Ministru Prezidénsia Konsellu Ministru, Fidelis Manuel Leite Magalhães no Portavóz Governu. Imajen TATOLI/Egas Cristovão

DILI, 13 novembru 2020 (TATOLI)Iha reuniaun Konsellu Ministru (KM) iha sesta ne’e, ezekutivu sira aprova projetu deliberasaun hodi atribui Medalla Méritu ba militár Korea Súl.

Diploma ne’e aprezenta husi Ministra Negósiu Estranjeiru no Kooperasaun, Adaljiza Albertina Xavier Reis Magno.

“Governu sei atribui medalla ba sira ne’ebé mak mate iha Timor-Leste,” Ministru Prezidénsia Konsellu Ministru, Fidelis Manuel Leite Magalhães, relata hafoin sorumutuk KM iha Palásiu Governu.

Liuhosi projetu deliberasaun ne’e, militár indikadu sei hetan Medalla Méritu ho Títulu Póstumu inklui  Batallaun Sul-Koreanu ROKBATT VII, ne’ebé mate iha Timor-Leste iha loron 23 outubru 2003.

“Atribuisaun ne’e hodi rekoñese no agradese sira-nia kontributu signikativu ba páz no estabilidade nasionál,” nia akresenta.

Iha tinan 1999, Governu koreanu halo destakamentu forsa hamutuk 3.000 resin mai Timor-Leste hodi fó apoiu ba konstrusaun Estadu no manutensaun pás.

Forsa koreanu sira halo misaun dahuluk iha munisípiu Lautém, hafoin destaka ba Oé-cusse, hafoin na’in-lima lakon vida tanba mota boot lori iha mota Noel Ekab, postu administrativu Oesilo, Oé-cusse, durante garante pás no seguransa iha Timor-Leste.

Militár Koreia sira ne’ebé mate iha asidente mak hanesan Maiór Byong Jo Min, Maiór Jin Kyu Park, Kopral, Jong Hun Membali no Kopral, Hee Choi no Kim Jung Joung.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here