Sobrevivente 12 Novembru, Nelinha dos Santo Soares (39). Imajen/Espesial.

DILI, 11 novembru 2020 (TATOLI)—Sobrevivente 12 Novembru, Nelinha dos Santo Soares (39), hatete  agora daudaun nia fó formasaun ba parteira no médiku sira iha Ospitál Kampung Baru, Comoro, Dili.

“Daudaun ha’u servisu no kontribui hela formasaun ba parteira sira no ba médiku foun sira atu bele fó tratamentu ho kualidade ba ita-nia komunidade iha Ospitál Kampung Baru, Comoro,” Sobrevivente 12 Novembru, Nelinia dos Santos Soares, ba Agência TATOLI via telefónika, foin lalais ne’e.

Nia hala’o ida-ne’e, nia dehan, nia kontinua iha espiritu nasionalizmu hodi hakarak kontribui saida mak nia iha hanesan parteira, la’ós iha rezisténsia mak fó kontirubuisaun maibé tempu agora mós bele tanba ema hotu-hotu presiza dezenvolvimentu ba povu no ba nasaun ne’e di’ak.

Nia hateten, atividade ne’e atu bele inspira joven sira atu bele banati tuir buat ne’ebé mak uluk joven 12 novembru sira halo tanba uluk ne’e iha  hanoin ida de’it hodi bele liberta nasaun ida-ne’e, maibé agora joven sira tenke hanoin katak hanoin atu kria unidade hodi dezenvolve rai ida-ne’e la’o ba oin.

Tanba joven mak espiritu nasionalizmu ne’ebé aas  hanesan sira ne’ebé maka uluk sente, espiritu ida ne’ebé vontade  atu bele koopera ho Governu koopera no ho ema hotu-hotu atu bele kria paz unidade  hodi lori dezenvolvimentu ba rai ida-ne’e no ba moris di’ak povu nian iha futuru.

Nia envolve iha rede klandestina tanba nia aman rasik Prezidente FRETILIN iha Munisípiu Ermera iha tinan 1974 entaun nia iha motivasaun no korajén boot hakarak kontribui ba nasaun Timor-Leste.

“Ha’u-nia motivasaun ne’e tanba  kuda tiha ona iha ha’u-nia fuan dezde 1974 mai leten tanba ha’u-nia aman hanesan Prezidente FRETILIN nian iha Munisípiu Ermera. Entaun, hnesan buat ne’ebé mak kuda metin ha’u-nia fuan mak 1975 ba oin ne’e, ami halai iha ai-laran durante tinan tolu (3), depois eskola aproveita kontaku ho maluk sira iha rezisténsia iha ai-laran hodi kontinua kontribui saida mak ha’u iha,” nia esplika.

Sobrevivente 12 Novembru, Nelinia dos Santo Soares, hateten nia iha ona fundu bainhira involve-aan iha klandestina iha 1991.

“Iha 1991, ha’u eskola ba parteira nian no iha momentu ne’ebá ha’u servisu iha área parteira nian. Entaun, ho ida-ne’e ha’u iha fundu hodi ajuda ba maluk sira ne’ebé mak iha ai-laran iha ona. To’o agora ha’u servisu nafatin hanesan formadora iha institutu Nasionál Saúde iha Comoro,” nia hateten.

Sobrevivente ne’e hateten, iha momentu ne’ebá ne’e nia hakarak joven hamutuk hodi liberta povu no nasaun Timor-Leste.

“Natón ha’u sei joven hela, ha’u-nia hanoin la’os serbi de’it nasaun maibé ha’u-nia hanoin rai ida-ne’e tenke hamutuk hodi liberta no kria klandestina ne’ebé metin, hamutuk kolega doben sira atu bele lori rai-ne’e ba oin tanba ita iha ona regra klandestina iha rai-laran no diplomátiku mós,” nia haktuir. 

Entaun, nia dehan, forsa ida ke la mout no ida-ne’e kontinua motiva nia tenke halo netik buat ruma ho kolega sira atu mundu bele koñese liután nasaun doben Timor-Leste.

Iha tempu ne’ebá ne’e, nia eskola hodi haree mós ba liberta nasaun nian, entaun iha ona rede klandestina ne’ebé komesa mosu barak ona nune’e nia mós envolve-aan iha klandestina.

Tanba, nia dehan, motivasaun ida mak tenke ukun-aan tanba haree ba okupasaun ida-ne’e só lori de’it mak terus ho mate entaun iha tempu ne’ebá ne’e nia hakarak mak envolve-aan iha klandestina no kontinua eskola.

Tuir nia, Estadu Timor-Leste fó ona rekoñesementu hanesan simu medalla maibé subsídiu nian, to’o agora nia seidauk hetan tanba nia foin mak rejistu ka halo verifikasaun ba dadus iha 2019.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here