Sekretáriu Estadu Komunikasaun Sosiál, Merício Juvinal dos Reis ‘Akara’ ho komitiva, halo vizita ba Monumentu Masakre Muapitine, sesta (13/11). Imajen TATOLI/Natalino Costa

LAUTÉM, 13 novembru 2020 (TATOLI)Família vítima Masakre Muapitine 08 dezembru 1983, husu Governu atu hadi’a monumentu iha suku Muapitine, postu administrativu Lospalos, munisípiu Lautém.

Tuir família vítima Masakre, Mariana Marques, Estadu presiza dignifika no valoriza mártir sira ne’ebé Militár Indonézia oho.

“Karik hadi’a bele tau ema ne’ebé mate nia naran no imajen idaidak hodi sai hanesan jardín ida,” Mariana Marques dehan iha diálogu komunitáriu iha ámbitu vizita Sekretáriu Estadu Komunikasaun Sosiál, Merício Juvinal dos Reis ‘Akara’, sesta ne’e iha suku Muapetine.

Biban ne’e, nia rekomenda Governu bainhira halo levantamentu ba akontesimentu ne’e, bele halo ketak entre vítima Masakre Muapitine no antigu kombatente.

Nia konsidera, durante ne’e Governu ladún tau atensaun ba kestaun ne’e maski família vítima halo ona esforsu.

“Dalaruma ami hateke tuir ho mataben, triste ho laran moras, bainhira la valoriza ami-nia família ne’ebé mate iha ema barak nia oin iha suku nia laran. Tanba ne’e, ami husu Sekretáriu Estadu Komunikasaun Sosiál bele hato’o ba nasionál nune’e bele konsidera,” nia akresenta.

Iha fatin hanesan, Xefe Suku Muapitine, Lívio Mendes, hateten daudaun ne’e iha Organizasaun Naun Governamentál husi Amérika maka fó apoiu fundu oituan hodi bele hadi’a monumentu.

“Bainhira ita la dignifika no valoriza, eroi sira sei taka dalan ba dezenvolvimentu,” nia akresenta.

Autoridade suku ne’e dehan, uluk mártir sira sakrifika-an ba mate no família sira terus, tanba ne’e Governu presiza tau atensaun hodi valoriza, nune’e sira-nia espíritu nafatin akompaña ita iha prosesu dezenvolvimentu.

“Governate barak mai haree ona fatin ne’e maibé seidauk hadi’a. Ha’u hato’o ona ba governante sira maibé laiha resposta to’o ohin loron,” nia haktuir.

Ba asuntu ne’e, Sekretáriu Estadu Akara promete sei hato’o ba ministériu relevante hodi rezolve kestaun ne’e.

“Membru Governu ne’ebé tutela ba asuntu ne’e hanesan veteranu no nia mós hateten bebeik katak sei halo buat di’ak ba veteranu sira no bele jere sira-nia osan. Ha’u hanoin VIII Governu fó importánsia ba kestaun ne’e,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here