Ministru Koordenadór ba Asuntu Ekonómiku (MCAE), Joaquim Amaral, vizita kompañia ACELDA, Unip Lda, hodi haree diretamente atividade investimentu ne’ebé hala’o hosi kompañia refere, liuliu haree ACELDA halo produsaun mina-kamí. Imajen/Mídia MCAE

BAUCAU, 14 novembru 2020 (TATOLI) – Poténsia natureza  Timor-Leste nian la fó duvida ona ba Timoroan atu moris mesak no kaer kuda-talin mesak iha tempu ukun rasik-an ne’e.  Panorama ne’ebé horik iha rai-laran hosi Jaco to’o Oe-Cusse hariku duni Timor-Leste.  Ho nune’e, fó biban boot ba Timoroan atu administra  ka esplora  poténsia ai-horis sira-ne’e hodi haku’ur ba merkadu internasionál.

Ai-kamí. Imajen/Foti hosi Google

La dúvida ona iha mundu nia futar matan, katak Timoroan nia kafé sai valor orgániku boot iha merkadu internasionál. Maibé iha mós poténsia ai-fuan ka ai-horis seluk. Ezemplu maka kamí.

Kamí ho nia naran sientífiku Aleurites moluccanus ne’e sai hanesan ona ai-fuan ne’ebé iha poténsia ekonómika boot ba merkadu internasionál, nune’e kontribui pasu pozitivu ida mai Timor-Leste iha merkadu esportasaun.

Haree ba poténsia ekonomia ne’ebé bele fó “milagre” rendimentu mai Timoroan, kompañia Acelda  ho nia baze iha Suku Triloca, Baucau, no  lidera hosi Eugénio da Costa Freitas, aproveita daudaun ona  poténsia ai-fuan kamí ne’e hodi prodús kamí-fuan ba mina-kamí no esporta ba rai-li’ur hanesan Estadus Unidu Amérika (EUA) ho Macau.

“Iha 2019 ba kotuk, kada tinan, ita halo esportasaun mina-kamí ne’ebé prodús iha ne’e dala tolu kada tinan ba rai-li’ur, dala tolu ne’e dala ida halo esportasaun ho kuantidade barrel  76, entaun dala-tolu ita halo esportasaun mina-kamí barrel 228,” Eugénio da Costa Freitas, hateten bainhira dada-lia ho Agência Tatoli iha baze produsaun mina-kami iha Suku Triloca, Postu Administrativu Baucau Vila, Munisípiu  Baucau, sábadu ne’e.

Iha situasaun pandemia Coronavirus ka COVID-19  ne’ebé afeta mundu tomak prejudika tebes atividade esportasaun mina-kami hosi Acelda, ho nune’e, tinan ne’e, Acelda konsege halo esportasaun dala-ida de’it.

Eugénio da Costa Freitas, haktuir, kada loron kompañia bele prodús mina-kamí bidón-lima (5) ba leten no funsionáriu ne’ebé agora daudauk servisu iha Acelda permanente hamutuk na’in-10 no la permanente (temporáriu) na’in-10 ne’e ba produsaun mina kamí. Enkuantu total funsionáriu iha kompañia Acelda hodi prodús sabaun, sampo, dulas hare hamutuk na’in-50.

Benefísiu hosi mina-kamí

Kamí-fuan. Imajen/foti hosi Google

Sai ona segredu públiku, katak mina-kamí iha nia efikásia (khasiat/eficácia) ba fuuk nia di’ak (saúde do cabelo) ka ba mós saúde isin lolon nian, liuliu halo terapia ba bebé-oan sira ne’ebé isin moras.

Bele dehan, benefísiu hosi mina-kamí ba ema nia-saúde barak tebes no la’ós ona mitos.  No tuir artigu publikasaun balun iha KOMPAS.com, haktuir, kamí ho nia naran sientífiku Aleurites moluccanus nu’udar ai-fuan hosi ai-kamí ne’ebé barak liu moris iha rai sira iha klima tropikál.

Benefísiu seluk tan ba ema nia saúde hosi mina-kamí mak alivia azma  (meredekan asma), bele kura doenças digestivas (penyakit pencernaan) to’o halo forte fuuk no oho kaspa (ketombe) sira no seluk-seluk tan.

Jornalista: Hortencio Sanchez

Editór: Francisco Simões

HAKEREK NO HATÁN

Please enter your comment!
Please enter your name here