Mau-Karo '305' no saudozu sira seluk iha suku Metagou, Postu Administrativu Bazartete, Munisípiu Liquiçá, sábadu (14/11). Imajen TATOLI/Evaristo Soares Martins

LIQUIÇÁ, 14 novembru 2020 (TATOLI)—Saudozu Komandante Mau-Karo 305 bainhira adora prinsípiu ‘Pátria ou Morte Venceremos! A Luta Continua! Rezistir ė Vencer’ durante prosesu luta, hameno hela liafuan ba gerilleiru sira katak iha ai-laran mak nu’udar kampu batalla ne’ebé koko entre barani no ta’uk hodi kontinua reziste hasoru okupasaun.

Prezidente Komisaun Organizadora serimónia transladasaun no Reprezentante Komisaun Omenajen, Cesar dos Santos da Silva ‘Merak’, haktuir Mau-Karo ‘Tiga Nol Lima’ (305) sempre iha konfiansa ba ninia-an rasik hodi desidi atu kontinua halo funu iha ai-laran.

Ba saudozu ne’e, lia fuan seluk ba ai-laran maka ‘hutan menjadi arena penantian untuk hidup dan mati dalam perang’, ne’ebé hanesan lia-fuan badak reflete ba espresaun Mau-Karo 305, bainhira tuur hamutuk ho gerilleiru sira no konta istória kona-ba tiru-malu.

“Ai-laran mak kampu batalla hodi koko ita-nia brani no ta’uk hodi hatuur moris no mate iha tempu ne’ebé loos no oras ne’ebé ita hatene, tanba mate ne’e mehi ida,” Merak haktuir iha serimónia transladasaun restu mortál saudozu Komandante Mau-Karo 305 no saudozu seluk, sábadu ne’e, iha suku Metagou, postu administrativu Bazartete, Munisípiu Liquiçá.

Biografia Mau-Karo ‘305’

 Moris iha loron 27 maiu 1956, iha suku Metagou, Assorlema, postu administrativu Bazartete, munisípiu Liquiçá, nu’udar família agikultór hosi fuan domin Felix da Conceição no Aurora de Araujo.

Hanesan oan mane dahuluk ho nia alin na’in-sia mak hanesan Francisco da Conceição (matebian), Martina da Conceição, José da Conceição, Vicente da Cruz da Conceiçao dos Santos ‘Railos’, Alberto da Conceição Mau-Karo-II (matebian), Domingos da Conceição dos Santos, João da Conceição (matebian), Domingas da Conceição (matebian), Felisberta da Conceição.

Mau-Karo la hetan edukasaun formál no informál iha banku eskola, maibé hanesan ema ida ne’ebé matenek no gosta atu aprende ho ema seluk.

Saudozu ninia moto maka ‘a sua morte é a nossa tristeza e a sua obra é alegria do país’.

Envolvimentu iha prosesu luta ba libertasaun nasionál

Hahú partisipa iha luta libertasaun nasionál bainhira nia kompleta ona tinan 19, sura husi ninia loron moris to’o ba 1975 hanesan faze inísiu funu ne’ebé Mau-Karo rekrutadu hanesan milísia populár hodi hetan treinamentu militár hosi instrutór Narciso Gonçalves, nu’udar eis alferes liña daruak iha rezime koloniál portugés nia tempu.

Bainhira infiltrasaun inimigu mai hosi Ermera hodi okupa vila Bazartete iha loron 01 juñu 1976, instrutór Narciso Gonçalves nakfilak ba Camat hodi sai hanesan lima-ain, tilun ibun inimigu ho durasaun tinan 23, ne’ebé nu’udar karreira privileziada hosi funu hahú iha loron 01 juñu 1976  to’o ba asaun milísia Besi Merah Putih ramata iha loron 25 outubru 1999 iha Timor-Leste.

Mau-Karo hetan treinamentu báziku militár hosi Eis Alferes liña daruak, Lino Alves (matebian ona), hafoin treinamentu báziku militár preliminár, Mau-Karo enfileira kedas iha ezersitu milísia populár hodi hamutuk ho forsa sira ba halo defeza iha Tibar, altu Fatuborlau hosi loron 07 dezembru 1975 to’o loron 01 juñu 1976 bainhira inimigu infiltra hosi Leorema mai okupa vila Bazartete.

Iha agostu 1976, bainhira forma kompañia Rusa Fuik, Mau-Karo nomeadu hanesan Komandante dahuluk pelotaun iha Komandu Rusa Fuik ho ninia Komandante daruak pelotaun mak Mau-Kaso ‘Busa’.

Hafoin Mau-Karo nomeadu ba Komandante dahuluk pelotaun no kolokadu iha komandu, nia sempre hatudu espíritu prontidaun ho responsabilidade tomak, ho eroizmu hodi rona no kumpre orden komandu nian, maibé dala ruma ho situasaun funu nian obriga nia foti desizaun unilaterál sein koordena no konsulta ho komandu no atua daudaun bainhira  mosu deskonfiansa ne’ebé suspeita ba ema ruma, nia oho kedas.

Tanba ne’e, mak iha base de apoio, Mau-Karo  koñesidu iha setór fronteira norte tomak hanesan komandante ida ho karatér aterrorizante tebes, barani no kombativu, tanba ninia espíritu agresividade no kombatividade iha nível ne’ebé aas tebes mak komandu asegura nafatin ninia prestasaun tomak, maski komandante Mau-Karo infrinji hela regra balun.

Razaun hanaran 305

Iha loron 30 outubru 1976, iha situasaun tiru-malu entre inimigu ho FALINTIL sira iha Maganhati, suku Ulmera, Bazartete, rezulta komandante kompañia hosi batallaun ‘Tiga Nol Lima’ hetan tiru no mate  hosi bravu komandante asuwain  Mau-Karo bainhira Forsa Indonézia (TNI, sigla indonézia) duni-tuir no koko lasu tali-matan ba Mau-Karo ninia kakorok mak nia foti ulun hodi tiru mate kedas komandante kompañia 305 ne’e.

Hahú iha loron ne’e kedas Mau-Karo rasik tau nia naran kódigu Mau-Karo ‘Tiga Nol Lima’, ho asaun ne’e aumenta nia grau agresivu iha kampu batalla hodi hasoru inimigu iha kualkér tempu no iha sirkunstánsia ne’ebé de’it.

Iha tinan tolu baze de apoio hamosu inserteza polítika no desmoralizasaun iha nível ne’ebé elevadu tebes, tanba até própriu diresaun luta, komandante no povu ein-jerál moralmente abaladu, ne’ebé ho konsiénsia nakadoko hodi haree no hateke de’it ba inimigu ninia forsa ne’ebé boot hodi sai sasukat ba prosesu luta ba libertasaun nasionál povu Maubere nian, hodi haluha tiha provérbiu portugés ne’ebé dehan ‘a razão vale mais do que aforça’.

Iha situsaun polítika no militár, base de apoio exorta no atormenta konfiansa ema barak hodi iha hanoin tun ba vila tanba inimigu forsa boot liu no inimigu aplika artillaria área hodi utiliza aviaun regadór BRONCO-10 iha tinan-tolu, hodi sobu no harahun base de apoio iha territóriu laran konsekutivamente husi 1977 to’o loron 09 novembru 1978.

Ho asaun envergadura ne’ebé inimigu aplika, konsege duni destroe tátikamente rezisténsia populár hodi inimigu sente katak ho invazaun ilegál ne’ebé Indonézia lansa mai Timor-Leste bele hamate no hakotu Povu Maubere nia lian iha komunidade internasionál kona-ba defeza direitu universál povu ida nian.

Operasi kikis

Iha tinan 1979 to’o 1980, inimigu lansa ba dala ikus operasaun envergadura ne’ebé ho lian indonézia hanaran ‘Operasi Kikis’ ka limpeza jerál, ne’ebé inimigu efetua ho 5.000 homens armados hodi halo operasaun rusga husi Ermera bá Bazartete, ne’ebé iha asaun ne’e inimigu konsege oho tán forsa balun, nomeadamente, saudozu Benjamin de Jesus da Silva ‘Laloran’ iha tinan 1980, iha alto Malenes Geo, área suku Tibar.

Hafoin efetivasaun inimigu ninia asaun, mosu forsa sobrevivente sira-ne’ebé inimigu la konsege oho no lori tun bá vila hodi kontinua nafatin buka-malu no halibur malu iha setór fronteira norte ne’ebé mai husi kompañia neen iha baze 1 zona Bazartete mak hanesan kompañia Rusa Fuik, Busa Fuik, Manu Fuik, kompañia Ramelau, kompañia Rai Lakan ho kompañia intervensaun, ne’ebé inimgu sobu no anikila hotu maibé infelizmente, forsa hosi kompañia hirak ne’e hela de’it forsa sobrevivente pelotaun rua.

Pelotaun ida husi kompañia Rusa Fuik no pelotaun ida seluk hosi kompañia intervensaun ne’ebé komanda husi saudozu Daniel da Costa ‘Nahak’, hanesan segundu komandante kompañia Intervensaun, komandante Aleixandre Granadeiro Gonçalves ‘Sakudi’, komandante João Piedade ‘Lasilu’, kompañia Rusa Fuik komanda hosi  komandante kompañia Ernesto Gonçalves  ‘Mate Moris’ ho komandante pelotaun, Mau-Karo ‘Tiga Nol Lima’.

Nune’e mós, Komandante daruak pelotaun mak Mau-Caso ‘Busa’ hamutuk ho kolaboradór sira iha zona rua hanesan Salvador de Fátima do Rego ‘Kol Sala’ ho Kolaboradór Benjamin de Jesus da Silva ‘Laloran’.

Ho Operasi Kikis ka limpeza jerál ne’ebé inimigu lansa, konsege nafatin hamonu no halakon ema barak nia vida.

Operasaun 10 juñu 1980 no 744 Becora

Maibé sei eziste hela grupu kiik balun ho totál 40 resin ho arma ne’ebé iha ikus, realiza operasaun 10 juñu 1980 iha Altu Marabia, Fatunaba, Dare ho Paiol 744 iha Becora, Dili.

Grupu ne’ebé ataka paiól 744 Becora komanda hosi komandante Mau-Karo ‘Tiga Nol Lima’ ho komandante Ernesto Gonçalves ‘Mate Moris.

Ho asaun ne’ebé efetua ba Paiól 744 Becora, Komandante Mau-Karo ‘Tiga Nol Lima’ ho ninia grupu konsege harahun armazen materiál funu hodi kaptura metralladora rua, morteiru rua, maibé ho persegisaun inimigu, provoka tiru-malu kedas iha loron ne’e hodi inimigu hadau no rekupera filafali materiál funu nian ne’ebé grupu ne’e foti.

Hafoin operasun 10 juñu 1980 Marabia, forsa sobrevivente sira pasa ba faze rekuperasaun saúde durante fulan ida-resin husi loron 15 juñu to’o loron 17 agostu 1980, forsa pelotaun rua ne’e fahe malu ba grupu rua hodi pelotaun ida komanda hosi komandante Daniel da Costa ‘Nahak’ ho komandante Alexandre Granadeiro Gonçalves ‘Sakudi’ desloka husi estasionamentu Erbuti, área Manama Lau, suku Tibar, ne’ebé toma diresaun ba sentru Leste ho objetivu atu buka-tuir diresaun superiór luta iha setór sentru leste.

Enkuantu pelotaun ka grupu ne’ebé komanda husi komandante kompañia Ernesto Gonçalves ‘Mate Moris’ ho Komandante Mau-Karo ‘Tiga Nol Lima’, komandante Armando de Jesus ‘Lafaek’ Komandante Celestino dos Santos Samoro’ ho komandante Domingos ‘Susar’, kontinua  mantein nafatin halo movimentasaun ho asaun polítika no militár iha fronteira norte iha área nomeadamente, Tibar, Ulmera, Leorema ho Madabenu, Besi Lau, Dili, mak hanesan raiu asaun ne’ebé define atu pelotaun ka grupu, ne’ebé permanese bele movimenta hodi halo buska informasaun relasiona ho situasaun inimigu iha vila laran no mós buka atu asegura nafatin rede ka kaixa klandestina ne’ebé antes 10 juñu 1980 estabelese hela ona.

Hafoin dispersaun forsa sobrevivente pelotaun rua-ne’e, pelotaun ne’ebé hela ativa ninia asaun hodi halo infiltrasaun ba kampu konsentrasaun koko atu reativa ligasaun ho ajente apañadu iha to’os ka iha atividade ne’ebé populasaun vila laran sempre ba hala’o iha zona branka ka zona movimentasaun gerrilleiru sira-nian mak Mau-Karo ‘Tiga Nol Lima’ ho nia grupu konsege duni estabalese ligasaun ida iha Aipelu ho ajente ida naran Mau-Caus hodi marka tiha enkontru daruak ho ajente refere ba fulan-ida.

Hafoin bele ba hasoru fali hodi rekolla informasaun, nune’e hafoin liutiha fulan-ida Komandante Mau-Karo hamutuk ho Adjuntu Merak ho kolega na’in-neen seluk mak hanesan Domingos Ataide ‘Rigorozu’, Eduardo da Silva ‘Sikoru’, Domingos Soares ‘Loron Manas’, Mateus dos Santos ‘Gordu’ ho Crizodio Salvador da Conceição.

Iha fulan-novembru 1980, halo aproximasaun  ba iha ajente ho naran Mau-Caus  nia uma, koko atu hetan informasaun ruma hosi nia maibé infelizmente, realidade hatudu oin seluk tanba Mau-Karo ‘Tiga Nol Lima’ nia grupu hetan traisaun iha kalan boot 12.00 ba 13.00 oras kalan ho asaun tiru hosi HANSIP sira ne’ebé tuir informasaun dehan katak ajente ne’e mak ba bolu HANSIP iha Kodim Liquiça hodi halo atake ba grupu em kauza.

Husi asaun traisaun ne’e inimigu konsege tiru-mate duni kolega Mateus dos Santos ‘Gordu’ bainhira nia tuur hodi han hela batar-fai bikan ida iha uma nia varanda hosi parte tasi ne’ebé Adjuntu Merak (agora iha komisaun omenajen) sai testemuña okulár ba traisaun refere embora, komandante Mau-Karo ‘Tiga Nol Lima’ ho kolega na’in-neen seluk mate hotu ona.

“Ha’u rasik mak agora sei moris nafatin hodi bele konta no haktuir pazajen hotu ne’ebé akontese iha situasaun funu nian hamutuk ho Mau-Karo ‘305’,” Merak haktuir.

Iha asaun ne’e, Komandante Mau-Karo ho ninia grupu hetan serku iha uma iha kampu konsentrasaun Aipelo, suku Lauhata, postu administrativu Bazartete.

“Iha akontesimentu ne’e ami mós responde ho tiru maibé la kauza baixa hosi inimigu nia parte. Hafoin grupu ne’e hasoru tiha situasaun ne’e grupu ne’e retira hodi fila ba iha subar fatin iha área Borlete, Nilohei, Bazartete. Ho asaun ne’ebé deskreve liubá, komandante Mau-Karo ho nia grupu la sente intimidadu ho asaun inimigu nian hodi kontinua nafatin halo planu asaun buska iha fatin seluk,” Merak konta tuir.

Nune’e, iha loron 03 marsu 1981 asaun  ho karáter haneasan realiza fali iha Leorema, Railuli, Mau But Ulun, iha Leonardo nia uma no husiasaun rua ho karáter hanesan la implika ba determinasaun Mau-Karo ‘Tiga Nol Lima’ nian atu kontinua funu to’o manán funu tanba nia kuda iha nia fuan ho laran ho liafuan orden ne’ebé dehan ‘Patria ou Morte Venceremos! A Luta Continua! Rezistir ė Vencer…!!!!’

Faze guerrilla

Reorganizasaun nasaun nian no reorganizasaun rezisténsia luta ba libertasaun nasionál ne’ebé diresaun luta estabelese liuhosi Konferénsia Nasionál dahuluk iha loron 1 to’o 8 marsu 1981 iha Maubai, hodi forma no hatuur-hikas estrutura foun ne’ebé engloba amplamente frente tolu rezisténsia nian mak hanesan Frente Armada, Frente Klandestina no Frente Diplomátika Esterna.

Hafoin lakon kontaktu kuaze tinan-ida, teki-teki iha akampamentu hana-kalik mosu lian ida nune’e ‘ha’u Lagarto (veteranu) mai husi sentru leste’, Komandante Mau-Karo rna lian ne’e nia foti kilat tiru kedas Lagarto maibé sala de’it.

“Exortasaun no alegria boot ba ami bainhira Lagarto mosu ho Adjunto Sole-Solep ho komandante Mateus Soares ‘Mesak’ hodi informa kona ba situasaun saudozu Domingos Henrique de Oliveira ‘Samala’ ninia mate ne’ebé kauza hosi traisaun família nian,” haktuir Adjuntu ne’ebé nakonu espresaun tristeza.

Hafoin Komandante Mau-Karo ‘305’ rona tiha informasaun kona-ba Konferénsia Nasionál dahuluk ne’ebé realiza husi Komandante ein Xefe FALINTIL, Kay Rala Xanana Gusmão, iha Maubai 1981, ne’ebé lori esperansa no enerjia foun ba luta da libertasaun nasionál hodi inspira nafatin partisipasaun no vontade esmagadora povu nian.

Maibé hosi parte seluk halo komandante Mau-Karo ‘305’ ho gerilleiru sira sente triste tanba rona Komandante dahuluk destakamentu norte, Domingos Henrique de Oliveira ‘Samalai’ mate tanba hetan traisaun hosi família iha Ermeta, suku Fahilebu, Donponlau, Bazartete.

Bazeia ba orientasaun komandu da luta nian ne’ebé hasai iha Konferénsia Nasionál dahuluk deskreve katak tenke mantein nafatin iha faixa norte hodi halo asaun gerrilla, maibé husi realidade haree katak difísil tebes atubele kontinua halo asaun gerrilia iha norte mak komandu destakamentu norte, embora, Samalai mate.

Maibé Komandante daruak destakamentu Ernesto Gonçalves ‘Mate Moris’ ho komandante Mau-Karo ‘Tiga Nol Lima’ hamutuk ho Adjunto Sole-Solep diside atu grupu ne’e tenke abandona paixa desloka ba oeste hamutuk ho komandu rejiaun iha Ainaro, Mamalau.

Nune’e, Destakamentu Norte prepara kondisaun hodi desloka ba komandu rejiaun Haksolok iha Ainaro, Mamalau, ho itinerariu, rute Loes, Kailaku, Marobo, Atsabe hodi hakat ba Mamalau.

Bazeia ba planu deslokasaun ne’ebé iha konsidi mós ho inimigu nia planu asaun ne’ebé inimigu lansa daudaun hela iha terrenu hodi loron ida antes grupu atu desloka tiru-malu iha área Villa Branka iha loron 01 maiu 1981.

Hafoin loron 02 maiu 1981, Destakamentu Norte koko hakat-tuir planu ne’ebé iha hodi akontese mós tiru-malu iha Bou-Lana, área Manu-Patia, Kuriboloa, suku Darulete, ne’ebé kauza hosi tiru-malu ne’e gerrilleiru Jose Mutin ‘Mau Reha’ husi suku Tibar mate iha embuskada inimigu nian.

Husi asaun ne’ebé akontese provoka dispersaun forsa destakamentu nian hodi Komandante daruak, Ernesto Gonçalves ‘Mate Moris’ ho grupu ida halai fila-fali ba kotuk enkuantu komandante pelotaun destkamentu Norte, Mau-Karo ‘Tiga Nol Lima’ kontinua rompe inimigu ninia tentativa sira hodi konsege avansa to’o mota tabik Banitur, suku Leotala hodi kaptura matebian Katekista Joaquim, ema Leotela oan hamutuk ho nia kolega ida hafoin kalan desloka ona mak hosik sira na’in-rua fila-fali ba uma ka vila.

Komandante Mau-Karo ‘305’ kontinua ho ninia asaun marcha iha loron 03 maiu kalan grupu ne’e liuhosi ka hakur mota boot Laueli (ne’ebé sulin ba mota Loes) hodi hakat ba Cailaco.

Tuir planu komandu destakamentu norte nian katak situasaun la permite ona atu destakamentu norte permanese iha fronteira norte tanba inimigu intensifika maka’as liu ninia asaun kontra gerrillia hasoru gerrilleiru sira nune  mak hakarak ka lakohi tenke abandona faixa norte hodi hakat fali ba oeste hamutuk ho komandu rejiaun Haksolok.

Hafoin iha faze ikus luta nian rejiaun haksolok nakfilak ba Rejiaun IV ne’ebé kompostu hosi Munisípiu neen: Ainaro, Bobonaro, Covalima, Ermera, Liquiça, inkklui Rejiaun Autonoma Espesial Oé-Cusse Ambeno (RAOEA).

Ho tentativa hotu ne’ebé Komandante Mau-Karo ‘Tiga Nol Lima’ halo hakarak ultrapasa kordaun Bobonaro-Atsabe hodi hakat ba Mamalau, maibé liuhosi matan hateke hatudu katak difísil tebes atu grupu ne’e bele ultrapassa kordaun ne’e ho fásil.

Tanba husi Kailaku komandante Mau-Karo ho ninia grupu hakat ba Leolaku tutun hateke ba Atsabe nakonu ho repovoamentu ne’ebé hatudu katak la fasil atu ultrapasa kordaun Bobonaro-Atsabe, tuir planu ne’ebé previstu ona.

Nune’e, kalan ne’e Komandante Mau-Karo hamutuk ho Adjunto Sole-Solep (saudozu) deside atu grupu ne’e filafali ba Kailaku hodi prepara atu hakiduk ba kotuk ka fila-fali mai área Liquiçá, Bazartete.

Maibé molok atu fila grupu ne’e sei permanese iha Kailaku semana rua resin hodi tiru malu tiha ho HANSIP sira mak komandante Mau-Karo ho nia grupu desloka  fali hosi Kailaku fila ba área Liquiça, Bazartete  liuhosi marcha prolongada ida-ne’ebé Komandante Mau-Karo nia grupu realiza hosi Cailaco diretamente ba Bazartete hodi hasoru dezafiu oin-oin.

Bainhira gupu to’o iha Ermeea, Bazartete, abrigu Paglau guerrilheiru sira foin buka-fatin atu deskansa derrepente mosu forsa HANSIP sira hodi obriga tiru-malu hodi Komandante Mau-Karo ‘Tiga Nol Lima’ tiru kanek Luis Freitas, nu’udar HANSIP iha juñu 1981.

Grupu Mau-Karo 305 desloka ba Lakluta    

Husi asaun tiru-malu iha Ermeta tanba inimigu hatene ona katak prezensa Mau-Karo ‘Tiga Nol Lima’ rejista fali ona iha Fronteira Norte entaun inimigu intensifika ninia asaun kontra guerrillia ho eskala ne’ebé aas  hodi obriga Komandante ne’e hamutuk ho Komandante daruak destakamentu norte, Ernesto Gonçalves ‘Mate Moris’  tenke retira no abandona faixa norte hodi hakat hamutuk ba sentru leste, área Lakluta hafoin prepara atu desloka ba Komandu Rejiaun Haksolok, iha Ainaro, Mamalau.

Iha área Lakluta ami hasoru malu ho grupu Komité Permanente, orgaun Diretivu Luta ne’ebé lidera hosi saudozu Mau-Hodu ‘Ran Kadalak’ hanesan Sekretáriu Komité Permanente. Iha Lakluta por sekuénsia dos erros ka indisiplina ne’ebé Komandante Mau-Karo komete halo nia hetan supensaun kargu hodi kumpri medida justu koretivu durante fulan-tolu no hafoin rekupera hikas hodi simu fali kilat no retoma fali nia kargu anteriór hanesan komandante pelotaun.

Situasaun funu nian la’o no dezenvolve tuir realidade moris iha ai-laran nian ne’ebé  nesesidade funu ezije atu forsa sira labele hela konsentradu de’it iha fatin ida, maibé tenke fahe-malu atu halo movimentu hodi responde ezijénsia funu nian iha fatin seluk ka iha rejiaun seluk.

Nune’e, iha tinan 1986 fahe-malu iha abrigu dikur-neen hodi Komandante Mau-Karo  hamutuk ho grupu saudozu Bere Malae Laka nian ho komandante Alin Timur desloka ba Ponta Leste/Lospalos.

Husi tinan ikus 1986 tama ba tinan 1987 komandante Mau-Karo ‘Tiga Nol Lima’ ho nia grupu envolve iha asaun konjunta ne’ebé komandante luta trasa no planeia hodi halo asaun konjunta no asaltu Tim Saka ho Tim Sera iha Rejiaun I Baucau/Fatumasi (presiza konsulta ka konfirma ho komandante Berdu’u ho Blehitu).

Hafoin halo asaltu ba Tim Saka ho Tim Sera iha Rejiaun II Baucau, Komandante Mau-Karo ho nia grupu filafali ba Rejiaun Nakroman Kruzeiru, ne’ebé iha tinan 1988, nia ho ninia grupu halo embuskada iha dalan entre Lakibur Fahi-Nehan, hodi hadau kilat FNC móvel ida.

Hafoin hadau tiha kilat ne’e Komandante Mau-Karo ho niniaa grupu ba vizita abrigu Lakibur hodi hasoru malu ho Komandante Gil ‘Oan Soru’ atuál Sekretáriu Estadu ba Asuntu Libertasaun Nasionál tanba nia kanek subar no rekupera hela iha abrigu hakoi ruin, iha 1988.

Iha tinan 1989, saudozu Mau-Karo ‘Tiga Nol Lima’ ho saudozu Jaime Ribeiro ‘Samba Sembilan 9’ ho sira nia soldadu, fó seguransa ba Komandante Ein-Xefe FALINTIL, Kay Rala Xanana Gusmão iha sentru leste, iha Aitana, abrigu Tuna Sia.

Iha agostu 1989 saudozu Mau-Karo ‘Tiga Nol Lima’ ho saudozu Samba 9 no Komandante Aquito hamutuk ho gerrilleiru sira hala’o emboskada iha estrada Betano nian, hadau kilat  M-16 ida.

Iha loron 12 setembru 1989, saudozu Mau-Karo ‘Tiga Nol Lima’, ‘Samba 9’ no  Aquito ho sira-nia grupu halo emboskada ida entre Fahi-Nehan, Same, ne’ebé hadau tan kilat M-16 lolon haat (4) ho morteiru individuál ida. Iha operasaun ne’e Gil ‘Oan Soru’ mak hetan kanek hosi parte ain-loos.

Iha fulan-dezembru tinan 1989 grupu ne’e nafatin halo emboskada ida entre Sarin ba Kaikasa, hadau  kilat FNC ida.

Iha loron 15 setembru 1990 Komandu Kompañia daneen halo konsentrasaun ikus iha abrigu Kisar-Laran, hafoin hosi konsentrasaun ne’e mak halo sira fahe-malu iha grupu hodi halo asaun militár tuir planu ne’ebé komandu trasa ona.

Husi planu asaun ne’e, iha loron 09 outubru 1990 halo dispersaun iha grupu atu idak-idak toma ninia diresaun tuir planu komandu nian.

Nune’e, Komandante Mau-Karo ‘Tiga Nol Lima’ ho ninia grupu toma diresaun ba parte súl Mama-Lau, área Kastutu, Ainaro hodi halo enbuskada hasoru inimigu maibé inimigu deteta tiha ona grupu ninia movimentasaun hodi inimigu halo kontra enboskada no tempu inimigu halo asaun progreasaun  hodi halo serku ba Komandante Mau-Karo ho ninia grupu iha loron 20 outubru 1990 hodi tiru-malu ho inimigu iha 14:00 to’o 17: 00 lorokraik.

“Inimigu hakilar dehan Lima-Lima ho na’in-rua mate ona. Iha fatin ho naran Haat-Sanalau. Testemuña okulár ne’ebé sei moris mak Fransisco ‘Teki’ no Manuel Tilman ‘Lesa Rubi’.  Iha fatin ida ne’e mak Komandante Mau-Karo ‘Tiga Nol Lima’ hakotu ninia pregirinasaun iha mundu ida ne’e,” Adjuntu Merak subliña.

Viva Komandante Mau-Karo ‘305’ ka Komandante Tigre Fronteira!!!

Jornalista: Evaristo Soares Martins

Editora: Julia Chatarina

HAKEREK NO HATÁN

Please enter your comment!
Please enter your name here