Kapitaun Karketu Dili FC, Ologario Boavida. Imajen/foti hosi Facebook

DILI, 13 novembru 2020 (TATOLI) – Treinadór prinsipál Karketu Dili FC, António Timotio Moreira, dada-iis ho kontente bainhira rona ninia eis kapitaun, Ologario Boavida, fila-mai reforsa Karketu iha tasa 12 Novembru, epoka ne’e.

Ologario Boavida, jogadór prinsipál Karketu Dili FC ne’ebé muda tiha ona ba Boavista FC Timor. Maibé ba tasa 12 Novembru ne’e, Boavida deside fila-mai Karketu Dili FC hanesan klube ne’ebé uluk fó ba nia títulu kapitaun.

Treinadór prinsipál Karketu Dili FC, António Timotio Moreira. Imajen/foti hosi Facebook

“Karketu Dili FC nia preparasaun hosi kedan remata jogu kopa Federasaun Futeból Timor-Leste (FFTL) nian ne’e deskansa tiha semana ida, ami kontinua kedan preparasaun ba tasa 12 de Novembru no jogadór sira mantein nafatin.  Iha jogadór ida mak antes ne’e ba joga iha Boavista FC Timor, maibé nia hakarak fila fali mai ami simu nia tanba nia uluk iha Karketu hanesan kapitaun. Nia mak Ologario Boavida. Nia fila mai nia mak sei sai nafatin hanesan kapitaun,” António Timotio haktuir ba Agéncia Tatoli, ohin, iha kampu FFTL, Dili.

Nia dehan, Ologario Boavida fila mai Karketu iha nia vontade rasik no iha kopa FFTL jogadór refere joga iha Boavista FC Timor tuir nia vontade rasik.

“Nia fila mai ne’e tuir nia vontade rasik, nia ba joga iha Boavista mós nia vontade rasik. Nia fatin iha Karketu hanesan lideransa ida ne’ebé jestór  Karketu mós respeitu tanba kapitaun ba Karketu nanis kedan ona,” nia dehan.

Ologario muda tinan kotuk ba Boavista, substitui kedan hosi jogadór Jorge Pereira, maibé Ologario fila Jorge sei entrega hikas pozisaun ne’e.

Tuir oráriu ne’ebé anunsia ona hosi LFTL Karketu iha nia jogu primeiru kontra DIT FC  iha Estadu Munisipál Dili, kuarta (18/11).

Jornalista   : Hortencio Sanchez

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here