DILI, 13 novembru 2020 (TATOLI)—Ministériu ba Asuntu Libertasaun Nasionál lideradu Júlio Sarmento da Costa “Meta Mali” propoin millaun $104,5 ba proposta-lei Orsamentu Jerál Estadu (OJE) tinan fiskál 2021.
“Ami-nia orsamentu millaun $104,5-resin no ami fó prioridade ba dadus veteranu 2009 nian, jardín eroi ba munisípiu sira, halo levantamentu ba formuláriu uma-lisan sira hodi identifika mate ne’e komesa hosi ema boot ka ema kiik, halo funu ka la halo funu depois sei halo monumentu iha postu administrativu 65, nune’e ita bele hatene suku ida ema mate hira,” Ministru ba Asuntu Libertasaun Nasionál, Júlio Sarmento da Costa “Meta Mali,” ko’alia hafoin hala’o audiénsia públika ho Komisaun F (veteranu, saúde, seguransa sosiál no igualdade jéneru) iha Parlamentu Nasionál, sesta ne’e.
Bazeia ba livru 2 (Planu Asaun Anuál) previstu medidia prinsipál setoriál hosi MAKLN ba tinan fiskál 2021 mak hanesan promove, asegura kontinuidade inisiativa rekoñesementu, glorifikasaun libertasaun nasionál no erói sira, fó kontinuidade pagamentu pensaun, bolsa estudu no apoiu médiku iha estranjeiru ba kombatente sira no oferese kaixaun/urna funerária ba serimónia fúnebre restu mortál mártir no organiza enterru iha jardín erói sira iha Metinaro.
Nune’e mós organiza serimónia komemorativa ligada ba kombatente libertasaun nasionál no istória resente nasaun nian, garante funsionamentu Conselho dos Combatentes da Libertação Nacional (CCLN), promove konstrusaun jardín erói sira no semitériu espesiál ba kombatente libertasaun nasionál no promove boa governasaun no jestaun institusionál iha ministériu refere.
Hosi medida prinsipál hirak ne’e Ministériu ba Asuntu Kombatente Libertasaun Nasionál propoin montante $104,521,000 ba tinan fiskál 2021, inklui montante $93,596,911 destinada pagamentu pensaun ba kombatente libertasaun nasionál liuhosi transferénsia públika.
Montante orsamentu $104,521,000 ne’ebé koloka ba saláriu vensimentu $ 618,934, bens servisu $ 5,976,605, kapitál minór $ 328,550, kapitál dezenvolvimentu $ 4,000,000 no transferénsia públika $ 93,596,911.
Iha audiénsia públika ne’e akompañadu hosi Sekretáriu Estadu ba Asuntu Libertasaun Nasionál (SEAKLN) Gil da Costa Monteiro ‘Oan Soru’.
Jornalista: Evaristo Soares Martins
Editór: Cancio Ximenes
