Vizita Sekretáriu Estadu Komunikasaun Sosiál, Merício Juvinal dos Reis ‘Akara’ ho komitiva iha suku Muapitine, sesta (13/11). Imajen TATOLI/Natalino Costa

LAUTÉM, 13 novembru 2020 (TATOLI)—Sekretáriu Estadu Komunikasaun Sosiál, Merício Juvinal dos Reis ‘Akara’ hamutuk ho komitiva, halo vizita ba suku Muapetine, postu administrativa Lospalos, munisípiu Lautém hodi halo diálogu komunitária.

Iha diálogu ne’e, Xefe suku Muapetine, Lívio Mendes, hateten programa ‘Naroman ba Suku’ konsege fasilita informasaun hodi Ministériu Obra Públika (MOP) liuhosi Institutu Jestaun Ekipamentu (IGE, sigla portugés) normaliza  estrada emerjénsia ne’ebé hetan estragu durante inundasaun iha suku ne’e.

“Ne’e output di’ak ida husi programa ne’e, tanba bele lori preokupasaun komunidade iha suku ba nasionál hodi ministériu kompetente bele rezolve,” Líder komunitáriu ne’e dehan sesta ne’e iha suku Muapitine.

Notísia Relevante: Xefe Suku Muapitine Kompromete Kolabora ho Parte Hotu Hodi Jere Sentru Informasaun

Nia haktuir, hafoin lansamentu programa Governu ne’e, responsável sira organiza kedan atividade hanesan kapasita joven iha área jornalizmu hodi transmite informasaun ba komunidade kona-ba atividade governativa nune’e bele akompaña ho di’ak.

“Haruka joven sira tuir formasaun oinsá halo kobertura hodi divulga informasaun tanba ita-nia komunidade balun iha ne’e la konsege akompaña informasaun,” nia akresenta.

Iha fatin hanesan, komunidade suku Muapitine, Amelio Ximenes  Garcia ‘Maualsi’ husu ba Sekretaria Estadu Komunikasuan Sosiál (SEKOMS) atu esplika didi’ak programa Naroman ba Suku tanba komunidade balun seidauk komprende, maski programa ne’e lansa ona iha suku ne’e.

“Bainhira halo atividade iha suku laran, ita nunka rona sai iha mídia, haree iha televizaun, entaun programa ne’e bainhira maka atu la’o. Tanba ne’e, parte husu SEKOMS bele ajuda fó hanoin ba responsável iha suku ne’e hodi bele hala’o programa ho di’ak,” nia dehan.

Hatan ba kestaun ne’e, Sekretáriu Estadu Akara, esplika programa Naroman ba Suku mai ho objetivu atu dada Governu besik liu povu, liuhosi divulga atividade governativa husi nasionál.

Aleinde ne’e, programa ne’e identifika potensialidade no atividade suku hodi transmite.

“Tanba ne’e hafoin lansamentu programa, iha atividade lubuk ida maka halo no komunidade ne’ebé toma konta ba programa hetan ekipamentu atu harii sentru informasaun, joven hahú hetan treinamentu husi ekipa SEKOMS oinsá halo relatóriu no notísia, kaer kamera, halo operasaun ba komputadór no seluk tan,” nia akresenta.

Hafoin responsável ba sentru informasaun iha suku lansa atividade suku liuhosi pájina iha Facebook.

“Joven iha Muapetine hetan formasaun husi ekipa formadór SEKOMS no sira hahú lansa profile suku,” nia hatutan.

Iha loron 18 fevereiru 2020, SEKOMS lansa programa Naroman ba Suku no inaugura sentru informasaun suku Muapitine no atividade ne’e prevee orsamentu $11.250 liuhosi transferénsia públika, kompostu husi $10.250 hodi reabilita sentru no $1.000 hodi hala’o programa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here