Imajen/Mídia Ministériu Saúde.

DILI, 14 novembru 2020 (TATOLI)–Governu liuhosi Ministériu Saúde kongratula liña frente sira hanesan Profisionál Saúde, komunidade no mós populasaun ho parseiru sira ne`ebé durante ne’e kontribui ba iha prevensaun moras COVID-19.

Notísia Relevante: Timor-Leste livre hikas hosi COVID-19

“Governu kongratula liña frente sira liuliu profisionál saúde sira no mós komunidade no parseiru sira ne’ebé durante ne’e servisu makaas hodi kontribui ba iha prosesu prevensaun COVID-19 no susesu ba COVID-19 ne’e,”  Koordenadora Jéral COVID-19 Ministériu Saúde, Odete  da Silva Viegas, dehan ba jornalista sira durante konferénsia imprensa ne`ebé hala`o iha Palásiu das Cinzas, Caicoli, Dili, sábadu ne`e.

Nia hatutan, globalmente COVID-19 ne`e sei eziste, entaun timoroan ida-idak tenke nafatin matan moris neon na`in hodi haree ba ema ruma ne’ebé tama illegal liuhosi fronteira karik, autoridade lokál sir abele foti asaun lalais hodi koordena ho imigrasaun ka Ministériu Saúde hodi bele hatama ema sira-ne’e iha kuarentena.

“Karik iha ema ruma ne`ebé tama ilegal iha liña fronteira ou bele ultrapasa tiha ona liña fronteira, tama to`o sidade ka iha munisípiu, husu nafatin ba entidade relevante liuliu autoridade lokál sira, xefe suku, xefe aldeia, diretór sira iha munisípiu, atu bele foti asaun lalais, koordena lalais ho imigrasaun, Unidade Patrullamentu Fronteira (UPF) no Ministériu Saúde hodi bele hatama ita-nia maluk sira iha fatin kuarentena,” nia dehan.

Entretantu, Koordenadora Jéral COVID-19 Ministériu Saúde ne’e mós fó apresiasaun boot ba mídia ka jornalista sira ne`ebé sempre hato`o informasaun sira ba iha públiku, atu nune`e komunidade sira bele hatene atu nafatin alerta, atu nune`e ita hotu-hotu bele fó liman ba malu, nune`e bele prevene ba moras COVID-19 iha Timor-Leste iha loron aban.

Jornalista: Nelia Fernandes

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here