Saudozu Mau-Karo 305. Imajen/Espesial.

DILI, 13 novembru 2020 (TATOLI)—Ministru ba Asuntu Kombatente Libertasaun Nasionál (MAKLN), Júlio Sarmento da Costa “Meta Mali”, delega Sekretáriu Estadu ba Asuntu Libertasaun Nasionál (SEAKLN) Gil da Costa Monteiro ‘Oan Soru’ partisipa serimónia transladasaun restu mortál Saudozu Mau-Karo 305.

Serimónia transladasaun restu mortál saudozu Komandante Mau-Karo 305 ne’ebé koñesidu ho komandante “Tigre Fronteira” ne’e, sei hala’o iha Suku Metagou, Postu Administrativu Bazartete, Munisípiu Liquiçá. Saudozu Mau-Karo koñesidu ho komandante “Tigre Fronteira”.

Saudozu Mau-Karo 305 mós nu’udar mós Komandante Pelotaun ba Komandu da Luta Kay Rala Xanana Gusmão. Komandante Mau-Karo 305 mate iha kombate hasoru militár Indonézia iha área Ainaro iha loron 18 setembru 1990.

“Ne’e importante maibé como orsida lorokraik sei iha asuntu iha Konsellu Ministru, entaun ha’u delega ona Sekretáriu Estadu Oan Soru hodi ba partisipa iha serimónia transladasaun ba saudozu Mau-Karo 305 nian iha Metagou tanba Oan Soru mós koñese didi’ak Mau-Karo,” Ministru Júlio Sarmento da Costa informa ba Agência TATOLI iha resintu Parlamentu Nasionál, sesta ne’e.

Iha fatin hanesan, Sekretáriu Estadu ba Asuntu Libertasaun Nasionál (SEAKLN) Gil da Costa Monteiro ‘Oan Soru’, hateten nia sei la haktuir oinsá Saudozu Mau-Karo 305 ninia luta ba libertasaun nasionál.

“Ha’u labele fó-sai sé mak Mau-Karo 305 ne’e, oinsá ho ninia luta ba libertasaun nasionál, Mau-Karo 305 ne’e brani ka lae maibé karik aban ita-boot ba, ha’u sei konta istória sira-ne’e hotu inklui mós ninia biografia,” Oan Soru hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here