Diretora Ezekutiva FDCH, Leila Cárceres dos Santos. Imajen Tatoli/Egas Cristóvão

DILI, 13 novembru 2020 (TATOLI)Fundu Dezenvolvimentu Kapitál Umanu (FDCH, sigla portugés) prevee millaun $12.995.000 iha Orsamentu Jerál Estadu (OJE) tinan fiskál 2021, ho prioridade ba kapitál sosiál liuliu bolsu estudu.

Husi totál ne’e aloka ba bens no servisu atu prioritiza programa haat hanesan programa formasaun  profisionál $1.077.800, programa treinamentu tékniku $3.146.452, programa bolsu estudu $7.764.215, no programa seluk ho tipu formasaun $1.006.533.

Ba kapitál sosiál no reforsa insititusionál, orsamentu alokadu boot liu ba bolsu estudu ho montante $7.764.215, ne’ebé ekivalente ho 59,7% husi totál orsamentu FDCH.

“Ita fó prioridade ba bolsu estudu hanesan kontinuidade husi liña ministeriál no bolseiru foun husi Ministériu Ensinu Superiór ba kbiit la’ek nia oan sira hanaran bolsa hakbiit, no bolsu estudu ba dosente privadu no públiku sira. Maibé ho situasaun COVID-19, ita labele haruka ba rai li’ur maibé ami halo planu iha ano zero iha rai laran,” Diretora ezekutiva FDCH, Leila Cárceres dos Santos, informa sesta ne’e, iha ámbitu audiénsia públika konjunta iha sala plenária Parlamentu Nasionál.

Programa bolsu estudu atu aumenta mós koñesimentu no abilidade akadémika hodi bele kontribui ba dezenvolvimentu ekonomia.

“Ita-nia benefisáriu ba bolsu estudu hamutuk 1.154 no ita-nia meta mak atu forma tan bolseiru 2.345, kompostu husi feto 1.115 no mane 1.230,” nia akresenta.

Tinan 2021, FDCH iha sub-programa 21 no totál atividade 59, ne’ebé númeru benefisiáriu hamutuk 19.873, kompostu husi feto 9.913 no mane 9.760.

Dirijente ne’e refere ba formasaun profisionál atu hasa’e abilidade joven sira hodi bele responde ba nesesidade indústria no merkadu traballu iha Timor-Leste, jere husi Sekertaria Estadu Profisionál Peofision no Empregu (SEFOPE) iha área formasaun lian korea no inglés iha Dili no Rejiaun Administrasaun Espesiál Ambeno no Oé-cusse (RAEOA).

“Ita forma ona joven hamutuk 5.044, bazeia ba relatóriu 2019 no meta mak atu forma tan benefisáriu hamutuk 2.872, kompostu hosi feto hamutuk 672 no mane 2.186,” nia hatutan.

Nune’e mós, kontinua halo formasaun tékniku atu dezenvolve kapasidade funsionáriu públiku hodi bele mellora di’ak liután prestasaun serbisu ajente administrasaun públika, formasaun ba área judisiária no ba profesór sira iha lian portugés.

Funsionáriu ne’ebé sai benefisáriu formasaun téknika hamutuk 4.482 ho meta atu fó formasaun tan 16.890, kompostu husi feto 8.364 no mane 8.526.

Hahú 2011 to’o outubru 2020, FDCH liuhosi programa formasaun profisionál, forma ona joven 32.678, ba programa formasaun téknika ne’ebé benefisiáriu husi funsionáriu públiku hamutuk 32.688, ba programa bolsu estudu 5.266 no programa formasaun tipu seluk hamutuk 11.295.

“Ba Programa bolsu estudu rasik ita iha estudante sira ne’ebé sei ativu to’o agora hamutuk 1.151 no sira ne’ebé gradua ona porvolta 3.848 no kanseladu ho razaun mate no seluk tan hamutuk 267,” nia katak.

Jornalista: Florêncio Miranda Ximenes

Editora: Julia Chatarina

3 KOMENTÁRIU

  1. Oinsa mak ho Ami sira hetan bolsu estudo no termina ona ami nia estudo iha rai liur, Ita hatene katak Ita nia nasaun precija Recursos humanos tan nee hodi haruka timoroan barak babhetan formasaun iha Rai liur, maibe Ema sira ne termina sira nia estudo Estado labolu hodi ajuda desenvolve ita nia rai

  2. Oinsa ho Ami uluk Tama universidade maibe la konsege remata😊Ida ne Ami bele partisipasi iha bolsu estudo Ida ne ga Lae,obrigado

HAKEREK NO HATÁN

Please enter your comment!
Please enter your name here