Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu. Imajen TATOLI/Egas Cristovão

DILI, 13 novembru 2020 (TATOLI)Liuhosi reuniaun Konsellu Ministru (KM) ezekutivu sira aprova ona projetu rezolusaun Governu kona-ba ezekusaun estratéjia desentralizasaun administrativa no instalasaun órgaun reprezentativu sira ba podér lokál.

Diploma ne’e aprezenta husi Ministru Administrasaun Estatál, Miguel Pereira de Carvalho.

“Projetu rezolusaun Governu ne’e ho forma ida katak to’o mandatu ikus VIII Governu Konstitusionál, bele alkansa administrasaun no autoridade munisipál ida ho estatutu pesoa koletiva públika ho baze institusionál, no autarkia lokál,” Ministru Prezidénsia Konsellu Ministru, Fidelis Manuel Leite Magalhães relata hafoin ramata sorumutuk KM iha Palásiu Governu, sesta ne’e.

Notísia Relevante: Tinan 2020, Governu Hakarak Hakle’an Prosesu Desentralizasaun Administrativa

Portavóz Governu ne’e dehan, rezolusaun ne’e mai atu defini filafali asaun no rezultadu projetadu balun iha estratejia desentralizasaun administrativa.

“Nune’e mós estabelese prazu foun sira ne’ebé iha funsaun viabilidade no iha kapasidade ezekuta asaun hirak ne’e,” nia akresenta.

Preparasaun polítika desentralizasaun 

Konseitu desentralizasaun rasik la’ós atu loke instituisaun barak iha munisípiu, maibé atu hakbesik Governu sentrál ba povu, tanba ne’e presiza hakbiit liután rekursu umanu sira iha área administrasaun no jestaun.

Dezde tinan-2003 to’o agora, Governu halo preparasaun ba polítika desentalizasaun no halo sosializasaun molok implementa polítika desentralizasaun, bazea ba Konstituisaun Repúblika Demokrátika Timor-Leste (RDTL) artigu 72 no Planu Estratéjiku Dezenvolvimentu Nasionál (PEDN).

Artigu 72 konstituisaun RDTL hakerek kona-ba podér lokál iha alínea 1 haktuir, sei harii kbiit lokál ho ema koletivu iha rai-laran ne’ebé iha órgaun reprezentativu, ho knaar atu organiza partisipasaun sidadaun idak-idak  kona-ba solusaun problema rasik iha sira-nia komunidade no atu promove dezenvolvimentu lokál no la afeta partisipasaun Estadu nian.

Nune’e mós, iha alínea 2 husi artigu hanesan hateten, organizasaun, kompeténsia, funsionamentu no kompozisaun órgaun kbiit lokál nian sei define tuir lei.

Antes ne’e, Governu anteriór fó ona delegasaun kompeténsia ba munisípiu Baucau, Bobonaro, Dili no Ermera.

Iha PEDN kapítulu IV haktuir, desentralizasaun ninia prinsípiu maka atu dezenvolve setór privadu, promove instituisaun forte no lejítimu iha nasaun tomak ho estável no mós iha oportunidade partisipasaun demokrátika.

Iha tinan-2016, Governu kontinua polítika desentralizasaun maibé la liuhosi eleisaun munisipál tanba lei laiha, ne’e duni Governu halo esforsu hodi kontinua preparasaun mak iha dekretu lei númeru: 3/2016 ne’ebé alteradu ho dekretu lei númeru 9/2018, ne’ebé mensiona katak preparasaun sei liuhosi deskonsentrasaun administrativa, katak tau munisípiu hanesan administrasaun direta hosi Estadu.

Enkuantu, desentralizasaun innstitusionál, hatúr munisípiu nu’udár administrasaun indireta husi Estadu no desentralizasaun territoriál hatúr munisípiu sira nu’udár Governu lokál ida ho ninia asembleia munisipál.

Rezolusaun apoia polítika desentralizasaun

Iha loron 5 marsu 2019, VIII Governu Konstitusionál liuhosi enkontru Konsellu Ministru, aprova rezolusaun ida hodi fó apoiu polítika implementasaun desentralizasaun administrativa ba munisípiu sira seluk.

Ministériu Administrasaun Estatál submete rezolusaun ne’e hodi kesi ministériu ne’e ho ministériu relevante, hodi fó apoiu ba prosesu desentralizasaun hodi bele la’o ho efetivu, nune’e tinan haat to’o lima mai bele atinje objetivu podér lokál iha munisípiu sira tuir artigu 72 Konstituisaun.

Nune’e mós, iha aprezentasaun orsamentu 2020, dahuluk, Primeiru-Ministru, Taur Matan Ruak, afirma iha tinan ne’e, Governu prevee ona orsamentu atu fortifika polítika desentralizasaun administrativa.

Ba inisiativa ida-ne’e, Governu prevee ona millaun $3, ne’ebé atu prenxe vaga  sira ne’ebé ezistente iha mapa pesoál autoridade munisipál  no administrasaun munisipál sira.

Aleinde ne’e, prevee mós millaun $9,4, ne’ebé destina atu fó apoiu ba projetu autoridade munisipál  no administrasaun munisipál sira hodi promove iha ámbitu Planu Dezenvolvimentu Integradu Munisipál (PDIM).

Jornalista Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here