Prezidente Repúblika, Francisco Guterres Lú Olo. Imajen TATOLI/ António Gonçalves

DILI, 12 novembru 2020 (TATOLI)–Prezidente Repúblika, Francisco Guterres ‘Lú Olo’, husu ba líder polítiku sira atu tau hamutuk ideia no diferénsa hotu atu kontinua lori moris di’ak ba povu no nasaun.

Notisia Relevante: PR Lú Olo husu Governu kumpre promesa harii Monumentu 12 Novembru

“Ha’u hanoin unidade líder polítiku sira iha tempu uluk nian ho ninia objetivu oin seluk, unidade hotu-hotu hamutuk atu liberta patria. Agora, unidade ne’e iha diversidade ida-nia laran katak kada ema ida-idak iha nia partidu, klaru iha diversidade maibé dentru iha diversidade nia laran, buka atu hadi’a povu no nasaun nia moris di’ak. Ita bele buka atu líder sira bele buka saida mak hanesan no saida mak lahanesan, klaru ita tau hamutuk hodi bele hadia ita-nia rain,” Prezidente Repúblika, Francisco Guterres ‘Lú Olo’ ba jornalista sira hafoin partisipa selebrasaun Masakre Santa Crus ba dala-XXIX  no loron Nasionál Juventude ba dala-15 iha Semitériu Santa Crus, Dili, kinta ne’e.

Nia  hatutan, nia la fiar se líder partidáriu sira kuandu sa’e iha palku leten, sira la ko’alia kona-ba edukasaun, saúde, bee-moos, eletrecidade, estrada no eskola kualidade ba timoroan sira, hotu-hotu ko’alia entaun tau halibur hamutuk ideia hirak ne’e.

“Se uluk ami hotu hotu ko’alia ba povu palku leten ko’alia asuntus sira-ne’e, ohin loron saida mak diferensa atu ita bele fahe malu. Ha’u-nia hanoin hotu-hotu ko’alia ida-ne’e, tau hamutuk ida ne’e atu bele hadi’’a povu no ita-nia rain. Oitavu Governu Konstitusionál ne’e iha empeñadu atu hadi’a buat sira-ne’e,” nia hateten.

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here