Serimónia transladasaun restu mortál saudozu Mau-Karo '305' no saudozu sira seluk iha suku Metagou, Postu Administrativu Bazartete, Munisípiu Liquiçá, sábadu (14/11). Imajen TATOLI/Evaristo Soares Martins

LIQUIÇÁ, 14 novembru 2020 (TATOLI)—Xefe Estadu Maiór FALINTIL-Forsa Defeza Timor-Leste (F-FDTL), Brigadeiru Jenerál Falur Rate Laek no Komandante José Lourenço Cabral ‘Aquito’, rekoñese saudozu Mau-Karo 305 nia ‘biru’ ka kakaluk ne’e perigozu.

“Fofoun ha’u sei iha vila laran, kuandu bapa sira konta tun sa’e iha fronteira ne’ebá kona-ba Komandante Mau-Karo ‘305’ ne’e bapa sira naknedar, entaun bainhira ha’u sei iha vila, iha hanoin tenta buka nia hetan, hodi ha’u mós foti ninia biru (kakaluk), dahuluk ha’u-nia intensaun hakarak sai matenek,” Brigadeiru Jenerál Falur Rate Laek, konata tuir iha serimónia transladasaun restu mortál ‘Mau-Karo 305’, sabádu ne’e, iha uma lisan Leokopa, suku Metagou, postu administrativu Bazartete, munisípiu Liquiçá.

Bainhira hasoru saudozu Mau-Karo esplika biru ne’e ba Falur kona-ba kritéria atu uza no buat sira-ne’e ninia rezultadu kontribui ba ukun rasik-an.

“Sira-nia buat ne’e ema bele la fiar, maibé ezemplu barak Mau-Karo ne’e perigozu ho nina biru ne’e,” nia haktuir.

Falur Rate Laek louva Bazartete oan ne’ebé kontinua destakada hafoin baze apoiu rahun, liuhosi grupu Mau-Karo ‘305’ nian.

Falur husu jerasaun foun tenke hatene no kuda metin espíritu rezisténsia, nune’e kualkér dezafíu ne’ebé mosu bele barani reziste no rezolve.

Nune’e mós, Komandante José Lourenço Cabral ‘Aquito’ bainhira hetan orientasaun husi Komandu Luta hodi hasoru malu ho grupu Mau-Karo ‘305’, ne’ebé kontinua reziste iha área Liquiçá.

Komandante Aquito dehan, fofoun hasoru malu ne’e ida-idak te’in rasik no ida-idak haan ninian.

Iha tempu ida, bainhira te’in entaun Komandante Mau-Karo nia mak tasak uluk, nune’e Komandante Aquito dehan nune’e “maun labele haan lai, hein ha’u-nia tasak mak ita na’in-rua haan hamutuk tanba ha’u atu ko’alia buat ida ho maun.”

Bainhira haan hamutuk, Komandante Mau-Karo dehan “Ó keta liurai nia oan karik, ha’u dehan, lae maun, ha’u ema kiak nia-oan, entaun se bele aban ita na’in-rua ba koko.”

Bainhira Komandante ransu di’ak ona ho Mau-Karo no husu Komandante oinsá bele tau naran 305 ne’e, nia hatán “labarik, ó hakarak hatene 305 ne’e tanba ha’u tiru mate Komandante batallaun 305. Ohhh, ha’u la hatene ne’e mak ha’u husu ba maun ne’e. Nune’e ami na’in-rua mós toman no goza malu entaun nia husu ona ha’u, ó ema ne’ebé, maun ha’u ema Baucau.”

Rona tiha intrusaun husi Komandante Mau-Karo 305, Komandante Aquito hahú ba toba maibé toba la dukur to’o madrugada tanba atu fó koko ne’e la hatene saida loos.

“Dadeersan, ha’u preparadu entaun nia dehan ita na’in-rua la’o ona, kasu tiha sasán ne’e ba nia kakorok no nia dehan ita na’in-rua la’o ona. Nia karregadór rua iha ha’u-nia leten, nia dehan ó bel ne’e segredu maibé tanba ohin loron ha’u konta maibé liután ha’u labele fó-sai”, haktuir Komandante Aquito.

Tanba ezijénsia funu nian halo Komandante Mau-Karo ‘305’ no Komandante Aquito tenke fahe-malu iha mota Laklo, Manatuto nian.

“Asaun dahuluk ha’u foti uluk kilat rua, sira dehan buka-fatin di’ak mak tiru-malu, ha’u dehan lae ita tiru-malu iha rai molik de’it. Ahi haan hotu ha’u-nia fuuk mas ha’u halai tama de’it no sira deskonfia ha’u  buan tanba sira haree husi asaun tiru-malu iha rai molik ne’e.

Liu tiha fulan barak,  Komandante Makaro ‘305’ to’o maibé komandante sira seluk kontinua deskonfia Komandante Aquito.

“Komandante Mau-Karo dehan nia la’ós buan, sasán sira-ne’e ha’u mak fó ba nia, entaun ha’u hanoin katak nia defende ha’u ne’e di’ak,” nia katak.

Maski nune’e, Komandante Aquito labele esplika klaru liután kona-ba biru ne’ebé oferese husi saudozu Makaro ‘305’, maibé nia dehan biru ne’e perigu tebes durante prosesu luta ba libertasaun nasionál.

Jornalista: Evaristo Soares Martins

Editors: Julia Chatarina

HAKEREK NO HATÁN

Please enter your comment!
Please enter your name here