Primeiru-Ministru, Taur Matan Ruak partisipa iha seremónia GFAGLE, iha salaun Ministériu Finansa, Aitarak-laran, segunda (28/09). Imajen Tatoli/Egas Cristovão

DILI, 13 novembru 2020 (TATOLI)–Primeiru-Ministru (PM), Taur Matan Ruak, preokupa sidadaun sira hahú la kumpre medida ezekusaun Estadu Emerjénsia (EE) dahitu, ne’ebé mensiona tenke uza máskara iha ámbitu prevensaun pandemia COVID-19 iha Timor-Leste.

Xefe Governu hato’o preokupasaun ne’e bainhira partisipa iha seremónia Graduasaun Kursu Formasaun Avansada ba Governasaun no Lideransa Estratéjika (GFAGLE) ne’ebé realiza husi Institutu Nasional Defeza (IDN) iha salaun Ministériu Finansa, Aitarak-laran, sesta ne’e.

Iha seremónia ne’e, Xefe Ezekutivu nota katak maioria partisipante hahú husi diretór jerál, nasionál no funsionáriu sira la uza máskara.

“Ha’u ohin tama mai, ha’u hanoin ha’u mesak mak uza máskara, ita hotu tenke hatene katak agora iha Estadu Emerjénsia nia laran ne’ebé iha regra ejize distánsiamentu sosiál no ba dahuluk Prezidente Repúblika husu atu ita tau iha dekretu Governu ba implementasaun Estadu Emerjénsia nian, maibé hafoin ha’u hambriik no haree ami oituan loos mak uza máskra, ita hanesan abuzu oituan maibé ha’u husu atu ba oin kontinua tau atensaun atu risku kontáziu labele etinjida,” PM Taur dehan liuhosi intervensaun iha seremónia.

Notísia Relevante: Governu aprova medida ezekusaun EE dahitu

 EE dahitu abranje iha territóriu nasionál tomak no vigora iha tuku 00:00 loron 04 novembru to’o tuku 23:59 loron 03 dezembru 2020.

Iha loron 28 outubru 2020, Governu liuhosi reuniaun Konsellu Ministru aprova projetu dekretu Governu, ne’ebé aprezenta husi PM kona-ba medida ezekusaun EE, ne’ebé renova tuir dekretu Prezidente Repúblika númeru 66/2020, loron 27 outubru hodi hatán ba pandemia COVID-19.

Iha medida ezekusaun EE ba dahitu ne’e haktuir katak iha obrigasaun atu mantein distánsia pelu menus metru ida-resin ba ema seluk maibé la inklui distánsia sosiál iha família sira iha uma laran, utiliza máskara oin ne’ebé taka inus no ibun bainhira iha asesu ka mosu iha resintu públika no privadu.

Nune’e mos, mantein fase liman bainhira hakarak tama ba estabelesementu komersiál, industriál ka edifísiu ne’ebé funsiona serbisu administrasaun públika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here