Lorico Adventure selebra loron Masakre Santa Krús ba dala-28 ( 12 novembru 1991-12 novembru 2019), liuhosi tour "Dalan ba Memória" hodi hale'u munisípiu 12 inklui Rejiaun Administrativu Espesiál Oe-Cusse Ambeno. Imajen/Lorico Adventure

DILI, 12 Novembru 2020 (TATOLI)—Prezidente Repúblika, Francisco Guterres ‘Lú Olo’, agradese ho inisiativa sobrevivente Masakre Santa Cruz, Nelson Turquel, ne’ebé hamutuk ho joven sira seluk hamosu grupu ida hanaran Lorico Adventure “Semo Lemorai” haleu Timor-Leste hodi konta instória ba povu iha área rurál.

Notisia Relevante: PR Lú Olo husu Governu kumpre promesa harii Monumentu 12 Novembru

PR Lú Olo konsidera, inisiativa hirak ne’e importante tebes hodi hato’o ba povu katak istória Masakre 12 Novembru 1991 nu’udar Loron Nasional Juventude Timor-Leste nian.

“Ha’u louva inisiativa Nelson Turquel ne’ebé hamutuk ho joven sira seluk, hamosu grupu ida hanaran Lorico Adventure ”Semo Lemorai”. Nelson ho joven lubun ida, ho sira-nia organizasaun no suporta rasik, perkorre ho motorizada ita-nia rai-laran tomak, tama to’o área rural remota sira hodi dada-lia ho ita-nia populasaun kona-ba akontesimentu Masakre Santa Cruz no ita-nia luta libertasaun nasionál,” dehan PR Lú Olo liuhosi ninia deskursu ba selebrasaun Masakre Santa Krúz bad ala-29 no Loron Nasionál Juventude iha Semitériu Santa Cruz, Dili, kinta ne’e.

Iha tinan 2018, PR rasi rasik mak entrega Bandeira Nasionál ba Lorico Adventure molok sira hahú sira-nia atividade perkursu ho referénsia espesiál ba 12 de novembru, ne’ebé sira hanaran ‘Dalan ba Memória’.

Grupu ida ne’e organiza mós eventu sira hanesan ne’e, ba loron importante seluk, hanesan 03 de marsu, ‘Dalan ba Ai-Laran; 20 de agostu, ‘Dalan ba Istória’ no 4 de Setembru, ‘Dalan ba Liberdade’.

Aleinde eventu ne’ebé relasionadu ho TL nia istória no TL nia luta ba libertasaun nasionál, Lorico Adventure Semo Lemorai iha inisiativa solidariedade importante tebes ba populasaun sira ne’ebé kbiit laek. Ho osan ne’ebé sira rasik halibur, sira hahú ona harii Pré-Eskola ida, iha Ersoi/Ermera, iha fatin ida-ne’ebé uluk sai abrigu ba Komandante Nino Konis Santana.

Hafoin COVID-19 sai problema boot ba mundu tomak, inklui ba Timor-Leste, no TL hahú tama iha estadu emerjénsia, grupu ida-ne’e fahe hahan no roupa ba uma-kain liu 2000.

Nelson Turquel no joven sira seluk husi Lorico Adventure horisehik (Kuarta, 11/11/20) hahú ona sira-nia perkursu ho motorizada husi Dili hodi komemora tinan ruanulu resin sia (29) Masakre Santa Cruz nian. Enkuantu, Timor-Leste komemora masakre Dili no selebra Loron Nasional Juventude iha Dili.

Ohin,  PR informa, ekipa anventure ne’e ho sira-nia motorizada hosi Ainaro no sei ba Aileu, Ermera, Liquiça, Maliana, Suai, Same, Viqueque, Lautém, Baucau no Manatuto no sei  filafali mai Dili, iha 21 novembru.

“Ha’u-nia hako’ak boot ba joven Lorico Adventure hotu-hotu. Parabéns ba imi-nia inisiativa hamoris nafatin ita-nia istória luta no memória ba eróina no erói sira,” PR agradese.

Komisaun Organizadora ba eventu selebrasaun Loron Nasional Juventude organiza atividades oioin, inklui kompetisaun hakerek no pintura ba foin-sa’e sira. Prezidente Repúblika hein katak, Sekretaria Estadu ba Desportu no Juventude bele halibur hamutuk produtu husi kompetisaun ida ne’e no no hato’o ba ema hotu-hotu.

Nune’e, bele promove foin-sa’e sira-nia talentu no sira-nia hanoin kona-ba luta ba libertasaun nasionál, juventude sira-nia knaar no valor sira no ispíritu funu nain sira-nian iha kontestu atual no nia aplikasaun ba dezenvolvimentu nasionál.

Timoroan Proteje Aan Hosi Ameasa COVID-19

Iha parte seluk, Xefe Estadu Lú Olo, husu ba juventude Lorico Assw’in Oan-doben Timor-Leste katak ohin loron mundu tomak sei moris iha inserteza boot nia laran, tanba pandemia ne’ebé provoka hosi COVID-19.  Enkuantu sientista sira halo esforsu boot hodi dezenvolve vasina ida atu trava COVID-19, ema liu millaun ida rihun atus rua mate ona no besik millaun lima nulu mak infetadu hela.

“Ita la hatene bainhira loos mak ita bele halakon pandemia ida-ne’e,” dehan PR.

Nia hatutan, demokrasia no mós direitu nian ne’ebé halo povu no nasaun Independente, liu, atu proteje nafatin povu hosi moras COVID-19, sidadaun sira tenke kumpre regra estadu emerjénsia nian hanesan uza beibeik máskara iha fatin ho ema, hadook aan malu metru ida ho balun, fase liman beibeik ho sabaun.

Molok pandemia COVID-19 afeta ema mundu tomak, iha fulan marsu liubá, TL hasoru tiha ona resesaun ekonómika iha rai laran. COVID-19 halo TL situasaun rai-laran aat liután.

“Ita-nia populasaun liu 40% mak moris iha kiak nia laran no família barak moris ho tusan. Ita hotu hatene katak restrisaun hosi estadu emerjénsia, hahú iha fulan marsu tinan ida-ne’e to’o ohin loron, hamenus makaas konsumu família sira-nian. Infelismente dezempregu sae problema boot liután ba ita-nia ekonomia. Prezidente Repúblika hato’o nia apresiasaun ba VIII Governo tanba aprova ona medida ba rekuperasaun ekonómika, no medida balun hahú implementa dadaun ona. Prezidente Repúblika fiar katak medida sira-ne’e sei lori impaktu pozitivu, iha momentu loos hodi tulun ita-nia sidadaun sira hasoru susar oioin,” nia informa.

Ba oin, prezidente husu, Timoroan sira tenke servisu hamutuk, ho matenek no laran tomak no moos, atu rekupera no haburas liután TL nia ekonomia. Nune’e de’it mak bele dezenvolve nasaun hodi garante bein-estar no sustentabilidade b povu tomak.

“Ha’u fiar katak dalan ne’ebé efisiente liu hodi ita prepara futuru ida di’akliu ba ita-nia oan sira mak liuhusi aposta makaas ba sira-nia edukasaun no saúde, hodi aban bainrua sira bele sai produtivu liu no efikás liu, no bele domina teknolojia foun ne’ebé importante tebes iha kontestu atuál,” nia dehan.

Tanba ne’e, Prezidente Repúblika apela ba parte hotu-hotu atu servisu hamutuk, kria espasu ba joven sira atu esplora sira-nia potensial, fó sai sira-nia talentu no kapasidade iha área oioin atu dezenvolve nasaun.

Nia husu nafatin ba juventude bele ajuda Estadu hetan solusaun ba problema hotu-hotu no ajuda Governu implementa Planu Rekuperasaun Ekonómika.

“Juventude Lorico Asswa’in nia isin no raan mak bele sai kbiit no forsa ba imi joven sira agora. Timor-Leste independente presiza timoroan hotu-hotu nia servisu, esforsu, dedikasaun no vontade atu serví. Joven sira tenke estuda, aprende hamutuk no valoriza pasadu nia eroízmu no hanoin polítiku ba futuru. Inisiativa no kreatividade mak sai sasukat loloos ba ezersísiu ita-nia sidadania no ema servisu na’in no prezerva no defende valór luta nian no valór no prinsípiu Estadu nian.

Notisia Relevante: Timor-Leste nia forsa boot mak juventude

Jornalista: Eugénio Pereira

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here