Tratór. Imajen/Espesiál

DILI, 13 novembru 2020 (TATOLI)Komunidade suku Muapitine, Amelio Ximenes Garcia ‘Maualsi’ husu Ministériu Agrikultura no Peska (MAP) atu apoia tratór nune’e bele ajuda komunidade halo atividade agrikultór ho di’ak.

“Ami-nia agrikutór presiza tratór atubele suporta atividade,” Amelio Ximenes hateten liuhosi diálogu komunitária iha ámbitu vizita Sekretáriu Estadu Komunikasaun Sosiál, Merício Juvinal dos Reis ‘Akara’, sesta ne’e, iha suku Muapetine, postu administrativa Lospalos, munisípiu Lautém.

Nia nota katak tratór iha suku, iha munisípiu seluk barak maibé iha suku ne’e kuaze laiha.

“Governu presiza buka meus oinsá tratór bele mai, ami presiza tratór rua,” nia akresenta.

Tanba ne’e, nia espera preokupasaun ne’e Sekretaria Estadu Komunikasaun Sosiál (SEKOMS) bele hato’o ba ministériu relevante atubele rezolve.

“Ami presiza apoiu husi Estadu, ami-nia nesesidade agora maka tratór tanba ami ho liman de’it sei la la’o. Atividade agrikultór iha nasaun seluk la’o ho susesu tanba ekipamentu ne’e barak,” nia hatutan.

Iha biban ne’e Sekretáriu Estadu Akara kompromete sei hato’o kestaun ne’e ba ministériu relevante atu tau atensaun.

“Ha’u sei ko’alia ho ha’u-nia tékniku sira atu komunika Ministériu Agrikultura no Peska,” nia dehan.

Antes ne’e, Diretór Servisu Munisipál Agrikultura Lautém, Edmundo da Costa, informa daudaun iha munisípiu ne’e iha tratór boot hamutuk 40, maibé 28 maka a’at no 12 mak sei halo operasaun.

Nia dehan, iha nível munisípiu hasoru difikuldade tanba jestaun ba manutensaun ekipamentu agríkola sentraliza iha nasionál no atu hadi’a tenke halo proposta.

Iha tinan 2007 no 2008, MAP implementa programa sosa tratór hodi halo intensifikasaun no reabilitasaun ba fasilidade agrikultura hodi atende kestaun seguransa ai-han.

Governu sosa tratór hamutuk 300 no tratór liman 2.250 hodi fahe ba agrikultór sira hodi hasa’e produsaun agríkola.

Daudaun iha 400 resin tratór maka iha, maibé tratór sira ne’e kuaze kondisaun a’at tanba tratór hirak ne’e dezde 2008.

Kada tinan, MAP sempre prevee orsamentu atu halo manutensaun ba tratór sira.

Antes ne’e, Primeiru-Ministru, Taur Matan Ruak, orienta MAP atu hala’o leilaun ba tratór sira no konsege halo leilaun tratór hamutuk 56 maibé ema foin sosa rua.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here