Sekretáriu Estadu Juventude no Desportu, Abrão Saldanha. Imajen Tatoli/ Egas Cristovao

DILI, 12 novembru 2020 (TATOLI)–Sekretáriu Estadu Juventude no Desportu (SEJD), Abrão Saldanha, husu ba juventude atu toma konsiderasaun ba loron 12 novembru hanesan loron juventude nasionál no komomera Masákre Santa Crus nu’udar loron ne’ebé hatudu determinasaun abnegasaun joven sira-nian iha tempu uluk hodi liberta nasaun iha ámbitu komemorasaun 12 novembru ba dala-29.

Abrão Saldanha hateten, espíritu juventude loriku aswa’in sira-nian sei hamutuk ho juventude sira sira-ne’ebé moris iha era ukun rasik-an ne’e bele organiza-an hodi bele hetan moris di’ak tuir saudozu sira-nia mehi hodi liberta povu no rai ida-ne’e hosi mukit.

“Ha’u hanoin espíritu loriku aswa’in sira-nian sei hamutuk ho ita atu oinsá mak foti inisiativa organiza malu liuhosi grupu oin-oin hodibele hetan moris di’ak lalais, tuir saudozu sira-nia mehi hodi liberta nasaun no povu,” Abrão Saldanha haktuir ba Agência TATOLI hafoin partisipa komemorasaun Masakre Santa Crúz ba dala-XXIX no loron Nasionál Juventude ba dala-15 iha Semitériu Santa Crus, Dili, kinta ne’e.

Nia dehan, dezafiu iha tempu ohin loron nian la hanesan ho dezafiu iha juventude iha tempu uluk nian tanba kada jerasaun iha ninia moris no obstakulu rasik.

“Dezafiu joven sira-nian iha tempu uluk mak iha inimigu hosi militár Indonézia iha maibé sira iha  konviksaun boot hodi halo asaun oin-oin hasoru militár Indonézia tanba de’it prinsípiu ukun rasik aan,” nia hateten.

Maski nune’e, nia dehan, joven sira iha tempu ohin loron mós ninia dezafiu rasik mak mosu dezempregu iha rai laran, problema sósiu-ekonómiku no família mosu iha sira-nia leet. Maibé, nia nia parte enkoraja nafatin juventude sira atu bele banati tuir saudozu sira-nia espíritu hodi luta hasoru problema oin-oin iha rai laran.

Abrão Saldanha fó hanoin filafali Prezidente Repúblika ninia diskursu ne’ebé fó sai joven sira seluk ne’ebé mak susesu iha grupu oin-oin hodi kontribui ba susesu komunidade nian no ida-ne’e mak ezemplu ida hosi joven agora hodi luta ba libertasaun dezenvolvimento nasionál.

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here