Ministru Koordenadór Asuntu Ekonómiku, Joaquim Amaral prezide reuniaun ministériu implementadór programa Cesta Bázika, iha Gabinete MKAE, Palásiu Governu. kuarta (11/11). Imajen/Egas Cristovão

DILI, 11 novembru  2020 (TATOLI)–Ministériu Koordenadór Asuntu Ekonómiku (MKAE) hamutuk ho ministériu implementadór ba Cesta Bázika, hahú halo enkotru koordenasaun hodi avalia implementasaun programa.

Hafoin enkontru ne’e, Ministru Koordenadór Asuntu Ekonómiku, Joaquim Amaral, klarifika presu produtu iha programa Cesta Bázika tuir presu merkadu.

“Ita la halo buat ida fora husi regra merkadu, liuliu kona-ba presu tanba kompañia sira ne’ebé partisipa iha Cesta Bázika iha reputasaun iha merkadu Timór. Tanba ne’e ha’u la fiar sira bele estraga naran, ha’u hein públiku bele fó konfiansa presu ho justu, konta husi prosesu sira tenke tuir regra merkadu,” dehan Minstru Joaquim, iha Palásiu Governu, kuarta ne’e.

Tuir governante ne’e, mekanizmu distribuisaun produtu no kontratu ho kompañia lojíztiku sira maka prevee.

Aleinde ne’e, enkontru ne’e ko’alia mós kona-ba presu ba kada produtu, ne’ebé presu iha loja sira hanesan de’it.

“Ezemplu  presu iha Loja Leader hanesan mós presu distribuisaun iha Metinaro, no loja ne’ebé partisipa iha distribuisaun ba sira ne’ebé iha kapasidade, tanba loja kiik laiha kbi’it. Ida-ne’e hatudu ita la halo buat nakukun tanba prosesu hotu sei nakloke, ne’ebé loja boot ne’ebé iha kontratu ona ho Governu, nia folin tuir regra ne’ebé iha merkadu aseita,” nia akresenta.

Biban ne’e, Ministru Joaquim rejeita informasaun ne’ebé dehan produtu Cesta Bázika ne’ebé fornese ba kada ema, ninia valór la to’o $25 hanesan mensiona iha lei.

“Ita labele jeneraliza dehan buat ne’e la to’o, maibé tenke orgullu katak embora Estadu ho difikuldade iha situasaun difísil, maibé sei tenta buka hakma’an povu-nia susar. Tanba ne’e bainhira buat ruma la’o la loos, ita iha Komisaun Antí Korrupsaun no fiar bele halo funsaun ho di’ak,” nia subliña.

Biban ne’e, nia husu ba públiku atu labele espalla informasaun la loos no pesimista iha komunidade nia le’et.

“Mekanizmu ne’e universál ba ema hotu no iha direitu hanesan, ne’ebé laiha problema,” nia hatutan.

Kona-ba krítika públiku ne’ebé dehan Governu ladún iha preparasaun ba implementasaun, programa Governu iha kurtu prazu ne’e tuir nia programa ne’e envolve entidade barak no tenke tetu husi aspeitu hotu, tanba ne’e la’ós fásil.

“Ita fahe de’it iha difikuldade iha reklamasaun dadus, pesoál sira,  no lori sasán ba to’o iha lokál, sa tan transporta sasán lori osan no tau sasán to’o suku hafoin organiza sira mai simu sasán ne’e la’os kama’an ne’ebé  dezafiu ne’e bo’ot,” nia katak.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here