Diretór Agro-Komérsiu no Kooperasaun Setór Privadu hosi MAP, Fernando Amaral. Imajen TATOLI/Cipriano Colo

DILI, 13 novembru 2020 (TATOLI)—Minstériu Turízmu, Komérsiu no Indústria (MTKI) daudaun ne’e identifika ona loja hamutuk 10 disponível troka voucher ho sasán no iha posibilidade sei aumenta tan loja balun iha ámbitu implementasaun programa Cesta Bázika.

Diretór Agro-komérsiu Ministériu Agrikultura no Peska (MAP), Fernando Egídio Amaral, hateten Loja Agricultores rua iha Timor Plaza no Fatuhada Dili, prepara ona produtu.

“Produtu ne’ebé sei troka ba voucher maka foos kilograma 5 ba ema ida, tanba normalmente ita-nia família ida iha ema na’in-lima, entaun ita hetan ona kilograma 25, batar hikis kilograma 3, koto kilograma 1,5, ikan masa ida ho folin $7, na’an bibi, na’an karau, no produtu ortíkula ekivalente ho $5. Kona-ba modo tahan, depende atu hili repollu ka alfase,” Diretór ne’e hateten ba Agência TATOLI, iha ninia knaar fatin, MAP, Comoro, kuarta ne’e. 

Notísia Relevante: MTKI identifika loja 10 troka voucher Cesta Bázika iha Dili

Nia garante, loja ne’ebé organiza husi MAP ne’e, sei prepara produtu ho kualidade tanba durante ne’e serbisu hamutuk ho Programa Nasaun Unida ba Dezenvolvimentu (PNUD) no laiha krítika ruma husi agrikultór no benefisiáriu sira.

“Kona-ba Cesta Bázika, ita-nia Loja Agricultores iha esperiénsia durante fulan-tolu resin serbisu hamutuk ho PNUD hodi implementa food basket ba benefisiáriu 250.000 no serbisu hamutuk ho sira rigorozu tebes,” nia subliña.

Ho esperiénsia fulan-tolu ne’e, nia espera MTKI bele aprova proposta hodi sai fornesedór ba benefisiáriu iha Dili laran.

Diretór agro-komérsiu ne’e garante katak, produtu lokál sira ne’ebé daudaun sira prepara fresku hotu tanba iha kontainer no armajen ne’ebé uza ho kualidade.

Nia mós garante katak, ai-han ne’ebé Loja Agricultores prepara sufisiente ba benefisiáriu iha Dili hamutuk 157.648.

“Pelu menus ita halo esforsu atubele atende 70% ba ai-han lokál ne’ebé iha, ida-ne’e sufisiente,” nia akresenta.

Entretantu, ba fornesimentu produtu troka ho voucher, Loja Agricultores halo konsórsiu ida ho setór privadu no asosiasaun agrikultór, inklui agrikultór individu balun mós lori rasik sira-nia produtu mai hatama iha loja ne’e.

“Polítika loja ne’e maka foti 10% to’o 15% de’it,  katak 85% osan husi fa’an produtu ne’e, sei filafali ba agrikultór sira. Entaun, hela ba loja maka 15% hodi aluga fatin no ahi,” Fernando Egídio esplika.

Jornalista: Cipriano Colo

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here