Prezidente Komisaun G ne’ebé trata asuntu Edukasaun, Juventude, Kultura no Sidadania, Deputadu António Verdiál de Sousa. Imajen/Tatoli.

DILI, 13 novembru 2020 (TATOLI)—Prezidente Komisaun G ne’ebé trata asuntu Edukasaun, Juventude, Kultura no Sidadania, Deputadu António Verdiál de Sousa, preokupa ho pedidu orsamentu adisionál UNTL purvolta rihun $500 atu hadi’a moru fakuldade enjinária no agrikultura Hera tanba la prevee iha proposta OJE 2021.

“Ha’u rasik fó lia menon ba Magnífiku Reitór UNTL atu halo koordenasaun ho Ministru Ensinu Superiór, no Ministériu Finansa atu nune’e bele hasoru Primeiru-Ministru hodi diskute fali proposta adisonál ne’e,” nia informa ba jornalista sira hafoin halo audensia publika ho UNTL, ohin iha Parlamentu Nasionál.

Notísia Relevante:Dezenvolvimentu UNTL Depende Ba Orsamentu

Mezmu nune’e nia deklara Komisaun la rejeita proposta adisionál ne’e tanba atu dezenvolve setór eduakasaun iha Timor-Leste maibé tenki la’o tuir prosedimentu legal.

Reitór UNTL, Francisco Miguel Martins hateten proposta OJE 2021 ba UNTL hamutuk $20.170.642 maibé la sufisiente tanba ne’e obrigadu tenki husu tan orsamentu adisionál.

“Ita aprezenta mós adisionál ida tuir nesesidade ida ne’ebé presiza tebes mak atu hadi’a moru fakuldade enjinária no agrikultura nian iha Hera tan atu empede invazaun animal no ita ema sira,” nia hateten.

Projetu ne’e kria ona ninia BOQ ka Bill Of Quantity ne’e UNTL ho naruk purvolta killometru hamutuk rua ne’ebé daudaun ne’e aprezenta ona ba Komisaun G atu estuda.

OJE 2021 hamutuk millaun $ 20-resin ne’e aloka ba kategoria saláriu vensimentu $10.726.378, bens servisu $5.166.702, kapitál menór rihun $767.054, kapitál dezenvolvimentu $3.510.508, maibé item transferénsia laiha.

“Ita iha programa prioridade tolu mak sei realiza iha 2021 ho ninia sub programa 21 inklui atividade 61 proposta orsamentu UNTL nian ne’e mak ita propoin atu bele apresiasaun husi ita-nia deputadu sira,” dehan Reitór UNTL, Francisco Miguel Martins, ba jornalista sira hafoin halo audensia ho Komisaun G PN, ohin.

Aleinde ne’e sei ezekuta ba hadia programa boa-Governasaun no jestaun institusionál nian.

Notísia Relevante:FSS/UNTL Sei Kompleta Fasilidade Laboratóriu Komunikasaun Sosiál

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here